Tirana zgjat "duart" edhe drejt Kupës

Besa - Tirana 1-3
Besa: Kapllani (Bytyçi 48'), Daiu, Barameta, Hasalliu (Curri 59'), Xhihani, Bajaziti, Abdulla, Kollçaku, Ypi, Kuli, Kaja (Romanishin 46'). Trajner: B.Hushi.
Tirana: Hidi, Sina, Dabulla, S. Bulku, E. Bulku, Halili, Agolli, Xhafa, Patushi (Fortuzi 57'), Merkoçi, A. Muça. Trajner: M. Josa.
Shënues: Halili 43', Merkoçi 67', Fortuzi 69', Kuli 75'.
Gjyqtarë: I.Gashi (Durrës), K.Hysi, L.Çuko (Tiranë)

Komenti
Duhet thënë që në fillim se kampionët në fuqi, në këtë sezon futbollistik, më shumë se këdo kanë ndëshkuar Besën. Këtë traditë negative me bardheblutë, kavajasit e vazhduan edhe dje në kupë. Të dy ekipet vinin në takimin e parë çerekfinal të kupës me mungesa të shumta. Nëse për Tiranën kjo nuk do të thoshte shumë, pasi dihet se çfarë stoli ka, nuk mund të thuhet e njëjta gjë për Besën. Diamanti, Stavre, Veizi, Kapllani e Bubeqi përbënin pothuajse 50 për qind të ekipit kavajas, mungesa e të cilëve i kushtoi shumë Besës. Vendësit nuk e kishin vlerësuar sa duhet këtë ballafaqim, për vetë faktin se ndihen të rrezikuar në kampionat dhe e kanë mendjen më shumë te mbijetesa në Grupin A1. Për pasojë, edhe dje, verdhezinjtë, ndonëse luanin me Tiranën, e kishin mendjen te ndeshja e së shtunës me Vllazninë.
Kësisoj, ekipet zbritën në terrenin e shkëlqyer të stadiumit "Besa" me pretendime krejtësisht të ndryshme, Tirana për të siguruar kualifikimin që në takimin e parë çerekfinal të kupës, ndërsa Besa për të testuar veten para sfidës me kuqeblutë. Minutat e para të ndeshjes së djeshme u zhvilluan kryesisht në mesfushë. Tiranasit nuk nxitonin të kërkonin golin, ndërsa kavajasit kërkonin ta mbanin sa më larg ekipin kampion. Daiu u përball me treshen Halili-Merkoçi-Xhafa, duke pasur në krah të rinjtë Barameta dhe Xhihani. Megjithatë, këto përpjekje dhanë frytet e tyre deri në minutën e 43-të, kur klasi i Mahir Halilit do të triumfonte mbi rininë e Barametës. Goleadori nuk e pati të vështirë ta kalonte Tiranën në avantazh. Pjesa e dytë foli tërësisht për kampionët. Ata kanë kërkuar ta mbyllin kualifikimin që në Kavajë dhe nuk kanë ngurruar ta "hipotekojnë" këtë objektiv. Në fillim me Merkoçin dhe më pas me Fortuzin, kryeqytetasit arrijnë ta vulosin rezultatin në 3?0. Pas këtij avantazhi, kampionët lëshuan në lojë dhe Kuli me Bajaziti duhet të shënonin. Megjithatë, goli i vetëm për vendësit u shënua nga Bekim Kuli, 15 minuta pa mbaruar takimi.
E veçantë e sfidës së djeshme ishte mbetja me 10 lojtarë e të dy ekipeve. Kjo, pasi Besa i kishte konsumuar 3 ndërrimet e lejuara, ndërkohë që dëmtohet Abdulla, duke i lënë vendësit me 10 lojtarë rreth minutës së 70-të. Po kështu, kur kishin mbetur edhe 10 minuta lojë, dëmtohet Xhafa. Por për çudi, edhe pse Tirana nuk i kishte konsumuar 3 ndërrimet, vazhdon të luajë deri në fund me një lojtarë më pak.

Thanë pas ndeshjes:
Barjam Hushi, trajneri i Besës: "E dinim që do ta kishim të vështirë përballjen me Tiranën dhe faktikisht kështu ndodhi. Bardheblutë janë ekipi më i mirë në Shqipëri dhe këtë e treguan edhe sot (dje). Në këtë takim të parë çerekfinal të kupës, edhe pse vinim me mungesa, u përpoqëm të tregonim diçka nga loja jonë. Për të qenë i sinqertë, në këto momente e kemi mendjen vetëm te përballja e së shtunës për kampionat me Vllazninë. Për ne, kupa nuk është objektiv parësor."
Mirel Josa, trajneri i Tiranës: "Ndeshjen na e bëri më të lehtë Besa, për faktin se kishte shumë mungesa në formacionin bazë. Jam i kënaqur nga çfarë dhanë djemtë në fushë. Gjithashtu më gëzon fitorja me të tilla shifra. Fitimi i Kupës së Shqipërisë për Tiranën mbetet objektiv që duhet realizuar, ashtu si edhe titulli kampion."

Location/Vendndodhja: Tirane

A ju pelqen kjo faqe? Po