Vlonjati bardheblu kërkon të fitojë kampionatin dhe Kupën e Shqipërisë në përfundim të kontratës dyvjeçare
Xhafa: Sivjet, gati për bis trofesh

Sezoni 2003-2004 është i fundit për sulmuesin Fjodor Xhafa me fanellën e Tiranës. Vlonjati ka nënshkruar një kontratë 2-vjeçare me presidentin El Sajed dhe në përfundim të kampionatit do të jetë lojtar i lirë, ku do të ketë mundësi të zgjedhë nëse do të vazhdojë bashkëpunimin me kampionët, apo do ta kërkojë fatin diku tjetër. Duke qenë se për të ardhmen nuk ka vendosur, synimi i Xhafës këtë edicion me Tiranën është të fitojë të dy trofetë kombëtare. Në një deklarim për "Sportin shqiptar", 26-vjeçari shpall hapur synimet dhe flet për gjendjen e skuadrës në këtë ndërprerje të kampionatit. "Ky është sezoni im i dytë në radhët e Tiranës dhe i fundit, për sa i takon kontratës së nënshkruar me presidentin El Sajed, kështu që dua ta mbyll me fitimin e dy trofeve kombëtare. Nëse vjet u shpalla vetëm kampion, sivjet jam gati që t'i shtoj karrierës sime edhe Kupën e Shqipërisë, të cilën nuk kam pasur shansin ta fitoj ndonjëherë. Besoj se ky është sezoni i duhur për t'ia arritur këtij qëllimi,"- shprehet numri 20 i kampionëve.
Në lidhje me të ardhmen, Fjodori bën të ditur se nuk ka vendosur ende nëse do të qëndrojë edhe sezonin tjetër me bardheblutë, apo do të provojë ndonjë mundësi për jashtë shtetit. "Këtë vit më përfundon kontrata me Tiranën, por nuk kam vendosur akoma nëse do të qëndroj apo do të largohem jashtë Shqipërisë. Tani më shumë jam i përqendruar për të dhënë maksimumin për skuadrën dhe më pas të mendoj për të ardhmen,"- bën të ditur 26-vjeçari.
Në përfundim të sezonit të kaluar, Xhafa koleksionoi 10 gola, ndërkohë që sivjet ka shënuar vetëm gjysmën e tyre. Goli i fundit i tij regjistrohet në trasfertën me Flamurtarin, ku Fjodori shënoi pikërisht ndaj ish-skuadrës së vendlindjes. Koincidencë për të është se një dygolësh shënoi edhe ndaj Dinamos, ekip me të cilin u aktivizua disa sezone. Madje ai vetë deklaron se gjithmonë, sa herë luan ndaj ish-skuadrave të tij, e gjen rrugën e rrjetës. "Si për koincidencë, një pjesë të golave që shënoj, i realizoj ndaj ish-skuadrave të mia të mëparshme. Një gjë të tillë e kam bërë deri tani si me Dinamon, ashtu dhe me Flamurtarin. Shpresoj që të vazhdoj në këtë rrugë të nisur dhe ta rrisë kuotën e golave, në krahasim me sezonin e kaluar,"- bën të ditur Fjodori.
Në lidhje me ecurinë e deritanishme të Tiranës, sulmuesi potent gjykon se ajo ka qenë e suksesshme, sidomos në ballafaqimet direkte me rivalët. "Nëse do t'i bëja një përmbledhje ecurisë së deritanishme, do ta konsideroja në rrugë të mbarë. Hëpërhë ndodhemi në krye të klasifikimit dhe kemi bërë paraqitje të bukura ndaj kundërshtarëve direktë, si Partizani, Vllaznia, Teuta dhe Dinamo. Edhe pse kemi pasur disa oshilacione, sërish i kemi gjetur forcat për të dalë nga situatat e vështira, duke treguar karakterin e fortë që ekziston te klubi ynë,"- vazhdon idenë e tij Xhafa.
Në fund, golashënuesi bardheblu flet për përgatitjet e skuadrës në këtë ndërprerje të kampionati, si dhe parashikon një sfidë delikate me kavajasit të shtunën e ardhshme. "Pauzën e kampionatit e kemi shfrytëzuar me nga dy seanca stërvitore ditën dhe me dy ndeshje miqësore. Ishte mënyra e vetme që të ruanim gjendjen fizike pas fazës përgatitore të kryer në Egjipt. Ndërkohë, për ballafaqimin me kavajasit të shtunën tjetër, mund të parashikoj një 90-minutësh të nxehtë dhe tejet të vështirë. Kavajasit do të kërkojnë të na shkëputin të paktën një pikë, kështu që ne, sulmuesve, na del për detyrë ta gjejmë medoemos rrugën e rrjetës. Nëse ndaj Besës fitojmë sërish, atëherë jam i bindur se diferenca me pikë me kundërshtarët do të thellohet."

Location/Vendndodhja: England

A ju pelqen kjo faqe? Po