Lici: E respektoj fanellën kuqezi
Mesfushori Suad Lici dhe portieri Isli Hidi, dje janë nisur në drejtim të Norçias, duke qenë se janë thirrur "nën armë" nga trajneri Brigel për turneun miqësor që po zhvillohet në Itali. Shkodrani bardheblu është grumbulluar edhe vitin e kaluar në po këtë turne nga ana e gjermanit, madje i ka luajtur të tri takimet si titullar. Kjo rithirrje e Suad Licit me përfaqësuesen mbetet një vlerësim, të cilin ai ia dedikon stërvitjes dhe lojës së tij me fanellën e Tiranës. 29-vjeçari ka qenë pjesë e kuqezinjve edhe në periudhën, kur trajner ishte Astrit Hafizi, por edhe më pas me Medin Zhegën. Në një deklarim për "Sportin shqiptar" përpara nisjes, Suadi është shprehur: "Pak më intereson mënyra sesi rrodhën ngjarjet derisa arrita të grumbullohesha edhe unë për turneun miqësor të Norçias. Për mua është vlerësim që trajneri Brigel më beson një fanellë kuqezi në këto miqësore që do të luajmë në Itali. Shpresoj t'ia shpërblej besimin, ashtu si një vit më parë,"- thotë shkodrani. Këtë rikthim në përfaqësuese, Suadi nuk e konsideron veten lojtar rezervë, që mund të mbushë boshllëqet që shfaqen në ekip. Sipas tij, në radhë të parë, është fanella e kombit, e cila duhet të vlerësohet sa herë që të jepet shansi. "Nuk e quaj veten mbushës boshllëqesh të lojtarëve të kombëtares, por një profesionist, sepse për 5 vjet e kam mbajtur mbi shpatulla fanellën kuqezi. Kjo është një fanellë e respektuar për mua, edhe pse jam në një moshë relativisht jo të vogël për ekipin kombëtar. Do të mundohem të jap maksimumin në ndeshjet që do të kem mundësi të aktivizohem, pasi forma ime ma lejon një gjë të tillë,"- thotë mesfushori i krahut të majtë.
Më pas, në komentin e tij, Suadi ka folur edhe për skuadrën e Tiranës, e cila u rikthye të fitorja pas dy barazimeve me Elbasanin dhe Lushnjën. Edhe pse ai vetë nuk ishte i pranishëm në fitoren 2-0 ndaj Flamurtarit, shprehet i kënaqur për tri pikët e çmuara që morën shokët e ekipit. "Edhe pse vetë nuk luajta ndaj vlonjatëve, gjatë gjithë ndeshjes kam qenë në ankth për të mësuar rezultatin përfundimtar. Për ne, kjo ishte një fitore e rëndësishme në vazhdim të luftës për titullin kampion. Tashmë diferenca me Partizanin është 2 pikë dhe deri në rifillimin e ndeshjes së tretë me Besën, në skuadrën tonë do të mbizotërojë klima optimiste se edhe ky sezon do të jetë i suksesshëm,"- bën të ditur ish-mesfushori i Vllaznisë, Teutës dhe Luftëtarit. Në fund të komentit të tij, Suad Lici ka folur edhe për kundërshtarët që e ndjekin Tiranën, si dhe për ndërprerjen e kampionatit. "Javë pas jave, kundërshtarët tanë mbeten të njëjtët, duke filluar me Partizanin, Dinamon, Vllazninë dhe Teutën. Shkodranët më duken më të përgatitur në këtë fazë të tretë dhe besoj se ngjitja e tyre në shkallët e renditjes do të jetë graduale. Vllaznia është një skuadër që hëpërhë nuk ka presion mbi vete dhe do të luftojë deri në fund me ne për titull. Ndërsa për sa i takon ndërprerjes së kampionatit, shpresoj që trajnerit Josa t'i shërbej për riparimin e disa të metave që shfaqëm në dy ndeshjet e para."

Location/Vendndodhja: Tirane

A ju pelqen kjo faqe? Po