Goleadori bardheblu, këtë periudhë të ndërprerjes së kampionatit e sheh pa stimuj për skuadrën
Fortuzi: Norçia na zbriti nga "piramidat"

Për sulmuesin e Tiranës Indrit Fortuzi, nuk është e drejtë që kampionati të ndërpritej kaq gjatë si rrjedhojë e një turneu të miqësor të kombëtares B. Kjo periudhë stërvitore, sipas tij, është pa stimuj dhe ka ndikim negativ, sidomos në ato skuadra që vijnë pas një faze përgatitore.
Në një koment për "Sportin shqiptar", një ndër goleadorët më të mirë ndër vite i bardhebluve shprehet se faza përgatitore zhvilluar në Egjipt, në vendin e piramidave, i shkoi dëm ekipit të tij. "Norçia na e çoi dëm të gjithë djersën e derdhur në Egjipt për fazën përgatitore. Nuk e kuptoj se pse ky turne miqësor i kombëtares duhej të zhvillohej në momentin që kampionati kishte dy javë i hapur dhe të gjitha skuadrat ishin të përqendruara maksimalisht,"- thotë Indriti. Sipas tij, drejtuesit e Federatës Shqiptare të Futbollit duhet t'i kishin organizuar më mirë ndeshjet e kombëtares dhe të kampionatit. "Unë mendoj se drejtuesit e FSHF-së, por edhe trajneri Brigel, duhet të kishin bërë një organizim më të mirë, në kuptimin që të mos rregullonin vetëm planet e kombëtares dhe t'u prishnin punë skuadrave të Grupit A1. Duhej të gjendej një e mesme e artë, si të thuash, që edhe ne, futbollistët që nuk marrim pjesë në përfaqësuese, të mos e humbasim formën fizike. Tashmë, me këtë pauzë kaq të gjatë, shpenzimet e bëra në fazën përgatitore thuajse nuk kanë vlerë, ndërsa ne duhet të bëjmë të pamundurën për të mos humbur shumë nga vetja jonë,"- thotë 30-vjeçari.
Prej katër ditësh, kampionët në fuqi kanë rifilluar stërvitjen e tyre me nga dy seanca ditën dhe nesër pritet të zhvillojnë një takim miqësor me Naftëtarin. Indriti i sheh të nevojshme këto ndeshje për ta mbajtur në tonus në njëfarë mënyre ekipin. "Në planin e stërvitjes, gjatë këtyre ditëve pushim të kampionatit, janë planifikuar dy ndeshje miqësore, të cilat do të na shërbejnë për të ruajtur disi ritmin e kampionatit. Edhe pse kemi shumë mungesa në skuadër, besoj se trajneri Josa do të ketë mundësi ta shikojë nga afër gjendjen e gjithsecilit prej nesh,"- vazhdon idenë e tij numri 11 i Tiranës. Dy ballafaqimet e para të fazës së tretë, ndaj Lushnjës dhe Flamurtarit, e kanë rikthyer te goli "Zogun", i cili e sheh veten në kuotën e 10 golave, dy më pak se Abilio i Partizanit. Edhe pse ka shënuar, Indriti nuk e sheh ende veten në formën maksimale, teksa thotë: "Nuk jam ende në 100 % të formës sime më të mirë, ndonëse kam shënuar gjatë fazës përgatitore, si dhe në dy ndeshjet e para të fazës së tretë. Ajo që ka rëndësi është se ndiej rritje në aspektin fizik, në krahasim me një vit më parë, kur isha i dëmtuar. Shpresoj që në javët e ardhshme të arrij maksimumin, që më pas ta vë në shërbim të Tiranës,"- bën të ditur Fortuzi. Në fund të komentit të tij, Indriti ka folur edhe për ndeshjen me Besën, që do të luhet më 21 shkurt, si dhe për kundërshtarët e drejtpërdrejtë të ekipit. "Ndeshja me Besën, pas dy javësh, do të ketë vështirësinë e saj, pasi kavajasit do të kërkojnë me ngulm pikë për të dalë nga fundi i tabelës. Po bëjmë të pamundurën për t'u përgatitur denjësisht ndaj verdhezinjve, sepse ata kanë një skuadër që gjithmonë na ka hapur telashe në kryeqytet. Ndërkohë, për kundërshtarët mund të them se Vllaznia ka një ngritje të dukshme dhe është futur në vallen e titullit kampion,"- e përfundon idenë e tij Indrit Fortuzi.

Location/Vendndodhja: Tirane

A ju pelqen kjo faqe? Po