Humbja e penalltisë dhe e disa rasteve për gol të premten në derbin me Dinamon nuk e ka demoralizuar golashënuesin më të mirë të Tiranës, Indrit Fortuzi. Sulmuesi bardheblu, së bashku me skuadrën e tij, ishte në një ditë të errët në atë takim të përfunduar në shifrat 3-0, që tashmë e kanë shkurtuar në 7 pikë diferencën me Partizanin. Duke folur për "Sportin shqiptar", numri 11 i kampionëve në fuqi rrëfen gjithçka çfarë ndodhi në derbi: "Ndaj Dinamos humbëm një ndeshje që në pamje të parë e kishim të fituar. Këto tri pikë të lëna rrugës shpresoj që të mos ndikojnë në ecurinë tonë në vazhdim, sepse në vazhdim na presin takime edhe më të vështira, prandaj na duhet të ruajmë qetësinë. Ajo që dua të theksoj është fakti që më mirë që kjo humbje ndodhi tani, kur jemi 7 pikë larg kundërshtarit më të afërt në renditje, Partizanit,"- thotë Indriti.
Duke u futur në detaje të ndeshjes, Fortuzi bën të ditur se Tirana zhvilloi një lojë të mirë fillimisht dhe, sipas tij, humbja e penalltisë dhe goli i dytë ishte fatal në rezultatin e derbit. "Takimin e nisëm mirë, por në momentin që prisnim të shënonim ne, e gjetën golin dinamovitët. Ishte një gol që nuk duhet të vinte në ato çaste. Megjithatë, në minutat në vazhdim e ngritëm ritmin në kërkim të barazimit, por penalltinë që fitova vetë, për fat të keq, nuk munda dot ta ktheja në gol. Kjo, në njëfarë mënyre, ndikoi për keq në gjendjen time psikologjike, por edhe te shokët, ndërsa goli i dytë ishte rrjedhojë e këtij problemi. Më pas, në pjesën e dytë, e patëm shumë të vështirë të depërtonim në mbrojtjen e ngjeshur të Dinamos,"- komenton 30-vjeçari.
Penalltia e humbur ndaj bluve ishte e dyta që Indrit Fortuzi ka humbur në këtë sezon, sepse më parë kishte gabuar në fitoren 3-1 ndaj Shkumbinit në fazën e parë. Gjithsesi, goleadori bardheblu nuk dorëzohet dhe deklaron se do të vazhdojë t'i godasë sërish penalltitë. "Është e vërtetë që ky ishte 11-metërshi i dytë që humbas në këtë sezon, por kjo nuk do të thotë se nuk do t'i godas më ato. Si natyrë jam një tip që nuk dorëzohem lehtë, ndaj të jeni të bindur se këta penallti që humba do t'i shpërblej me shumë gola të tjerë në vazhdim të sezonit. Po e përsëris, shyqyr që kjo humbje erdhi tani, sepse nëse do të ndodhte më pas, mund të sillte pasoja për ne. Në njëfarë mënyre, tashmë jemi zgjuar nga ai "gjumë" që na kishte zënë pas 16 fitoresh dhe 3 barazimeve radhazi dhe, duke filluar që nga ndeshje me Besën për kupë, duhet të tregojmë se jemi në këmbë,"- vazhdon idenë e tij golashënuesi i kampionëve në fuqi.
Në pamje të parë, takimi i dytë çerekfinal me Besën, që do të luhet të mërkurën, duket i mbyllur, sepse bardheblutë kanë fituar 3-1 me kavajasit. Për Indritin, kjo ndeshje është testi më i mirë që të hidhet pas krahëve humbja me Dinamon, si dhe për të parë përgatitjet për ballafaqimin e fundit për fazën e tretë në kampionat ndaj Elbasanit. "Përballja e së mërkurës me kavajasit vjen në një moment deciziv, sepse duhet të tregojmë që disfatën në derbi tashmë e kemi lënë pas krahëve. Gjithashtu, ky 90-minutësh për kupë do të na shërbejë për të ndryshuar diçka në lojën tonë për ndeshjen e së shtunës ndaj Elbasanit,"- përfundon Indrit Fortuzi.
Tirana, mbushet infermieria
Bardheblutë, kur ishin në pritje të rikthimit të Licit dhe Tafajit, në derbin me Dinamon kanë humbur edhe Patushin (dëmtim në kavilje) me Hajdarin. Të dy këta të fundit kanë dalë nga fusha pa mbaruar loja, sepse dëmtimet në kavilje dhe çarja në fytyrë nuk i ka lejuar të vazhdonin më tej. Trajneri Mirel Josa, në pragndeshjen me Besën për Kupën e Shqipërisë, duhet të përballet me një infermieri të mbushur. Suad Lici është e vështirë që këtë të mërkurë të rikthehet në fushë dhe të gjitha gjasat janë që shkodrani të jetë i gatshëm për takimin me Elbasanin. Ndërkohë, për Alban Tafajin, ende nuk dihet me saktësi se kur do të jetë i gatshëm, sepse dhimbjet në gju po e ngacmojnë sërish. Për sa i takon Gentian Hajdarit, i cili ka 5 të qepura në fytyrë, është shumë e vështirë që ai të aktivizohet në këto dy ndeshje të radhës për Tiranën. Gjithsesi, më shumë informacion do të mësohet sot, kur kampionët në fuqi t'i rikthehen stërvitjes në fushën "Skënder Halili".

Location/Vendndodhja: Tirane

A ju pelqen kjo faqe? Po