El Sajed: Tani më quani shqiptar

"Tani më quani shqiptar dhe mos më konsideroni më të huaj. Kam kaq vjet në Shqipëri dhe jam i lidhur shpirtërisht me vendin tuaj, po ashtu edhe me skuadrën e Tiranës. Nga kjo e fundit besoj se vetëm vdekja më ndan. Nuk mendoj se mund të dalë njeri në kryeqytet dhe të pretendojë për të shpenzuar më shumë se unë për bardheblutë. Jam gati që të kandidoj sërish dhe të fitoj me këdo." Kështu i është përgjigjur dje pyetjes presidenti Metuali El Sajed, nëse do të vazhdojë të qëndrojë në krye të kampionëve në fuqi edhe për një mandat të dytë. Mandati 4-vjeçar i El Sajed si president i bardhebluve ka përfunduar që në muajin dhjetor, megjithatë egjiptiani vazhdon të jetë në krye të skuadrës. Zgjedhjet e asamblesë së klubit të programuara në muajin dhjetor janë shtyrë në përfundim të kampionatit, kështu që bosi bardheblu vazhdon ta drejtojë me sukses skuadrën. Duke folur për "Sportin shqiptar", presidenti i 20 herë kampionëve në fuqi u jep përgjigje disa pyetjeve në lidhje me drejtimin e Tiranës.


I ulur në zyrën e tij luksoze në një prej vilave që ndodhet në sheshin "Avni Rustemi", presidenti i kampionëve ka gjetur pak kohë për të dhënë një intervistë ekskluzive për gazetën, ndonëse mbi tavolinën e tij kishte shumë shkresa që lidheshin me problemet e firmës së tij ndërtuese "HAWAI LTD." Ndihet i kënaqur me atë çfarë "kanakarët" e tij i ka dhënë në këtë sezon. Megjithatë, si njohës i vjetër i futbollit nuk pranon se lufta për titullin kampion ka përfunduar. Sipas El Sajedit, Tirana duhet të luftojë pa kompromis deri në përfundim të kampionatit, për të arritur objektivat e vendosur që në fillim të sezonit. Për egjiptianin, titulli kampion është siguruar vetëm 50%, ndërkohë që Kupa e Shqipërisë tani e fillon betejën e ashpër.
- Zoti El Sajed, si do ta vlerësonit ecurinë e skuadrës në këtë sezon futbollistik?
- Me përjashtim të disa oshilacioneve, që janë normale në një kampionat të gjatë si ky i sivjetmi, ecuria e ekipit ka qenë shumë e mirë. Skuadra, në përgjithësi, ka qenë e mirorganizuar si brenda fushës së gjelbër, ashtu edhe jashtë saj. Si president i klubit jam munduar që të mos u lë asgjë pa plotësuar futbollistëve dhe stafit drejtues nga ana financiare. Tashmë me plot gojën, Tirana mund të quhet skuadër profesioniste, e denjë për t'u përballur me çdo kundërshtar dhe për të fituar shumë trofe.
- Tirana e sivjetme ju ka kënaqur më shumë me rezultatet e arritura, apo me lojërat që ka zhvilluar?
- Me të dyja njëkohësisht. Rezultati pozitiv nuk mendoj se mund të vijë pa një lojë të rrjedhshme. Tirana ka ditur shumë mirë t'i alternojë të dy këto cilësi dhe tashmë jemi në krye të kampionatit, me diferencë prej 9 pikësh nga ndjekësi më i afërt, që është Dinamo.
- Cili do të ishte mendimi juaj për trajnerin Mirel Josa?
- Në radhë të parë, është njeri i mirë dhe më pas një trajner i pasionuar, që në të ardhmen do të bëjë shumë emër. Ai ka ditur më së miri që të gjejë gjuhën e përbashkët me lojtarët. Madje, këta të fundit e duan, sepse më shumë e konsiderojnë shok, sesa teknik. Personalisht jam i kënaqur nga puna e tij dhe shpresoj që Josa të vazhdojë sa më gjatë te Tirana, sepse e meriton.
- Çfarë ju ka mbetur më shumë peng nga viti 2004, që tashmë është në muajin e tij të katërt?
- Pa diskutim, humbja e fundit 3-0 në derbin me Dinamon. Nuk e prisja kurrsesi atë disfatë të skuadrës, sidomos në një ndeshje të të tillë. Megjithatë, lojtarët paguan, siç i thonë fjalës, të mbajturit e hundës përpjetë. Ndaj bluve futbollistët tanë hynë në fushë me mendjemadhësi, kjo edhe për faktin se media ka bërë punën e saj, duke i lavdëruar më shumë sa duhej. Në njëfarë mënyre, ky dështim duhej për skuadrën, që të mblidhte edhe një herë forcat dhe të mendojë se kampionati nuk ka përfunduar.
- Ju mendoni se kampionati është ende në fushë? Mos kemi të bëjmë me një diplomaci të rastit, sepse Tiranës edhe në këtë edicion është e vështirë që t'i gjendet kundërshtar në kampionat?
- Jo, asgjë nuk ka përfunduar dhe lufta për titullin kampion është akoma e hapur. Kjo nuk është për diplomaci, sepse skuadra i ka kundërshtarët dhe ata janë Partizani, Dinamo, Vllaznia dhe Teuta. Pa lënë mënjanë edhe skuadrat disi më të vogla, që kërkojnë mbijetesën në grupin A1. Gjithashtu, nuk dua të mohoj as faktin se jemi afër me titullin kampion dhe, nëse do të ma kërkonit me përqindje, mund të them se e kemi fituar vetëm 50%.
- Po Kupën e Shqipërisë a e vlerësoni njësoj si kampionati për ta bërë tuajën?
- Normalisht, po. Ne jemi një ekip i madh që duam të pronësojmë çdo trofe kombëtar dhe në të njëjtën kohë të tregojmë sesa na vlen lëkura. Kupa është një trofe, të cilin ua kam kërkuar lojtarëve bashkangjitur me titullin. Kam bindjen se ata do të ma plotësojnë këtë dëshirë, ashtu si dhe unë nuk u kam lënë gjë mangët.
- Sot hidhet shorti i kupës. A keni ndonjë preferencë për kundërshtarin?
- Jo. Si Dinamo, Vllaznia dhe Partizani janë pothuajse në të njëjtin nivel, kështu që nuk kam ndonjë preferenc

Location/Vendndodhja: Tirane

A ju pelqen kjo faqe? Po