Fitorja e thellë 5-1 e Tiranës të shtunën ndaj Flamurtarit nuk e ka lënë shumë të kënaqur trajnerin Mirel Josa për mënyrën sesi erdhi. Kampionët, në këtë takim të radhës kanë vuajtur shumë deri në shënimin e golit të parë, kjo për rrjedhojë të terrenit të rënduar të stadiumit "Selman Stërmasi" dhe lojës së fortë në 40 minutat e para të vlonjatëve. Duhej goli i Patu**** me kokë që bardheblutë të zhbllokoheshin dhe më pas të shënonin edhe katër gola të tjerë. Duke folur për 90-minutëshin me kuqezinjtë e Flamurtarit, trajneri Mirel Josa shprehet: "Të shtunën, ndaj Flamurtarit, vinim pas humbjes disa ditë më parë në Kupën e Shqipërisë me Dinamon dhe na duhej medoemos të fitonim. I kishim vlerësuar vlonjatët për historinë dhe emrin e tyre të madh në futbollin tonë, ndonëse ata sezonin e ardhshëm do të luajnë në Grupin A2. Flamurtari ndaj nesh nuk kishte se çfarë të humbiste dhe të gjithë ata djem të rinj që luajtën dhanë maksimumin. Në pjesën e parë e kemi pasur shumë të vështirë të shënonim, sepse hasëm në një rezistencë të fortë të miqve, ndërkohë që edhe skuadra nuk lëvizi shpejt për t'i zënë në befasi,"- shprehet njëshi i stolit bardheblu.
Kur të gjithë po mendonin se pjesa e parë do të mbyllej në shifrat 0-0, u desh një goditje këndi perfekte e ekzekutuar nga Muka dhe një devijim i Saimir Patu**** për ta çuar topin drejt rrjetës. Më pas, djemtë e Latif Gjondedës lëshuan gjithçka, duke marrë me vete edhe katër gola të tjerë, që mbajnë firmat e Fortuzit dhe Merkoçit.
Trajneri Josa bën të ditur se skuadra vuajti në repartin e mesfushës dhe, sipas tij, lojtarët luajtën me 50 për qind të mundësive të tyre. "Kemi shënuar në minutat e fundit të pjesës së parë dhe më pas çdo gjë u bë e lehtë për ne pas golit me penallti të Fortuzit. Ajo që dua të vë në dukje, është problemi i qarkullimit të topit në mesfushë, ku lojtarët tanë e patën të vështirë të dilnin në lojën e tyre. Kjo edhe për shkak të terrenit të rënduar të stadiumit "Selman Stërmasi", i cili tashmë njihet nga të gjithë për gjendjen që ka. Me sa pashë, lojtarët e mi luajtën vetëm me 50 për qind të mundësive, duke mos i treguar të gjitha vlerat që zotërojnë. Gjithsesi, tashmë është e kotë të diskutojmë më, sepse për ne ndeshja me Flamurtarin nuk pati histori dhe në fund morëm një fitore të merituar në luftën për titullin kampion,"- vazhdon idenë e tij 40-vjeçari.
Kalendari i kësaj jave që ka nisur e vendos Tiranën përballë Besës, skuadër që kërkon mbijetesën në kategorinë e parë. Bardheblutë do të udhëtojnë të shtunën drejt Kavajës për të luajtur një 90-minutësh delikat, ndërkohë që të mërkurën do të ballafaqohen me Dinamon për ndeshjen e dytë gjysmëfinale të kupës. Vetë trajneri Josa shprehet se për ekipin tashmë gjërat sa vijnë dhe shtrëngohet, kur thotë: "Duke filluar që sot, për ne nis një javë e nxehtë, sepse të shtunën do të përballemi me Besën, ndërkohë që të mërkurën do të luajmë takimin e kthimit me Dinamon për kupë. Shpresoj që gjatë këtyre ditëve të riaftësohen disa prej lojtarëve kryesorë në skuadër dhe më pas të pretendojmë denjësisht për tri pikët me kavajasit dhe kualifikimin për në finale,"- i jep fund mendimit të tij trajneri i Tiranës, Mirel Josa.

Kampionët fillojnë sot nga e para
Pas fitores së të shtunës 5-1 me Flamurtarin dhe një dite pushim, sot kampionët në fuqi do t'i rikthehen stërvitjes. Për ta, sot fillon çdo gjë nga e para, ku në orën 10:00, në stadiumin "Selman Stërmasi", pritet të zbresin të gjithë futbollistët për të rinisur stërvitjen. Kjo javë, për Tiranën do të jetë shumë e vështirë, pasi do të luajë në fundjavë një trasfertë të nxehtë me Besën e Kavajës, ndërkohë që të mërkurën do të zbresë sërish në fushë, sepse do të luajë "aktin" e dytë për kupë me Dinamon. Deri në këtë përballje pritet që të riaftësohen plotësisht 4 të dëmtuar, Dede, Lici, Xhafa dhe Tafaj. Për sa u takon të skualifikuarve, ndaj Besës do të rikthehet Hajdari, i cili mungoi të shtunën ndaj vlonjatëve.

Location/Vendndodhja: Tirane

A ju pelqen kjo faqe? Po