Josa: Tirana, jo xhami ku mund të falen të gjithë

"Nuk bëhemi pjesë e kompromiseve dhe nuk do të tolerojmë asnjë skuadër që të na dalë përpara derisa ta fitojmë edhe matematikisht titullin kampion." Ka qenë ky deklarimi i djeshëm i trajnerit Mirel Josa, në prag të trasfertës së nesërme me Besën. Sipas një**** të stolit bardheblu, Tirana është e mobilizuar maksimalisht përpara kësaj sfide për të marrë tri pikët e mundshme, që do të thoshin 95% duart te titulli. Në një intervistë për "Sportin shqiptar", trajneri bardheblu shpreson që në Kavajë të luhet një ndeshje brenda kornizave të një loje futbolli dhe më pas le të fitojë skuadra më e mirë.
- Josa, cila është gjendja e skuadrës përpara ndeshjes së nesërme në trasfertë me Besën?
- Në përgjithësi, djemtë gëzojnë formë të mirë. I vetmi që ka probleme me gjurin është Alban Tafaj, të cilin prej kaq kohësh nuk e kam pasur në dispozicion. Ka mbetur ende edhe një seancë stërvitore për t'u zhvilluar dhe do të shohim nëse ndaj Besës do të jenë të gatshëm Dede dhe Lici. Për pjesën tjetër mund të them se janë të gjithë në kushte optimale, ndërkohë që formacionin do ta përcaktoj vetëm 60 minuta përpara fillimit të ndeshjes.
- Çfarë strategjie keni planifikuar për këtë 90-minutësh të radhës dhe a mendoni se janë minimizuar gabimet që u shfaqën javën e kaluar ndaj Flamurtarit?
- Strategjia e Tiranës në çdo takim është e qartë: të luajë një futboll korrekt dhe njëkohësisht të fitojë. Ndaj Besës nuk është se do të bëjmë përjashtim, që do të thotë se do të futemi në fushë me synim për të shënuar gol sa më shpejt dhe më pas të kontrollojmë gjithçka. Sa për gabimet e shfaqura me vlonjatët, mund të them se djemtë kanë reflektuar dhe janë përpjekur të korrigjohen gjatë këtyre ditëve stërvitje.
- Pra, ju ndiheni të gatshëm që t'i shkaktoni humbjen e gjashtë këtë sezon kavajasve, pas 3 të kampionatit dhe 2 të kupës?
- Patjetër, sepse çdo rezultat tjetër mund të na i ndërlikonte pozitat drejt titullit. Neve na vjen keq, sigurisht, që Besa është në pozitat e rënies nga kategoria, sepse nuk e meriton për vetë emrin dhe gjendjen e futbollistëve që ka. Megjithatë, kavajasit nuk duhet të kërkojnë me çdo kusht fitoren me ne, sepse javë më parë kanë humbur në "shtëpinë" e tyre me Lushnjën, Elbasanin apo Dinamon.
- Gjatë këtyre ditëve, a keni pasur ndërhyrje për lënie ndeshjeje me Besën?
- Absolutisht jo. As unë, por as lojtarët besoj se nuk janë bërë pjesë e kompromiseve që dikush mund të aludojë. Tirana nuk është "xhami" që të vijnë e të luten për lënie pikësh, sepse në këtë mënyrë do të rrezikonim objektivat tona. Nëse i lëmë tri pikët Besës, i bie që edhe pas një jave me Shkumbinin të bëjmë të njëjtën gjë. A ju duket normale që ta bëjmë një gjë të tillë kur duhen edhe 7 javë nga përfundimi i kampionatit dhe diferenca me pikë është vetëm 9 pikë?
- Mos harroni se edicionin e kaluar Tirana ka toleruar me Flamurtarin dhe Lushnjën, kur ka humbur 2-1 dhe 1-0 në stadiumin "Qemal Stafa"...
- Nuk më intereson se çfarë është bërë vjet, pasi nuk kam qenë në krye të skuadrës.

Location/Vendndodhja: Tirane

A ju pelqen kjo faqe? Po