Trajneri Josa, nën ethet e ndeshjes së të dielës me Besën, paralajmëron futbollistët
Tirana: T'i ruhemi kundërsulmit kavajas

Java që ka nisur për bardheblutë ka qenë tërësisht e përqendruar në ballafaqimin e së dielës ndaj Besës. Prej tri ditësh, skuadra e Tiranës po stërvitet intensivisht me nga dy seanca stërvitore ditën, ku paraditja është e zënë në sallën e forcës, ndërkohë që pasditja rezervohet në fushën "Skënder Halili". Trajneri Mirel Josa është i ndërgjegjshëm për vështirësitë e këtij 90-minutëshi të radhës, duke parë që verdhezinjtë po përjetojnë një moment të vështirë në dy vendet e fundit të renditjes, pa harruar që në përballjen e fazës së dytë në Kavajë, Tirana ka fituar vetëm në çastet e fundit. Ishte Devi Muka ai që me një dygolësh përmbysi rezultatin 1-0 të sigluar në pjesën e parë. Por gjërat tashmë kanë ndryshuar dhe kampionët në fuqi duhet t'i bëjnë mirë llogaritë, nëse nuk kërkojnë të dhurojnë ndonjë surprizë të mundshme në stadiumin "Selman Stërmasi". Për këtë tekniku Josa, përveçse po jep udhëzimet për mënyrën e vendosjes së secilit futbollist në fushë, njëkohësisht paralajmëron djemtë për të bërë kujdes nga kundërsulmi i kavajasve. Dyshes së sulmit Kuli-Kapllani në këtë fazë të tretë i është shtuar edhe Bubeqi, i cili është mjeshtër në fitimin e penalltive. Këto janë cilësi që bardheblutë ua njohin mirë kavajasve dhe shpresojnë t'i neutralizojnë ditën e ndeshjes. Njëri prej mbrojtësve të Tiranës, siç është Rezart Dabulla, shprehet se ky takim duhet fituar medoemos, sepse çdo rezultat tjetër nuk do t'u shërbente objektivave të skuadrës. "Ndaj kavajasve duhet të fitojmë me çdo kusht, nëse kërkojmë të ruajmë kryesimin. Besa është një skuadër, e cila në vetvete ka lojtarë cilësorë, por rezultatet nuk i kanë dhënë të drejtë. Jam i sigurt që gjërat kanë ndryshuar shumë nga fitorja 7-1 që kemi arritur ndaj tyre në stadiumin "Selman Stërmasi", ku unë shënova një prej golave. Kundërsulmi i tyre është i rrezikshëm dhe ata e kanë treguar në dy ndeshjet e fundit që jemi përballur, ku kanë qenë ata të parët që kanë kaluar në avantazh,"- thotë stoperi bardheblu.
Në të njëjtën linjë me Dabullën është edhe qendërmbrojtësi Gentian Hajdari, i cili me ardhjen e Josës në krye të skuadrës, është bërë një ndër pikat kryesore në prapavijë. Edhe pse në një rol jo të zakonshëm për të, Hajdari, falë eksperiencës së tij, është përshtatur më së miri si lojtari i fundit në mbrojtjen e Tiranës. Përballjen me Besën të dielën Hajdari e shikon si testin më të mirë të ekipit pas ndërprerjes trijavore të kampionatit. "Do të jetë një ballafaqim problematik, si të gjithë të tjerët, ai ndaj kavajasve. Besa, në përgjithësi, shquhet për lojën e saj të kundërsulmit dhe prej saj jemi ndëshkuar dy herë në dy ndeshjet e fundit, madje që në minutat e para. Kavajasit përfitojnë nga fakti se të gjithë te ne në skuadër kërkojmë me çdo kusht golin dhe ata gjejnë hapësira boshe. Mendoj se një gjë e tillë nuk ka për t'u përsëritur këtë të diel dhe mbrojtja jonë ka për të qenë në nivelin e kërkuar. Më pas do të ishim të kënaqur sikur të fitonim edhe me një gol,"- përfundon idenë e tij 28-vjeçari bardheblu, Gentian Hajdari. Në stërvitjen e djeshme të bardhebluve është rikthyer Lici, i cili ndodhej me leje pranë familjes në qytetin e Shkodrës, si dhe Dabulla që po kalon një gjendje të lehtë gripale. Stërvitja e sotme e futbollistëve të Tiranës është lënë për orën 11:00 të paradites, duke qenë se pasdite bardheblutë do të shkojnë në stadiumin "Qemal Stafa" për të ndjekur miqësoren Shqipëri-Suedi.

Location/Vendndodhja: England

A ju pelqen kjo faqe? Po