Tirana, ndeshje kontrolli me Besën

Nga Tirana, Aurel CELIBASHI
Tirana - Besa 2-1
Tirana: Egbo, Muça, Dede, Dabulla, Pinari, Agolli, S.Bulku, Prenga, Muka (Fagu 75'), Sina (E.Bulku 46'), Halili. Trajner: M.Josa.
Besa: Bytyçi (Guma 46'), Daiu, Meta, Bratja, Barameta (Hasalliu 65'), Romanishin, Kollçaku, Kaja, Ypi, Bajaziti, Lila (Kuli 46'). Trajner: B.Hushi.
Shënues: Halili 11, Daiu 47' (p), Muka 73'
Gjyqtarë: S.Bogdani (Librazhd), A.Kuluri, A. Kastrati (Shkodër).

Tirana kualifikohet në gjysmëfinalen e Kupës së Shqipërisë. Bardheblutë kanë fituar dje edhe takimin e dytë me kavajasit me rezultatin 2-1, duke qenë një prej katër skuadrave që do të luftojnë për fitimin e këtij trofeu kombëtar. Duke parë rezultatin e ndeshjes së parë të luajtur në Kavajë (3-1), djemtë e Josës pothuajse e kishin siguruar kalimin e këtij turi dhe ndeshja e djeshme për ta ishte thjesht një ndeshje kontrolli. Kjo për faktin se verdhezinjtë zbritën në fushë me një formacion të përbërë nga elementë të rinj. Ndërkohë, tekniku Josa preferoi që për këtë përballje të radhës të hidhte në fushë pjesën më të madhe të lojtarëve titullarë, duke lënë të pushojnë vetëm Fortuzin dhe Xhafën. Ndeshja ka qenë e një niveli nënmesatar, ku në pjesën e parë ka qenë kampionët në fuqi që e morën iniciativën për gol. Mahir Halili ishte ai që hapi rrugën e golave, kjo edhe për një gabim të portierit mik. Tirana kërkoi që të merrte frenat e lojës sidomos në mesfushë dhe këtë e arriti falë veprimeve kombinative ndërmjet dy fantazistëve, Muka dhe Prenga. Kavajasit, edhe pse me një formacion modest, nuk u dhanë mundësi vendësve që ta thellonin rezultatin që në pjesën e parë. E dyta ka nisur me më shumë sedër nga ana e djemve të Hu****, kjo edhe për shkak të futjes në lojë të sulmuesit të talentuar Kuli. Egbo, në një moment shumë të vështirë në zonën e tij nuk mund ta zotëroj topin, duke shkaktuar faull ndaj Barametës dhe për gjyqtarin Bogdani kemi të bëjmë me një penallti. Për të barazuar rezultatin mendon veterani i mbrojtjes, Përparim Daiu, i cili mposht nigerianin e portës bardheblu. Çdo gjë e barabartë në stadiumin "Selman Stërmasi", ndërkohë që Besa pretendon të shënojë ndoshta edhe një gol tjetër, që mund t'i hapte shpresat për barazim. Por në momentin më të mirë të miqve, do të dalë në skenë lideri i Tiranës, Devi Muka. Vlonjati nuk e ka të vështirë të shënojë një gol, kur del përballë portierit Guma dhe siglon shifrat në 2-1. Trajneri Josa, pas shënimit të golit nga ana e fantazistit, e zëvendëson atë me sulmuesin e paratërinjve të bardhebluve, ***** Minutat në vazhdim kanë qenë formale për të dy ekipet, sepse Besa në këtë sezon po i jep më shumë rëndësi mbijetesës në grupin A1, ndërkohë që Tirana është pretendentja kryesore për ta fituar këtë trofe, i cili i mungon prej dy vjetësh.

Deklaruan pas ndeshjes
Mirel Josa, trajner i Tiranës:
"Ndeshjen e sotme na e bëri më të lehtë Besa, sepse luajti thuajse me formacion të dytë. Në këtë përballje të kupës vinim pas humbjes në derbi dhe e kishim vlerësuar për të marrë vetëm fitore. Ia arritëm synimit që të kualifikoheshim, falë një loje në përgjithësi të mirë nga ana e djemve. Tashmë të presim se me cilën skuadër shorti do të na përballë në gjysmëfinale. Duke filluar që sot, vëmendja jonë do të përqendrohet te takimi i radhës në kampionat me Elbasanin. Të shikojmë se çfarë do të ndryshojmë gjatë këtyre ditëve në skuadër, sepse kemi shumë mungesa si rrjedhojë e dëmtimeve."

Bajram Hushi, trajner i Besës:
"Ishte një humbje normale kjo jona ndaj kampionëve në fuqi. Që në momentin që Tirana na ra në short, Besa i kishte shumë të pakta mundësitë për kualifikim. Duke parë situatën që kemi në kampionat, nuk u kushtuam shumë rëndësi këtyre dy përballjeve me bardheblutë. Në këtë ndeshje aktivizova në formacion disa lojtar të rinj, prej të cilëve mbeta i kënaqur me atë çfarë shfaqën përballë emrave sugjestionues të Tiranës. Duke filluar që sot, do të mendojmë për Teutën për kampionat, të cilën e presim në fushën tonë dhe do të kërkojmë medoemos fitoren."

Location/Vendndodhja: England

A ju pelqen kjo faqe? Po