Rihapet çështja "Mahir Halili" në lidhje me kërkesën e klubit slloven të Hit (Nova) Goricës, se dibrani ka me të një kontratë të pazgjidhur. Pas një muaji, kur sllovenët dërguan një letër me gjobën prej 60.000 eurosh, që Tirana u detyrohet t'u paguajë atyre, dje në zyrat e klubit "Tirana" ka mbërritur një faks nga organizmi më i lartë i futbollit në botë, siç është FIFA, i cili kërkon që problemi i kontratës së sulmuesit Mahir Halili të zgjidhet me konsensus ndërmjet të dy klubeve. Një lajm të tillë për "Sportin shqiptar" e ka pohuar dje vetë sekretari i klubit bardheblu, Shkëlqim Muça. Nga ajo që mësohet, drejtuesit e Hit Goricës vazhdojnë të pretendojnë ende se Halili ka thyer kontratën që kishte me ta deri në qershor të vitit 2002. Problemi faktikisht është disi i ngatërruar, duke qenë se lojtari ka luajtur në radhët e sllovenëve përpara 4 vjetësh dhe më pas, në 6 muajt e fundit të kontratës, është huazuar në radhët e Tiranës, kundrejt një pagese prej 20 mijë markash që El Sajedi u pagoi atyre. Ndërkohë, pretendimet e Hit Goricës konsistojnë në idenë se edhe pas mbarimit të kontratës në vitin 2002, Mahir Halili duhej të paraqitej në Slloveni. Por dibrani, duke qenë se e ka pasur me vete çertifikatën e transferimit, nuk ka shkuar sërish të ish-klubi i tij, duke u federuar më pas nga FSHF-ja si një lojtar i blerë nga Tirana. Kjo sjellje dhe mosinteresim i Halilit i ka acaruar sllovenët e Hit Goricës, të cilët vazhdojnë të pretendojnë se Mahiri është lojtar i tyre, madje kanë dërguar disa dokumente në organizmin e FIFA-s. Kjo e fundit, pasi është njohur me dosjen që i ka mbërritur, nuk ka preferuar të futet në sherrin midis dy klubeve, duke dërguar dje një faks, nga i cili i kërkon Tiranës ta zgjidhë këtë problem në fjalë me një marrëveshje konsensuale. Në rast të kundërt, ata mund të ndërhyjnë me forcën dhe kompetencën që ia lejon rregullorja. Menjëherë sapo janë njohur me këtë faks, drejtuesit bardheblu përpiluan një letër, në të cilën kërkojnë prej klubit Hit Gorica të sjellë në klubin "Tirana" një kopje të kontratës që ka firmosur Mahir Halili. Kjo kërkesë e drejtuesve të Tiranës nuk është e para që ata kanë dërguar në drejtim të homologëve të tyre, por sllovenët, duke qenë se nuk kanë një kontratë origjinale të futbollistit për sezonin 2002-2003, kërkojnë ta zgjidhin problemin me rrugë të tjera.

Location/Vendndodhja: Tirane

A ju pelqen kjo faqe? Po