Trajneri bardheblu përgëzon djemtë për fitoren ndaj kavajasve dhe hedh vështrimin te Shkumbini dhe Vllaznia
Josa: Besa, detyrë "shtëpie"

Në kampin bardheblu, optimizmi për fitimin e titullit kampion është shumë i madh. Fitorja e së dielës 5-0 ndaj Besës, por edhe shkëputja me 5 pikë nga ndjekësi më i afërt, që është Partizani, i kthen bardheblutë në skuadrën-lidere të kampionatit. Janë plot 14 ndeshje që Tirana nuk e njeh shijen e humbjes që nga periudha kur në krye të stolit është trajneri Mirel Josa. 40-vjeçari ka gjetur gjuhën e përbashkët me futbollistët, të cilët në çdo ndeshje ia kanë shpërblyer besimin. Një gjë të tillë, njëshi i stolit bardheblu e pohon vetë, kur deklaron: "I përgëzoj të gjithë djemtë për atë çfarë shfaqën në fushë ndaj Besës, por edhe gjatë periudhës që jam në krye të skuadrës. Mes nesh ekziston një klimë miqësore dhe njëkohësisht pune reciproke, e cila pa dyshim ka pasur rëndësinë e saj në rezultatet e Tiranës. I falënderoj të gjithë djemtë për kontributin e tyre. Shpresoj të vazhdojnë kështu edhe në të ardhmen,"- thotë Josa.
Ballafaqimi me Besën të dielën, në stadiumin "Selman Stërmasi", në përgjithësi e ka lënë të kënaqur teknikun bardheblu jo vetëm për rezultatin e arritur, por edhe për gjendjen fizike që kanë lojtarët pas ndërprerjes trijavore të kampionatit. "Ndaj Besës kemi bërë vetëm detyrën. Këtë takim e kemi vlerësuar maksimalisht, duke qenë se vinim pas një pauze të gjatë të kampionatit. Për ne, kavajasit ishin testi më i mirë për të parë gjendjen fizike që gëzon çdo lojtar. Për këtë arsye kam mbetur i kënaqur. Forma e tyre është vërtet e mirë dhe këtë e treguan gjatë gjithë 90-minutë****. Të vetmen pakënaqësi e kam për ritmin e lojës që zhvilluam në 20 minutat e para të pjesës së dytë, kur skuadra lëshoi disi terren. Më pas, çdo gjë përfundoi për ne me shënimin e golit të tretë."
Po Muka? "Luajti në shërbim të shokëve, madje shënoi edhe një gol. E zëvendësova me qëllim për të ruajtur energjitë për dy ndeshjet e radhës, që kemi ndaj Shkumbinit dhe Vllaznisë,"- vazhdon idenë e tij trajneri i kampionëve në fuqi.
Java në vazhdim do të jetë edhe më e nxehtë për Tiranën, duke qenë se nesër do të luajë sërish, këtë herë me Shkumbinin, ndërkohë që të shtunën do të presë në stadiumin kombëtar "Qemal Stafa" shkodranët e Vllaznisë. Në njëfarë mënyre, gëzimi për fitoren ndaj Besës është arkivuar dhe që dje bardheblutë kanë filluar të mendojnë për peqinasit, me të cilët do të ndeshen në fushën asnjanëse të qytetit të Korçës. Trajneri Josa shprehet kështu për këto dy përballje të njëpasnjëshme: "Nuk kemi shumë kohë të gëzojmë fitoren ndaj Besës, sepse në prag kemi nesër takimin me Shkumbinin, ndërkohë që të shtunën na pret një ndeshje edhe më e vështirë, me Vllazninë. Kalendari në këtë periudhë është shumë i ngjeshur dhe duhet medoemos të marrim maksimumin. Ndaj peqinasve, edhe pse luajmë në fushë asnjanëse, nuk do ta kemi e lehtë, sepse ata vijnë pas një humbjeje dhe kërkojnë mbijetesën në Grupin A1. Do të zhvillojmë edhe një tjetër stërvitje sot dhe më pas do të vendos për formacionin që do të zbresë në fushë. Në dispozicion kam të gjithë lojtarët, me përjashtim të Tafajt të dëmtuar. Kjo më jep mundësi që të zgjedh 11-shen e duhur për të marrë tri pikët e radhës,"- e përfundon idenë e tij tekniku Josa.

Location/Vendndodhja: England

A ju pelqen kjo faqe? Po