Këpuca e artë" e sezonit të kaluar ka besim në përmbysjen e rezultatit në ndeshjen e kthimit me blutë
Halili: Dinamo e njeh forcën e Tiranës
Sa herë që Mahir Halili luan titullar, nuk ka sesi të ndodhë ndryshe që ai të mos e gjejë rrugën e rrjetës. Një gjë të tillë "Këpuca e artë" e sezonit të kaluar (20 gola) e bëri edhe të shtunën, në trasfertën delikate me Besën. Dibrani e shënoi golin e barazimit pas pasimit të Mukës në zonë, duke treguar se mbetet një prej sulmuesve më të mirë të kampionatit shqiptar. Edhe pse në këtë sezon Halili e ka nisur pjesën më të madhe të ndeshjeve nga stoli, ka qenë determinant për fatet e Tiranës, e cila po shkon drejt titullit të dytë radhazi.
Duke folur për "Sportin shqiptar", Mahiri komenton fitoren e fundit me kavajasit, si dhe e parashikon të hapur sfidën e dytë me Dinamon për gjysmëfinalet e Kupës së Shqipërisë. "Të shtunën, me kavajasit prisnim që të hasnim në barrikadën më të vështirë të sezonit, duke parë që vendësit rrezikonin ndjeshëm rënien nga kategoria. Por faktikisht në fushë nuk ndodhi kështu, sepse Besa u dorëzua shumë shpejt. Ndoshta gjendja psikologjike e tyre ishte tepër e rënduar dhe, me sa pashë, pas pësimit të golit të barazimit, kavajasve iu prenë gjunjët. Më pas, gjithçka ishte në favorin tonë dhe ne ditëm ta përmbysnim disavantazhin, duke shënuar katër gola,"- shprehet 29-vjeçari.
Me këtë rast, Mahir Halili nuk ngurron të kundërshtojë të gjitha thëniet përpara këtij takimi, se gjoja Tirana ia kishte "****ur" ndeshjen Besës. "Më ka ardhur keq kur kam dëgjuar përpara kësaj ndeshjeje, se ne do të toleronim ndaj kavajasve, madje sikur ishim ****ur. Ne jemi një ekip i madh dhe nuk komprometohemi, sepse në radhë të parë luftojmë për objektivat tona dhe më pas për moralin e tifozëve. Të jeni të bindur se Tirana, ashtu si nuk fali Besën, nuk do të falë as të shtunën Shkumbinin, i cili është pothuajse në të njëjtat pozita si verdhezinjtë,"- bën të ditur sulmuesi bardheblu.
Në lidhje me fitimin e titullit kampion, Halili shprehet se tashmë mund të quhet një kapitull i mbyllur, duke parë diferencën prej 12 pikësh në renditje me ndjekësin më të afërt Dinamon. "Me fitoren tonë në Kavajë dhe humbjen e Dinamos në Shkodër, tashmë titulli mund të quhet plotësisht në duart tona. 12 pikët diferencë në 6 javët e mbetura janë të mjaftueshme për ne që ta ngremë sërish në "qiell" trofeun e artë të kampionit,"- shton më tej golashënuesi i njohur.
Në fund të deklarimit, ish-sulmuesi i kombëtares në periudhën kur ekipin e drejtonte trajneri Astrit Hafizi, jep opinionin e tij edhe për ndeshjen e nesërme të kupës me Dinamon. Sikurse dihet, takimi i parë gjysmëfinal, i luajtur përpara dy javësh është mbyllur me fitoren 3-1 të bluve, ndërkohë që për bardheblutë asgjë nuk ka përfunduar. Sipas Mahirit, për Tiranën nuk janë asgjë që të shënojë dy gola dhe të dalë në finale: "Dy gola janë fare pak për ne që t'u shënojmë bluve dhe më pas të kalojmë në finale. Dy gola Dinamos ia shënoi vetëm Sinani të shtunën, ndërkohë që te Tirana janë 5 kryegolashënues si shkodrani. Kjo që them nuk ka të bëjë me eufori, por me një realitet. Jam më se i bindur që Dinamo ia njeh mirë forcën Tiranës dhe se humbja e fundit ishte vetëm një rastësi. Në fund të fundit, ne të humbur jemi, kështu që do të hidhemi të gjithë në sulm, sepse nuk kemi çfarë të humbasim,"- e përfundon mendimin e tij sulmuesi potent i kampionëve.

Location/Vendndodhja: Tirane

A ju pelqen kjo faqe? Po