Lici: S'bëjmë dallime mes kampionatit e kupës

Të shtunën, ndaj Elbasanit, është rikthyer në fushë mesfushori i krahut të majtë të Tiranës, Suad Lici. Shkodrani u dëmtua në kavilje në atë fitore 5-1 ndaj Vllaznisë në "Qemal Stafa" pas një dyluftim që pati me Ahin. Kjo e detyroi 29-vjeçarin që të qëndronte larg fushave 45 ditë, duke aplikuar një terapi intensive riaftësuese. Ndaj portokallinjve, Lici u aktivizua 62 minuta, sepse, sipas trajnerit Josa, mesfushori nuk është në kondicionin e plotë fizik. Duke folur për "Sportin shqiptar", shkodrani bardheblu jep mendimin e tij për ecurinë e deritanishme të Tiranës. "Pas një periudhe të gjatë larg skuadrës, më në fund, të shtunën u riktheva të luaj në një ndeshje të rëndësishme, siç ishte ajo me Elbasanin. Edhe pse nuk isha në formën time më të mirë, në ato 62 minuta që pata mundësi të luaja, dhashë maksimumin. Shpresoj që në takimet e ardhshme të jem në formën time më të mirë, sepse sezoni po hyn në pikën kulmore të tij,"- thotë Suad Lici.
Fitorja 3-0 me Elbasanin erdhi fill pas dështimit në derbi me Dinamon dhe ky rezultat pozitiv për shkodranin ishte shumë i rëndësishëm. "Na duheshin medoemos tri pikët ndaj elbasanasve, duke qenë se një javë më parë kishim humbur në derbi. Nuk e prisnim që këtë takim ta fitonin lehtësisht që në pjesën e parë, sepse Elbasani po bën përpjekje që të mos dalë nga grupi A1. Kjo fitore e arritur e thelloi në 10 pikë diferencën tonë me Partizanin dhe 9 me Dinamon dhe ne tashmë jemi drejt titullit të dytë kampion radhazi,"- shton më tej ish-mesfushori i Vllaznisë, Teutës dhe Luftëtarit.
Për sa i takon Kupës së Shqipërisë, Lici bën të ditur se së bashku me shokët e skuadrës e vlerësojnë këtë trofe njësoj si ai i kampionatit. Edhe pse shorti nuk është hedhur akoma, shkodrani hamendëson se mund të jetë ekipi i tij i vendlindjes, me të cilin do të ndeshet në gjysmëfinale. "Personalisht nuk bëj dallime ndërmjet fitimit të titullit kampion i vendit dhe trofeut të kupës, sepse të dyja janë të rëndësishme për objektivat e Tiranës. Kupa, për mua, është një trofe që nuk e kam shijuar asnjëherë me fanellën bardheblu në këto dy vjet eksperiencë, kështu që do të bëj të pamundurën për ta rrëmbyer. Në lidhje me shortin, parandiej se do të ballafaqohemi me Vllazninë në gjysmëfinale. Të them të drejtën, me patriotët e mi do të preferoja të ndeshesha në finale, sepse si Tirana dhe Vllaznia janë dy skuadra që e meritojnë të jenë përballë në këtë sfidë,"- shton më tej Suadi.
Në fund të komentit, Lici flet edhe për takimin e së shtunës në stadiumin "Qemal Stafa" me Lushnjën. Numri 19 i kampionëve në fuqi i vlerëson "lagunarët" si një prej skuadrave që i kanë hapur më shumë telashe Tiranës këto dy vitet e fundit. "Edhe këtë fundjavë do të kemi një përballje delikate, teksa do të ndeshemi me lushnjarët. Ata kanë një prej ekipve që na kanë hapur probleme në dy sezonet e fundit, kur fituan vjet 1-0 në "Qemal Stafa", ndërkohë që në fazën e tretë na barazuan 1-1 në minutat e fundit. Duhet të japim maksimumin në këtë 90-minutësh, që më pas të mos përsëriten skena jo të pëlqyera nga tifozët tanë dhe opinioni sportiv në vend,"- përfundon idenë e tij një prej mesfushorëve më të mirë të kampionatit shqiptar, Suad Lici.
Aurel CELIBASHI

Tirana afron stërvitjen për kombëtaren
Tirana ka zhvilluar dje paradite stërvitjen e saj të radhës për këtë javë. Duke qenë se dje pasdite kombëtarja kuqezi është ndeshur me atë islandeze, kampionët ranë dakord që ta afronin stërvitjen paradite. Kështu, dje në orën 10:30, në stadiumin "Selman Stërmasi", trajneri Josa ka punuar me skuadrën në aspektin tekniko-taktik, teksa ka zhvilluar edhe një minindeshje kontrolli ndërmjet formacionit të parë dhe atij të dytë. Mungesat e vetme të bardhebluve janë ato të Mukës dhe Dedes, të grumbulluar me përfaqësuesen. Sot, të dy lojtarët do të jenë të gatshëm për Josën, ndërkohë që ndaj "lagunarëve" mungesa e vetme do të jetë ajo e Prengës, i skualifikuar me kartonë.

Location/Vendndodhja: England

A ju pelqen kjo faqe? Po