Trajneri bardheblu analizon humbjen 3-1 në ndeshjen e parë të kupës ndaj Dinamos dhe ka besim te përmbysja
Josa: Fatal 5-minutëshi i fundit
Nuk ndihet i dorëzuar, edhe pse skuadra e tij ka humbur 3-1 derbin e parë të Kupës së Shqipërisë. Ka besim te forca e djemve që stërvit dhe është i bindur te përmbysja e madhe pas 12 ditësh. Njëshi i stolit bardheblu, Mirel Josa flet hapur për 90-minutëshin e parë të gjysmëfinales me dinamovitët, duke vënë gishtin mbi "plagë". Në një intervistë për "Sportin shqiptar", trajneri i Tiranës bën të ditur se ekipi i tij nuk e meritonte këtë disfatë me të tilla shifra. Gjithçka, sipas tij, erdhi në 5-minutëshin e fundit të lojës. Ja si u shpreh dje në stërvitje 40-vjeçari:
- Josa, keni pësuar një humbje të hidhur të mërkurën me Dinamon për ndeshjen e parë gjysmëfinale të Kupës së Shqipërisë. Ç'mendim do të ki****?
- Humbjet gjithmonë lënë shije të hidhur mbrapa, sidomos kur bëhet fjalë për takime derbi. Nuk e prisnim që gjithçka të shkonte keq për ne dhe të dështonim me shifrat 3-1.
- Po çfarë ndodhi konkretisht në këtë 90-minutësh?
- Pjesën e parë nuk e nisëm siç duhet, çka na solli vështirësi në manovrën sulmuese. Bëmë shumë gabime në mesfushë dhe repartet nuk po krijonin volumin e duhur të lojës. Dinamo u mundua të shkatërronte të gjitha variantet tona taktike dhe normalisht pjesa e parë u karakterizua nga një numër i madh faullesh. Me fillimin e pjesës së dytë, jemi ndëshkuar me një gol nga goditje këndi, por nuk u dorëzuam dhe arritëm të barazonim. Në momentin më të mirë tonin, vjen ndëshkimi me karton të kuq i Hajdarit. Kjo solli zhbalancimin e skuadrës.
- Edhe pse me 10 lojtarë, Tirana u mbrojt mirë dhe u duk sikur po e merrte barazimin 1-1, sepse minutat po kalonin...
- Po, në momentin kur mendonim se ndeshja do të përfundonte, u ndëshkuam me golin e dytë. Nëse e mbani mend aksionin, kemi humbur një top në sulm, ndërkohë që dinamovitët u kundërpërgjigjën me kundërsulmin e tyre karakteristik. Goli i tretë, më pas, ishte i pabesueshëm për mënyrën sesi erdhi. Më vjen shumë keq për këtë humbje dhe mund të them se fatale për ne ishin 5 minutat e fundit të lojës.
- Golin e tretë a mund ta konsiderojmë një "gafë" të Egbos, sepse nigeriani i kishte mundësitë ta nxirrte topin jashtë dhe jo ta mbante në zonë?
- Nuk mund t'i hidhet i gjithë faji Egbos, sepse ai u mundua ta mbante topin në lojë, por goditja që mori në kokë pas përplasjes me shtyllën solli çorientimin e tij. Dihet që në skuadër të gjithë bëjnë gabime, por ai i portierit është më i dukshëm, sepse mbrapa të pret vetëm rrjeta, ndërkohë që për lojtarët e tjerë ka mundësi korrigjimi.
- Pse i zëvendësuat njëkohësisht Fortuzin dhe Mukën, mos vallë për t'ia lehtësuar fitoren Dinamos?
- Jo, absolutisht. Më vjen keq që bëni një pyetje të tillë, sepse asnjë prej nesh nuk donte kurrësesi të fitonte Dinamoja. Të dy i pashë disi të lodhur, pasi kanë kaq ndeshje që luajnë pa pushim dhe mendova të aktivizoja dy forca të freskëta si Merkoci dhe Halili.
- Sa ndikuan mungesat e Dedes dhe të Licit në këtë përballje të parë?
- Dihet që këta dy lojtarë kanë peshë në skuadrën tonë dhe mungesat janë evidente. Por edhe lojtarët e tjerë që i zëvendësuan, mendoj se luajtën mirë, pavarësisht se rezultati në pamje të parë të jep përshtypjen e një mbizotërimi në lojë të Dinamos.
- Çfarë u keni thënë lojtarëve pas këtij takimi?
- Thjesht, të mos dorëzohen. Ata janë të gjithë lojtarë profesionistë dhe, më shumë se kushdo tjetër, e ndiejnë peshën e humbjes. Por të mos harrojmë që çunat janë të ndërgjegjshëm edhe për forcën dhe karakterin që ata kanë. Tirana nuk u druhet ekipeve më të mëdha evropiane, jo më Dinamos.
- Mos do të thotë kjo që shpresat për kualifikim në finale nuk i janë shuar Tiranës?
- Patjetër. Shpresat tona janë të mëdha për përmbysje. I kemi aq forca sa për të shënuar dy gola dhe për të kaluar në finale. Në fund të fundit, nuk kemi çfarë të humbasim dhe do t'i luajmë të gjitha "kartat". Këtë trofe e duam vetëm për prestigj dhe për dëshirën e madhe të presidentit El Sajed, sepse "thelën" e madhe, siç është titulli kampion, pothuajse e kemi siguruar.
- Nesër, në prag keni ndeshjen me Flamurtarin për kampionat, skuadër që edhe matematikisht e ka siguruar kalimin në A2. Më mirë se kaq nuk mund të bëhej për t'ju rikthyer fitores, apo jo?
- Megjithatë, nuk do të thotë se kjo ndeshje do të na shërbejë për "week-end". Do t'i vlerësojmë vlonjatët për historinë e tyre dhe jo për momentin. Ata kanë një skuadër me lojtarë të rinj dhe të talentuar që kërkojnë afirmim, kështu që duhet të bëjmë kujdes derisa të marrim fitoren.
Pas humbjes 3-1 me Dinamon, dje i gjithë stafi drejtues i kampionëve në fuqi, së bashku me lojtarët, është grumbulluar në stadiumin "Selman Stërmasi" për të zhvilluar stërvitjen e radhës. Përpara saj, trajneri Josa për 40 minuta ka folur me lojtarët në dhomat e zhveshjes, duke u kërkuar atyre të mos demoralizohen dhe të shpresojnë akoma te kualifikimi. Trajneri bardheblu gjithasht

Location/Vendndodhja: Tirane

A ju pelqen kjo faqe? Po