Kapiteni bardheblu bën të ditur se janë shkodranët ata që duhet t'i druhen Tiranës sot në "Qemal Stafa"
Dede: Vllaznisë i falim një gol
Për kapitenin e Tiranës, Nevil Dede, përballja e sotme me Vllazninë në stadiumin kombëtar "Qemal Stafa" është decizive në vijim të luftës për titullin kampion. Bardheblutë vijnë në këtë sfidë të fazës së tretë pas një barazimi dhe tri fitoreve radhazi, duke e konfirmuar veten skuadra absolute e kampionatit shqiptar. Ndaj shkodranëve, kampionët në fuqi pritet të zbresin me formacionin më të mirë të mundshëm që kanë në dispozicion. Stoperi Nevil Dede, në deklarimin e tij për "Sportin shqiptar" 24 orë përpara ndeshjes, shprehet optimist se edhe ndaj shkodranëve fitorja nuk ka për të munguar. "Përballja e sotme me Vllazninë është shumë e rëndësishme për ne në vijim të luftës për titullin kampion. Nuk kemi pasur shumë ditë në dispozicion për këtë takim të radhës, megjithatë shkodranët i kemi vlerësuar maksimalisht si kundërshtarë të drejtpërdrejtë,"- thotë Nevili.
Dy fitoret e fundit, ndaj Besës dhe Shkumbinit brenda 4 ditëve, i kanë ngrohur bardheblutë se edhe në këtë sezon do të jenë të pandalshëm. Një gjë të tillë e pohon edhe vetë Dede, kur thotë: "Me përjashtim të disa oshilacioneve që kemi pësuar në fazën e dytë, në përgjithësi po zhvillojmë një edicion fantastik. Kemi 13 ndeshje në kampionat dhe 2 në kupë që nuk po njohim humbje, çka tregon më së miri forcën tonë. Ndaj Besës dhe Shkumbinit së fundi kemi marrë dy fitore me shumë vlera për ecurinë në vazhdim. Me peqinasit, edhe pse luajtëm në një terren të rënduar, zhvilluam një lojë që i la të kënaqur të gjithë të pranishmit. Tashmë diferenca jonë prej 5 pikësh me Partizanin na jep më shumë qetësi dhe njëkohësisht mundësinë për t'u dhuruar tifozëve edhe spektakël,"- vijon komentin e tij numri 4 i kampionëve.
Duke iu rikthyer sfidës me Vllazninë, Dedes i bëhet qejfi se shkodranët do të zbresin në "Qemal Stafa" me synim fitoren. Sipas tij, kjo është në favorin e Tiranës, sepse do të ketë mundësi të gjejë hapësira boshe për të shënuar disa gola. "Më vjen mirë kur dëgjoj se Vllaznia vjen në "Qemal Stafa" për të fituar. Në këtë mënyrë do të kemi mundësi që t'i godasim shkodranët falë sulmit potent që kemi. Shkodranët harrojnë se me kë kanë të bëjnë dhe sesi kanë dalë këto katër ndeshjet e fundit si në "Loro Boriçi", ashtu edhe këtu në kryeqytet,"- bën të ditur kapiteni bardheblu.
Nevili e sheh kaq të sigurt fitoren ndaj kuqebluve, sa që merr kurajon të deklarojë: "Meqenëse Vllaznia ka synime të qarta sot ndaj nesh, atëherë do t'i falim një gol. Më pas do të jeni ju, gazetarët, dhe publiku dëshmitarët më të mirë të asaj se çfarë kemi për të dhuruar ne në fushë. Madje, një rezultat 3-1 do të ishte minimal ndaj një Vllaznie që gjithmonë i fiton ndeshjet pa i filluar,"- gjykon Nevil Dede.
Në fund të deklarimit, mbrojtësi i krahut të djathtë lëshon ftesën për tifozerinë bardheblu në mbështetje të Tiranës. "Një ftesë speciale do ta bëja për të gjithë tifozerinë tonë të zjarrtë, e cila nuk lë ndeshje pa na mbështetur. Sot, për ta besoj se do të jetë një ditë ndryshe nga herët e tjera, larg stresit dhe punëve të përditshme. Më pas, edhe ne në fushë kemi për t'u dhënë gëzimin që meritojnë,"- përfundon kapiteni Dede.
Bardheblutë në stërvitjen e fundit
Tirana ka zhvilluar dje stërvitjen e fundit përpara sfidës së sotme në stadiumin kombëtar "Qemal Stafa". Në orën 10:30, në pallatin e sportit "Fahrie Hoti", bardheblutë i kanë dhënë dorën e fundit formacionit anti-Vllazni. Edhe pse trajneri Josa, si gjithmonë stoik për të mos e deklaruar 11-shin që do të zbresë sot në fushë, janë të gjithë gjasat që ai të mos ketë ndryshime nga dy takimet e fundit ndaj Besës dhe Shkumbinit. Shqetësimi i vetëm për stafin mjekësor është kapiteni Nevil Dede, i cili ndien dhimbje në shpatull dhe vetëm sot do të përcaktohet nëse do të luajë. Në rast të kundërt, vendi i titullarit mund t'i jepet ish-dinamovitit Luan Pinari. Mbrëmja e djeshme për kampionët në fuqi ka kaluar buzë Adriatikut, pikërisht në hotelin "Tirana Park" në Golem. Sot, dy orë përpara ndeshjes, bardheblutë do të lënë hotelin për të marrë drejtimin e kryeqytetit.

Location/Vendndodhja: Tirane

A ju pelqen kjo faqe? Po