Fortuzi: S'kemi faj për shkëputjen

Tashmë që Tirana fiton dhe thellon diferencën me kundërshtarët, në kampin bardheblu të gjithë, në njëfarë mënyre, janë kthyer edhe në personazhe "ironike". Një ndër ta është edhe Indrit Fortuzi, i cili bën të ditur se nuk është faji i Tiranës që del përpara kohe kampione. Duke folur për "Sportin shqiptar", "Zogu" shprehet: "Nuk besoj se i gjithë faji është yni pse jemi para kohe kampionë. Janë kundërshtarët tanë ata që duhet të bëjnë më shumë rezistencë kur të përballen me ne dhe të mos dorëzohen pa filluar ndeshja. Tirana po bën thjesht detyrën e saj, duke fituar çdo takim që po i del përpara dhe e sheh dita-ditës që t'i afrohet titulli kampion. Uroj që rivalët të ndryshojnë diçka në vazhdim, sepse kam frikë se shkallët e stadiumeve do të mbeten bosh me këtë ecuri që kemi."
Duke folur për ballafaqimin me Teutën, Indriti bën të ditur se skuadra e tij nuk doli në lojën më të mirë të saj. "Me durrsakët fillimisht e patëm të vështirë të dilnim në lojën tonë, megjithatë golin e gjetëm shpejt. Nuk mendoj se ishte faull rasti i Xhafës në dyluftimin me Shehin, sepse sulmuesi ynë u hodh në ajër, ndërkohë që portierit i iku topi nga duart. Në pjesën e dytë ndryshuam diçka në lojën tonë, por duhet të dilte Dabulla nga fusha, që ne të mobilizoheshim më shumë për të shënuar dy gola të tjerë. Dua të shtoj gjithashtu se ballafaqimi me durrsakët tregoi më së miri forcën e ekipit tonë, që, ndryshe nga sezonet e tjera, këtë vit është më shumë i ekuilibruar dhe cinik për sa i takon rezultatit. Tashmë duhen edhe dy ndeshje që të mbyllet faza e tretë, por derbi me Dinamon të shtunën do të jetë prova jonë e fundit për ta siguruar titullin kampion para kohe,"- thotë numri 11 bardheblu.
Cili do të ishte ajo skuadër që nuk do ta dëshironte në gjirin e saj një goleador si Indrit Fortuzi. "Zogu", pas një dëmtimi të gjatë, duket se është rikthyer në ditët e tij më të mira, falë golave me intuitë dhe pasimeve të sakta për shokët e skuadrës. Edhe pse në një moshë jo të vogël, Indriti po na mahnit të gjithëve me veprimet e tij spektakolare, aq sa tashmë me plot gojën mund të thuhet se Tirana e ka rigjetur "mbretin" Indrit Fortuzi. 16 golat në 24 ndeshje në këtë sezon (pa harruar ato të kupës) tashmë i japin sulmuesit bardheblu statusin e kryegolashënuesit më të mirë të kampionatit. Dopieta e fundit të shtunën, ndaj Teutës në stadiumin kombëtar "Qemal Stafa", ishin mrekullia vetë për nga mënyra e realizimit. Në çastin e shënimit të golit të parë, Indriti ka qenë me kurriz nga porta, kur Xhafa pasoi për të në kufijtë e zonës së rreptësisë. 30-vjeçari nuk është menduar dy herë dhe e ka gjetur më së miri rrugën e rrjetës. Ndërkohë, pasimi për golin e dytë të Mukës dhe driblimi i Xhait në golin e tretë, ishin kapaku i gjithçkaje të bukur që mund të marrë përsipër një lojtar kalibri, si Fortuzi. Golat e tij nga java në javë po bëhen më të rëndësishëm për Tiranën, megjithatë ai nuk e mban veten shpëtimtar të skuadrës. "Nuk jam unë shpëtimtari i Tiranës, sepse në gjirin e saj të gjithë janë të rëndësishëm, pa të cilët unë nuk do të isha ky që jam sot. Për sa u takon golave të shënuar, mendoj se ky është profesioni që di të bëj më mirë. Shpresoj të vazhdoj me këto ritme edhe në të ardhmen dhe ta ndihmoj skuadrën në arritjen e synimeve të fillimsezonit."

Location/Vendndodhja: Tirane

A ju pelqen kjo faqe? Po