Dibrani ia faturon humbjen 3-0 me shkodranët euforisë që ka përfshirë skuadrën për shpalljen kampion
Halili: Vllaznia, njollë për titullin

Për sulmuesin e Tiranës, Mahir Halili, humbja 3-0 të shtunën me Vllazninë ishte rrjedhojë e lojës së dobët që zhvilloi skuadra në të gjitha aspektet. "Këpuca e artë" e sezonit të kaluar ia faturon këtë dështim euforisë që ka kapur të gjithë lojtarët për fitimin e titullit kampion për të dytin vit radhazi. Ndaj Vllaznisë, Halili luajti vetëm në pjesën e parë, sepse në të dytën u zëvendësua me Merkoçin. Por edhe pas ndryshimeve në formacion, bardheblutë nuk dhuruan asgjë në fushën e lojës, sepse ishin kuqeblutë ata që ishin zotër të fushës. Duke folur për "Sportin shqiptar", Mahir Halili shprehet: "Ndeshja me Vllazninë ka qenë më e dobëta që kemi zhvilluar në këtë sezon. Nuk e morëm vesh se çfarë ndodhi me ne në fushë, sepse të gjithë dukeshim të lodhur dhe e patëm të vështirë të dilnim në lojën tonë. Vllaznia luajti më e mobilizuar dhe në kërkim të golit që nga fillimi deri në fund dhe ia arriti qëllimit të na mposhte në të gjitha drejtimet,"- bën të ditur sulmuesi bardheblu.
Këtë humbje të thellë 3-0 ndaj një rivali të përjetshëm si Vllaznia, Mahiri nuk e kapërdin dot, teksa thotë: "Në fund të sezonit, kur të bëjmë bilancet, Vllazninë mund ta quajmë ndryshe turpin e titullit. Jo pse humbëm 3-0, por për faktin se çfarë paraqitëm në fushën e lojës. Ne kemi humbur më parë me Partizanin, Teutën dhe Dinamon, por kemi qenë të ndërgjegjshëm se kemi zhvilluar lojëra të mira, por nuk e kishim fatin me vete. Këtë herë, ndaj shkodranëve, kemi shëtitur vetëm fanellat në fushë dhe nuk jemi treguar profesionistë për ta respektuar kampionatin deri në fund,"- thotë numri 14 i kampionëve në fuqi.
Sipas Halilit, shkaqet e kësaj humbjeje mund t'i faturohen vetëm euforisë që ka përfshirë të gjithë lojtarët për fitimin e titullit të dytë radhazi. "Nuk ka dyshim se humbja dhe loja jonë e dobët erdhi për shkak të gjendjes psikologjike jo të mirë që kishim përpara këtij takimi. Duke qenë se pothuajse jemi shpallur kampionë, po i nënvleftësojmë kundërshtarët. Po kjo nuk është e drejtë, sepse ne duhet ta respektojmë kampionatin, ashtu siç bëmë me Besën dhe Shkumbinin,"- vazhdon idenë e tij 29-vjeçari.
Me këtë humbje të katërt sezonale, Tirana nuk rrezikon asgjë për sa i takon fitimit të titullit, duke qenë se kundërshtari më i afërt, siç ishte Dinamo, barazoi 2-2 me Teutën. Tashmë diferenca ka mbetur në 11 pikë, kur duhen edhe katër javë nga përfundimi. Bardhebluve u interesojnë edhe 2 pikë që të shpallen matematikisht kampionë. Ndeshja e radhës për Tiranën është ajo e së mërkurës me Partizanin, ku në stadiumin "Qemal Stafa" do të luajë një takim që ka më shumë vlera morale sesa statistikore. Kështu mendon edhe Mahiri kur shprehet: "Tashmë Vllaznia duhet të konsiderohet një kapitull i mbyllur për ne, sepse në prag është derbi me Partizanin. Në këtë përballje duhet ta largojmë imazhin e keq që dhuruam me shkodranët, duke luajtur futbollin që na shkon vërtet për shtat. Nuk kemi shumë ditë në dispozicion për t'u përgatitur për këtë derbi, në të cilin konsiderohemi skuadër pritëse, kështu që duhet të japim maksimumin tonë në stërvitje. Ky 90-minutësh, për ne ka më shumë vlera morale sesa statistikore dhe duhet fituar medoemos."

Location/Vendndodhja: England

A ju pelqen kjo faqe? Po