Josa: Dede, shpirti i skuadrës

Fitorja 3-0 të mërkurën ndaj Besëlidhjes ishte suksesi i dytë radhazi miqësor i Tiranës në këtë ndërprerje trijavore të kampionatit. Pas fitores 6-1 ndaj Naftëtarit të shtunën e kaluar, edhe këtë herë djemtë e Josës i kanë kurorëzuar më së miri përgatitjet e tyre intensive. Njëshi i stolit bardheblu, Mirel Josa, ndaj lezhjanëve hodhi në fushë të njëjtin formacion, si pak ditë më parë, me përjashtimin e vetëm se në vend të Pinarit u aktivizua kapiteni Dede. Në përfundim të këtij 90-minutëshi, trajneri i kampionëve në fuqi ka nxjerrë konkluzionet e duhura, të cilat i shpreh në deklarimin për "Sportin shqiptar".
"Takimi me Besëlidhjen ishte një tjetër test për ne në kuadrin e përgatitjeve për rifillimin e kampionatit. Pas fitores së thellë me kuçovarët, këtë herë ndaj lezhjanëve patëm disa vështirësi, duke qenë se ata aplikuan një lojë mbrojtëse, por kishin edhe një skuadër më e mirë në përbërje. Megjithatë, në fund, të vetmet raste që na u paraqitën i konkretizuam me 3 gola,"- thotë trajneri i Tiranës.
Edhe pas këtij takimi, tekniku që ende nuk e njeh humbjen që nga koha kur është në krye të skuadrës, bën të ditur se nuk mund të nxjerrë konkluzione të plota për sfidën me Besën, më datë 21 shkurt. "Edhe pse kemi luajtur deri tani dy miqësore, nuk mund të nxjerr konkluzione të plota për skuadrën që do të përballet me Besën më 21 shkurt. Ajo që mund të them është se na duhet akoma punë deri në formimin e një skuadre sa më pak të gabueshme. Besoj se një gjë e tillë do të vijë gradualisht, falë një pune pasionante të të gjithë lojtarëve,"- vazhdon idenë e tij ish-mesfushori i Tiranës në vitet '80-'90.
Për sa i takon gjendjes fizike të ekipit në tërësi, tekniku Mirel Josa shprehet se djemtë ndiejnë lodhje në këmbë, duke qenë se janë stërvitur fort gjatë këtyre ditëve ndërprerje të kampionatit. "Me sa pashë në ndeshjen me Besëlidhjen, djemtë janë disi të kontraktuar për vetë ngarkesën e madhe fizike që kanë marrë gjatë ditëve të fundit. Kjo na detyron ne si staf drejtues që ta ulim avash-avash ritmin deri ditën e ballafaqimit me kavajasit në "Qemal Stafa".
Në fund të komentit, trajneri Josa ka dhënë mendimin e tij për dy futbollistët e kombëtares, Nevil Dede dhe Devi Muka, të cilët janë rikthyer me gol në skuadër pas dëmtimeve të pësuara. "Jam i kënaqur që në ekip janë rikthyer Dede dhe Muka, të cilët kanë qenë respektivisht të dëmtuar në kofshë dhe tendinë. Nëse Devi u riaftësua disi më shpejt, edhe Nevili duket se është në të njëjtën linjë. Ndaj Besëlidhjes, këtë të fundit e provova të luante 90 minuta dhe më dha sinjalet se është shëruar plotësisht. Madje shënoi edhe një gol, duke e konfirmuar veten në skuadër thjesht një patriot i detyrave që i ngarkohen dhe i shpirtit që transmeton te të gjithë shokët,"- përfundon idenë e tij ish-zëvendëstrajneri i kombëtares, Mirel Josa.
Aurel CELIBASHI

Kampionët, pushim pas miqësores
Bardheblutë e kanë bërë pushim ditën e djeshme, për sa u takon përgatitjeve. Pas miqësores së fituar 3-0 me Besëlidhjen, trajneri Josa, duke parë që lojtarët ndiheshin të lodhur, vendosi t'i linte pushim. Sipas tij, futbollistët kanë marrë një ngarkesë të madhe fizike ditët e fundit dhe pushimi njëditor është normal për t'iu ruajtur ndonjë dëmtimi të mundshëm. Megjithatë, sot, në orën 14:00, në fushën "Skënder Halili", kampionët në fuqi do t'u rikthehen përgatitjeve. Mendohet që stërvitja e sotme të ketë karakter tekniko-taktik, pasi po bëhen përpjekjet që nesër të luhet miqësorja e tretë dhe e fundit në këtë pauzë të kampionatit. Kundërshtari i radhës pritet të jetë Kastrioti i Krujës, i cili ndodhet në vendin e parë në grupin B1.

Location/Vendndodhja: Tirane

A ju pelqen kjo faqe? Po