Josa: Ndaj Besës jo për formalitet

Trajneri i Tiranës, Mirel Josa, i qëndron idesë së tij, se takimi i kthimit me Besën për çerekfinalet e Kupës së Shqipërisë nuk është një formalitet. Edhe pse skuadra që ai drejton ka fituar 3-1 në ndeshjen e parë, për njëshin e stolit bardheblu jo çdo gjë ka përfunduar, sepse në dispozicion janë edhe 90 minuta të tjera.
Për "Sportin shqiptar", Josa flet për gjendjen e skuadrës. "Për ballafaqimin me kavajasit nuk i kam në dispozicion të gjithë lojtarët, kjo për shkak dëmtimesh dhe skualifikimesh. Kështu, me Licin nuk kërkoj të rrezikoj për ta aktivizuar dhe do ta lë edhe këtë takim pushim. Tafaj, siç dihet, është bashkuar me skuadrën pas një periudhe të gjatë dëmimi në gju dhe mendoj se nuk është në kondicionin e plotë fizik për të luajtur. Më shqetësues paraqitet dëmtimi që ka pësuar në fytyrë Hajdari, i cili është shumë i vështirë që të rikthehet të luajë në këto dy-tri ndeshjet e radhës. Ndërkohë, Patushi është i vetmi lojtar që kemi të skualifikuar për shkak kartonësh,"- thotë trajneri Josa.
Skuadrën e Besës, trajneri Mirel Josa e njeh mirë, sepse në tre përballjet e mëparshme me kavajasit Tirana ka fituar me rezultatet 2-1 dhe 5-0 për kampionat, ndërkohë që para dy javësh, për kupë, bardheblutë fituan 3-1. Përballja e sotme e të dy ekipeve në stadiumin "Selman Stërmasi" duket se do të jetë një ndeshje për të kaluar radhën, por tekniku bardheblu nuk mendon kështu. "Takimi me Besën, për mua, nuk përbën një formalitet që duhet kryer. Edhe pse kemi fituar 3-1 në ndeshjen e parë, kjo nuk do të thotë se jemi përfundimisht të kualifikuar në gjysmëfinale, sepse në futboll çdo gjë mund të ndodhë. Pa harruar që ky ballafaqim i radhës, për mua do të shërbejë si test për të parë gjendjen psikologjike të këtyre lojtarëve që kam në dispozicion pas humbjes në derbi. Deri tani, në stërvitje, secili prej djemve ka treguar se është më i fortë se më parë dhe disfata me Dinamon ishte rastësi. Kam shumë besim te karakteri i të gjithë lojtarëve dhe të jeni të bindur se në vazhdim Tirana do të jetë një skuadër edhe më agresive,"- bën të ditur 40-vjeçari i stolit të kampionëve.
Për sa i takon formacionit që do të zbresë në fushë ndaj verdhezinjve, është e sigurt që do të ketë ndryshime. Tekniku Josa e pohon vetë një gjë të tillë, veçse nuk flet me emra konkretë. "Ndryshime do të ketë në formacion për arsye që i përmenda më lart. Megjithatë, ai 11-tësh që do të zbres në fushë besoj se do të jetë
më i miri i mundshëm." Synimi? "As diskutohet fitorja. Kjo madje e shoqëruar edhe me një lojë mbresëlënëse për të gjithë tifozët tanë, që do të jenë në shkallët e stadiumit,"- përfundon idenë e tij trajneri i kampionëve në fuqi, Mirel Josa.

Tirana me formacion të kushtëzuar ndaj kavajasve
Formacioni i Tiranës, që do të zbresë sot, në orën 15:00, në stadiumin "Selman Stërmasi", do të jetë i kushtëzuar nga mungesa e disa lojtarëve. Trajneri Mirel Josa nuk do të ketë në dispozicion për këtë përballje të dytë për çerekfinalet e Kupës së Shqipërisë, Licin, Tafaj dhe Hajdarin të dëmtuar, si dhe Patushin e skualifikuar për kartonë të verdhë. Megjithatë, edhe pse tekniku bardheblu nuk i bën të ditur emrat e zëvendësuesve, 11-shi anti-Besa me shumë mundësi do të jetë ky: Në portë shtatlarti Isli Hidi. Mbrojtja do të ketë praninë e tre lojtarëve, me Deden në të djathtë, Pinarin në qendër dhe Dabullën stoper të majtë. Në mesfushë, nga e majta në të djathtë, pritet të luajnë Agolli, E. Bulku, S. Bulku, Muka dhe Sina. Sulmi do t'i besohet dyshes Halili-Merkoçi, sepse trajneri Josa kërkon t'i jap pakëz frymëmarrje Fortuzit me Xhafën. Për sa i takon stërvitjes së djeshme, ajo është zhvilluar paradite në fushën "Skënder Halili", ku tekniku i kampionëve punoi me futbollistët në planin tekniko-taktik.

Location/Vendndodhja: England

A ju pelqen kjo faqe? Po