Matjani kërkon ta shijojë sa më gjatë këtë moment së bashku me shokët dhe tifozët
Patushi, ai që i ktheu shtyllat në gola

Sezonin e kaluar u etiketua "goditësi i shtyllave" dhe lojtari më i pafat për Tiranën, ndërkohë që sivjet gjërat për të kanë ndryshuar rrënjësisht. Golat e tij po u japin bardhebluve sigurinë në marrjen e tri pikëve dhe po e kthejnë Tiranën në një "makinë" golash. Bëhet fjalë pikërisht me mesfushorin me tipare shkatërruese, Saimir Patushin, i cili në dy ndeshje brenda katër ditëve ka shënuar 3 gola. Një mesatare që është vërtet për t'u pasur zili edhe nga sulmuesit. Matjani po kalon formën dhe momentin më të mirë që nga koha kur ndodhet në radhët e kampionëve në fuqi. Në një deklarim për "Sportin shqiptar", 26-vjeçari rrëfen këtë periudhë fantastike që po përjeton, kur thotë: "Golat e shënuar së fundmi po më japin shumë kënaqësi, sepse ndryshe nga sezoni i kaluar, kur godisja shtylla, këtë herë topi po përfundon brenda kuadratit të portierit kundërshtar. Ndonëse nuk e kam detyrë kryesore të shënoj, në ndeshjet e fundit e kam gjetur shpesh rrugën e rrjetës, duke i dhënë Tiranës siguri në arritjen e fitores. Dua që ta shijoj sa më gjatë këtë moment me shokët e skuadrës dhe tifozët bardheblu, të cilët nuk lënë takim pa na ndjekur,"- thotë mesfushori luftarak.
Dy fitoret e njëpasnjëshme ndaj Besës dhe Shkumbinit i ka dhënë Tiranës 6 pikë të plota dhe një shkëputje prej 5 pikësh nga rivali më i afërt, që është Partizani. Në njëfarë mënyrë, po del parashikimi i Patu****, i cili disa ditë më parë pati deklaruar se deri në përballjen derbi me të kuqtë do të ishin 7 pikë diferencë. Matjani bardheblu, në komentin e tij, nuk ngurron të bëjë të ditur emocionet e përjetuara për tre golat e fundit, 2 ndaj Besës dhe 1 ndaj Shkumbinit. "Ishin për t'u çuditur ato dy golat e mi ndaj Besës të dielën e kaluar, sepse një ditë përpara një shoku im e kishte parandier se do ta bëja një gjë të tillë. Faktikisht, ashtu ndodhi dhe unë ia dedikova atij atë dopietë, kur fituam thellësisht 5-0 ndaj kavajasve. Ndërkohë, gol shënova sërish edhe ndaj Shkumbinit në çastet e fundit të lojës, falë një aksioni të bukur,"- thotë Saimiri.
Fitorja ndaj peqinasve në fushën asnjanëse të Rrogozhinës është konsideruar një sukses i padiskutueshëm i Tiranës përpara katër ndeshjeve të "ferrit" që e presin, duke filluar nga kjo e shtunë, kur do të ballafaqohet me Vllazninë, Partizanin, Teutën dhe Dinamon. Për Patushin nuk ishte e lehtë të fitoje ndaj Shkumbinit në një terren të rënduar, si ai Rrogozhinës. "Nuk ishte e lehtë për ne të merrnim tri pikë ndaj peqinasve në një fushë "të arnuar." U munduam të përshtateshim sa më shpejt me terrenin dhe ta godisnim portën nga çdo pozicion. E gjetëm golin shumë shpejt me anë të Fortuzit dhe më pas kontrolluam gjithçka. Ndërkohë, Shkumbini na vuri në vështirësi me anë të disa goditjeve standarde. Goli im në fund i mbylli të gjitha llogaritë me ta dhe ne tashmë e shohim veten brenda objektivave përpara sfidës së nesërme me Vllazninë,"- thotë numri 21 i kampionëve.
Ndaj kuqebluve, Patushi mendohet të jetë sërish protagonist dhe mezi pret të zbresë në fushë, duke qenë se Vllaznia është ish-skuadra e tij përpara se të vinte të Tirana. Shkodranët cilësohen nga mesfushori bardheblu rivalët më të drejtpërdrejtë dhe 90-minutëshi i nesërm, sipas tij, do të jetë spektakolar. "Vllazninë e konsideroj kundërshtaren më të rrezikshme, sepse luan futbollin më ofensiv. Sa për ndeshjen që do të luajmë me ta, jam i bindur se do të jetë shumë emocionuese dhe spektakolare. Këtë e kanë treguar edhe dy përballjet e fundit, ku kemi fituar me shumë vështirësi 3-2 në "Qemal Stafa" dhe 3-1 në "Loro Boriçi". Çdo gjë mendoj se do të jetë e hapur dhe do të fitojë skuadra që do të gabojë më pak. Uroj që ta kemi ne këtë shans,"- i jep fund idesë së tij mesfushori më në formë i Tiranës, Saimir Patushi.

Location/Vendndodhja: Tirane

A ju pelqen kjo faqe? Po