Pas një takimi me sekretarin Muça, egjiptiani ka dhënë viston për shpërndarjen e kësteve të prapambetura
El Sajedi hap "thesin" për bardheblutë

Rikthimi në Tiranë i presidentit El Sajed ka korresponduar me zgjidhjen e disa problemeve që kanë mbizotëruar në kampin bardheblu prej disa muajsh. Më shqetësuesi për futbollistët ka qenë mosshlyerja e njërit këst të kontratës, si dhe 4 shpërblimeve të fundit. El Sajedi, gjithashtu, i ka dhënë zgjidhje edhe çështjes "Bulku-Agolli", të cilët u pezulluan për të mos luajtur një ndeshje nga klubi, sepse nuk udhëtuan me skuadrën në takimin me Lushnjën. Një gjë të tillë e ka konfirmuar dje për "Sportin shqiptar" sekretari i klubit "Tirana", Shkëlqim Muça. Ky i fundit ka pasur dje një takim me presidentin El Sajed, me të cilin, pasi ka biseduar disa orë për problemet e skuadrës, ka rënë në një pikë të përbashkët. "Pas kthimit të presidentit nga Egjipti, dje jam takuar me të për të diskutuar më shumë në lidhje me disa probleme të fundit të ekipit. Presidenti dha viston për shlyerjen e të gjitha detyrimeve karshi lojtarëve brenda këtyre ditëve, përfshi këtu edhe disa shpërblime,"- thotë shefi Muça.
Në lidhje me Ervin Bulkun dhe Ansi Agollin, dy mesfushorët që tashmë janë grumbulluar me kombëtaren B, sekretari i klubit bardheblu shprehet se ata nuk do të lëvizin nga Tirana. "Është e sigurt se Ervin Bulku dhe Ansi Agolli janë dhe do të mbeten lojtarë të Tiranës deri në fund të sezonit. Presidenti ka kontaktuar vetë me ta dhe ka rënë dakord për t'ua plotësuar kërkesat ekonomike. Dënimi prej një jave që u dhamë ne si klub tashmë ka përfunduar dhe Bulku me Agollin do të jenë në dispozicion të trajnerit Josa për takimin me Besën pas kthimit nga Norçia,"- bën të ditur ai.
Në fund të deklarimit, Shkëlqim Muça ka pohuar se sot Tirana do të luajë një tjetër miqësore, pikërisht ndaj Besëlidhjes. "Për sot kemi rënë dakord me drejtuesit e skuadrës së Besëlidhjes për të zhvilluar një ndeshje miqësore me Tiranën. Pas asaj me Naftëtarin, kjo do të jetë miqësorja e dytë për skuadrën tonë në këtë ndërprerje trijavore të kampionatit. Kjo është mënyra më e mirë për t'i mbajtur lojtarët në tonus për sa u takon përgatitjeve të tyre dhe në të njëjtën kohë për t'i dhënë mundësi trajnerit të korrigjojë sadopak lojën e ekipit përpara ndeshjes me Besën, më 21 shkurt,"- përfundon komentin e tij ish-trajneri i bardhebluve.

Location/Vendndodhja: Tirane

A ju pelqen kjo faqe? Po