Fjodor Xhafa mund të quhet ndryshe sulmuesi i momentit për Tiranën. Vlonjati, në sezonin e tij të dytë me fanellën bardheblu, po tregon se është një prej golashënuesve më të mirë të kampionatit shqiptar. Forma e tij në fazën e tretë që sapo u mbyll ishte e jashtëzakonshme, duke e bindur plotësisht trajnerin Mirel Josa për t'i besuar një vend titullari në skuadër. Ky moment për të është vetëm një rikonfirmim i vlerave të padiskutueshme që Fjodor Xhafa ka pasur që kur luante në radhët e Flamurtarit, Bylisit dhe Dinamos. Tashmë numri 20 i kampionëve në fuqi e sheh veten në kuotën e 9 golave. Dopieta e fundit e vlonjatit u realizua pikërisht të shtunën, në stadiumin kombëtar "Qemal Stafa", ndaj Elbasanit, në atë fitore të lehtë 3-0 të Tiranës. Duke folur për "Sportin shqiptar", Fjodori ndihet i kënaqur me ecurinë e tij dhe të skuadrës si në kampionat ashtu edhe në Kupën e Shqipërisë. "Ndryshe nga sezoni i kaluar, këtë vit jemi një grup lojtarësh që ia njohim mirë lojën njëri-tjetrit, çka ka sjellë kompaktësinë tonë në rezultatet shumë të mira që kemi arritur. Të gjithë në skuadër jemi të bindur se edhe ky edicion do të flasë me ngjyrat bardheblu, sepse kundërshtarët, me sa po shoh, e kanë të vështirë ta ndalin vrullin tonë. Në kampionat kemi krijuar një shkëputje relativisht të madhe, ndërkohë që disa ditë më parë kaluam edhe një tur në kupë. Më mirë se kaq nuk besoj se bëhej,"- thotë djaloshi "këmbartë" i Tiranës.
Për sa u takon 9 golave decizivë të realizuar për kampionët në fuqi në këtë fazë të tretë, 27-vjeçari bën të ditur: "9 golat e mi janë për 9 pikët diferencë që kemi me kundërshtarin më të afërt në renditje, siç është Dinamo. Ndonëse në këtë kampionat nuk më është dhënë mundësia të luaj shumë, me aq sa kam pasur hapësirë, mendoj se ua kam shpërblyer besimin drejtuesve. Kurrsesi, nuk mund të quhem unë shpëtimtar i Tiranës, sepse në skuadrën tonë të gjithë kanë pjesën e tyre në këtë ecuri të suksesshme. Shpresoj që në fazën e katërt të vazhdoj me këto ritme dhe të jem sa më shumë i rëndësishëm për objektivat e ekipit drejt të dy trofeve kombëtare,"- bën të ditur më tej Xhafa.
Edhe pse Tirana është e shkëputur ndjeshëm nga ndjekëset më të afërta, që janë Dinamo dhe Partizani, sulmuesi potent mendon se titulli kampion nuk është siguruar plotësisht. "Kurrsesi nuk duhet të shkojmë me idenë se tashmë jemi sërish kampionët e vendit, sepse kampionati do edhe një fazë të përfundojë. Vetëm kur ta sigurojmë titullin edhe matematikisht, mund të gëzojmë. Derisa t'ia arrijmë këtij qëllimi, nuk do të tolerojmë asnjë skuadër që do të na dalë përpara."
Në fund, Fjodor Xhafa ka folur diçka edhe për ndeshjen me Elbasanin, si dhe për shortin e gjysmëfinaleve të kupës. "Fitoren të shtunën mund të them se na i lehtësuan vetë elbasanasit, të cilët kishin shumë mungesa në përbërje. Takimin e mbyllëm që në pjesën e parë, ndërkohë që më pas u munduam të administronim gjithçka. Sa për shortin e kupës, parashikoj një duel shumë të ashpër ndërmjet nesh dhe Dinamos. Blutë më duken një ekip më kompakt dhe shpresoj që me ta të ndeshemi në finale."
Josa: Për Prengën vendos presidenti
Incidenti i ndodhur të shtunën në stadiumin "Qemal Stafa" ndërmjet mesfushorit Sokol Prenga dhe tifozerisë bardheblu, do të analizohet gjatë nga stafi bardheblu. Mesfushori ka lënë fushën e lojës pas një zënke me një prej tifozëve të Tiranës, duke u ndëshkuar më pas me dy kartonë të verdhë nga ana e gjyqtarit Taullau. I pyetur nëse ka disiplinë në kampin bardheblu, kur shikon të tilla fenomene, trajneri Josa është përgjigjur: "Tirana nuk përbëhet nga një lojtar i vetëm, por nga një tërësi e madhe futbollistësh. Për rastin e Prengës, nuk mund të them asgjë, sepse është presidenti ai që e pa të gjithë ngjarjen nga tribuna dhe, normalisht, i takon atij të vendosë."
Duhet të kujtojmë se disa ditë më parë, Prenga është ndëshkuar nga El Sajedi me 50 mijë lekë të reja gjobë dhe dy ndeshje pezullim, sepse kishte debatuar me trajnerin. Madje egjiptiani arriti deri aty sa të paralajmëronte futbollistin, se në raste të gjesteve të tilla mund të përjashtohet përgjithmonë nga ekipi. Sidoqoftë, fillimjava do të jetë ajo që do të vendosë më shumë për fatin e mesfushorit të njohur, kur El Sajedi të ketë takim me skuadrën.

Location/Vendndodhja: England

A ju pelqen kjo faqe? Po