"Elbasan, harroje barazimin me Tiranën këtë fazë të tretë!" Ka qenë kjo deklarata e djeshme që stoperi bardheblu, Rezart Dabulla, ka bërë ndaj portokallinjve, me të cilët do të përballet nesër në stadiumin "Qemal Stafa". Mbrojtësi energjik, duke folur për "Sportin shqiptar", është i bindur se Tirana nuk do t'i përsëritë hapat falsë në dy fazat e para, kur barazoi 0-0 në kryeqytet dhe 1-1 në stadiumin "Ruzhdi Bizhuta". "Nuk më shkon rezultat tjetër në mendje, përveç fitores në këtë fazë të tretë me elbasanasit. Kam bindjen se këtë herë të tretë me ta do të dimë të fitojmë. Nëse në dy fazat e para kemi barazuar, sepse nuk kemi ditur t'i shfrytëzojmë rastet që na janë paraqitur, kësaj here e dimë mirë se çfarë do të bëjmë,"- thotë Dabulla.
24-vjeçari rikthehet të luajë për ndeshjet e kampionatit pas mungesës në derbin me Dinamon, për shkak skualifikimi me kartonë të verdhë. Mungesa e tij në këtë takim u ndie shumë për bardheblutë për vetë sedrën dhe lojën e fortë sportive që zhvillon numri 3 i Tiranës. Në takimin e kthimit për Kupën e Shqipërisë ndaj Besës, të mërkurën, Rezarti luajti 90 minuta, ndërkohë që nesër sërish do të marrë vendin e titullarit përkrah Dedes dhe Pinarit.
Për sa i takon kualifikimit në kupë ndaj kavajasve, mbrojtësi i kampionëve bën të ditur se dy fitoret ishin më se normale, duke krahasuar forcën e të dy ekipeve. "Kalimin e turit në këtë çerekfinale me Besën nuk e kishim diskutuar asnjëherë. Ne sivjet jemi pretendentë kryesorë për fitimin e këtij trofeu dhe normalisht do të mundohemi të kalojmë çdo kundërshtar. Në lidhje me atë se çfarë dhamë në fushë në dy takimet me kavajasit, mund të them se kemi zhvilluar një lojë të mirë, ndonëse kundërshtari e kishte nënvleftësuar këtë veprimtari. Në këto momente jemi tërësisht të përqendruar për sfidën e nesërme me Elbasanin dhe më pas të presim se cilin prej tre kundërshtarëve do të na dhurojë shorti i kupës,"- komenton Rezart Dabulla.
I pyetur se cilin prej tri ekipeve ndërmjet Partizanit, Dinamos dhe Vllaznisë do të preferonte që Tirana të ballafaqohej në gjysmëfinale, stoperi shprehet: "Dëshira e të gjithëve në kampin tonë është që të ndeshemi me rivalët e përjetshëm të Partizanit. Kështu që edhe unë nuk bëj përjashtim nga kjo ide e shokëve të mi. Të kuqtë janë një skuadër me të cilët ne në këtë sezon jemi përballur tri herë, ku kemi fituar dy takime dhe një ndeshje e kemi humbur. Nëse shorti vërtet na përball me Partizanin, besoj se më pas trofeu i Kupës së Shqipërisë do të jetë yni,"- vazhdon mendimin e tij 24-vjeçari.
Në fund të deklarimit, duke iu rikthyer përballjes me Elbasanin, mbrojtësi luftarak bën të ditur se Tirana, deri në përfundim të kampionatin, nuk do të bëjë më hapa falsë. "Humbja me Dinamon na dha një "shuplakë" të mirë, që të zgjohemi dhe të luftojmë derisa titullin ta sigurojmë matematikisht. Ndaj elbasanasve do të kërkojmë nga fillimi deri në fund të 90 minutave golin e fitores. Më pas, nëse ia arrijmë këtë qëllimi, për sportdashësit tanë do të dhurojmë spektakël. Kjo është mënyra e vetme për t'u pajtuar me ata pas zhgënjimit me Dinamon,"- përfundon Dabulla.

- Tirana i është rikthyer stërvitjes së saj të zakonshme. Pas fitores 2-1 ndaj Besës për kupë, bardheblutë dje pasdite kanë qenë të pranishëm në fushën "Skënder Halili". Trajneri Mirel Josa, pasi zhvilloi një analizë të shkurtër me lojtarët për fitoren me kavajasit, i dha më pas rëndësi stërvitjes me karakter tekniko-taktik.
- Gentian Hajdari është bashkuar dje në stërvitje me skuadrën. Qendërmbrojtësi bardheblu u dëmtua në derbin me Dinamon në fytyrë dhe 4 ditë nuk u stërvit. Nuk dihet se kur Hajdari do të rikthehet të luajë në fushë, sepse stafi mjekësor hëpërhë nuk kërkon të rrezikojë me të qepurën që ka ish-dinamoviti.
- Suad Lici mund të marrë nesër rolin e titullarit në ekip. Pas një mungese të gjatë afro njëmujore (në takimin me Vllazninë), shkodrani ka qenë i dëmtuar në kavilje. Sipas masazhatorit Haxhia, këmba e lojtarit ka përmirësim të ndjeshëm dhe tashmë, për të vendosur nëse do të jetë në fushë, fjala i përket trajnerit Josa.
- Saimir Patushi do të jetë pjesë e formacionit anti-Elbasan nesër, në orën 15:30, në stadiumin kombëtar "Qemal Stafa". Matjani ishte i skualifikuar ndaj Besës për arsye kartonësh të verdhë dhe nesër do të marrë vendin në mesfushë si shkatërrues përkrah Ervin Bulkut.

Location/Vendndodhja: England

A ju pelqen kjo faqe? Po