Trajneri Josa pritet të aktivizojë në sulm ndaj kavajasve dyshen Fortuzi-Halili dhe mbrapa tyre Mukën
Tirana, sulm i përforcuar ndaj Besës

Bardheblutë me "tredhëmbësh" ndaj kavajasve. Edhe pse duhen akoma tri seanca stërvitore për t'u zhvilluar, është i sigurt fakti që Tirana do të luajë të dielën ndaj Besës me një sulm "atomik", të përbërë nga tre golashënues të deklaruar. Nga ajo që është parë deri tani në stërvitje, trajneri Mirel Josa po aplikon që në vijën e parë të sulmit të vendosë dyshen Fortuzi-Halili dhe mbrapa tyre, në rolin e fantazistit, Devi Mukën. Nuk përjashtohet mundësia që në vend të Mahir Halilit të aktivizohet Fjodor Xhafa, i cili po kalon një moment të mirë psikologjik pas asaj periudhe të errët në stol, por edhe në tribunë. Mëdyshja e teknikut bardheblu për të dy sulmuesit do të zgjidhet vetëm në çastet e fundit. Ajo që ka rëndësi është fakti se Tirana do të jetë tërësisht e përqendruar në sulm ndaj kavajasve. Detyra sulmuese, trajneri Josa u ka ngarkuar mbrojtësve dhe mesfushorëve, sepse, sipas tij, të gjithë duhet të mbrojnë dhe të sulmojnë njëkohësisht. "Golin nuk e pres vetëm prej sulmuesve, por edhe prej mesfushorëve apo mbrojtësve. Në skuadrën time duhet të sulmojnë dhe të mbrojnë të gjithë, sepse vetëm në këtë mënyrë mund ta vendosim në vështirësi kundërshtarin,"- thotë njëshi i stolit bardheblu. Kjo mënyrë loje i ka dhënë të drejtë trajnerit Josa si në përballjet me kundërshtarët direktë, ashtu edhe në miqësoret e fundit ndaj Naftëtarit dhe Besëlidhjes, ku janë shënuar 9 gola. Duke i marrë të gjitha repartet në veçanti, porta këtë të diel do të mbrohet nga nigeriani Egbo. Më pas, prapavija nuk do të ketë ndryshime, me Deden, Dabullën dhe Hajdarin të konfirmuar. Për sa i takon mesit të fushës, "balotazhi" për katër vende duket se është i madh, po aq sa edhe në sulm. Kështu, Lici duket më i favorizuar në krahun e majtë, karshi Tafajt, ndërkohë që edhe në qendër Patushi, Ervin Bulkun dhe Sina ruajnë avantazhin e titullarit karshi Agollit, Sokol Bulkut dhe Merkoçit. Ndryshe nga takimet e fundit, Josa do të ketë bollëk futbollistësh në dispozicion, çka e lejon të bëjë zgjedhjet e duhura. Me përjashtim të Prengës të pezulluar dy ndeshje, i gjithë grupi i lojtarëve nuk ka probleme dëmtimesh dhe skualifikimesh për kartonë. Tashmë pritet që edhe këto tri seanca stërvitore që kanë mbetur, të kryhen sipas një plani të detajuar, për t'ia bërë deri në fund shërbimet sfidës me Besën në "Selman Stërmasi".

Location/Vendndodhja: England

A ju pelqen kjo faqe? Po