Për mesfushorin e krahut të djathtë të kampionëve, Elvis Sinën, fitorja 2-0 e Tiranës në trasfertë ndaj Flamurtarit erdhi në momentin e duhur. Në dy takimet e fundit jashtë fushe, pikërisht ndaj Elbasanit dhe Lushnjës, kampionët kishin koleksionuar dy barazime 1-1, duke e shkurtuar diferencën me pikë me kundërshtarët. Në të tilla kushte, fitorja ndaj vlonjatëve ishte domosdoshmëri për të qenë kryesues të kampionatit. Edhe pse me mungesa të shumta në formacion për shkak pezullimesh dhe dëmtimesh, Tirana ia arriti qëllimit për të dalë me tri pikë nga fusha e lojës. Dy golat e Xhafës dhe Fortuzit u mjaftuan bardhebluve për të fituar ndaj një kundërshtari me shumë probleme, siç ishte Flamurtari. Tashmë si rrjedhojë e ndërprerjes së kampionatit për turneun miqësor të Norçias, të gjithë në skuadër bëjnë analizën e dy javëve të para të fazës së tretë. Njëri prej tyre është edhe futbollisti i palodhur i krahut të djathtë, Elvis Sina, i cili në një koment për "Sportin shqiptar" jep opinionin e tij për ecurinë e Tiranës: "Fazën e tretë nuk e kemi nisur aq mirë sa e kishim parashikuar, pas atij barazimi 1-1 ndaj Lushnjës. Kemi lënë rrugës dy pikë të tjera të çmuara, duke përfshirë këtu edhe barazimet me Teutën dhe me Elbasanin në fundin e fazës së dytë. Gjithsesi, fitorja e fundit me Flamurtarin të premten na ka çliruar disi moralisht në këtë ndërprerje trijavore që i është bërë kampionatit si rrjedhojë e ndeshjeve miqësore të kombëtares,"- bën të ditur numri 2 i bardhebluve. Ndryshe nga terreni me baltë i fushës asnjanëse të Kuçovës, ku kampionët në fuqi luajtën me Lushnjën, ndaj Flamurtarit u përballën me një "liqen". Stadiumi i Vlorës ishte i mbushur me ujë nga shirat e fundit, duke mos i lejuar të dyja skuadrat të shfaqnin në fushë një futboll që u shkon për shtat të dy ekipeve. Sina, i cili ishte një ndër "notarët" e këtij takimi, i shpjegon në këtë mënyrë 90 minutat ndaj vlonjatëve: "Në Vlorë patëm dy kundërshtarë, skuadrën e Flamurtarit dhe terrenin e rënduar nga shiu. Qe e pamundur që në të tilla kushte të pretendoje të luaje një ndeshje futbolli, megjithatë ato ishin kushtet dhe ne kishim si detyrë vetëm të fitonim. Ia arritëm qëllimit falë një loje me karakter të të gjithë skuadrës, duke shënuar dy gola dhe duke e mbyllur shpejt atë takim. Ndërkohë, keqardhje më vjen për skuadrën e Flamurtarit, njëra prej skuadrave që i ka dhënë tonusin kampionatit ndër vite, e cila po rrezikon shumë që këtë sezon të bjerë në Grupin A2. Do të jetë e vështirë për vlonjatët që ta përballojnë kampionatin me lojtarë pa shumë eksperiencë,"- vazhdon idenë e tij 25-vjeçari. Që sot, kur të fillojnë stërvitjen, dhe deri më datë 21 shkurt, që rifillon kampionati, bardheblutë kanë në dispozicion kohën e përshtatshme për të kolauduar formacionin. Elvis Sina mendon se gjatë këtyre ditëve stërvitje, përfshi edhe ndonjë ndeshje miqësore, Tirana do të kapë formën e saj më të mirë. "Ditët e pushimit në kampionat do t'i shfrytëzojmë për të ndrequr ato pak të meta që janë shfaqur së fundmi. Besoj se deri sa të rifillojë kampionati, do të jemi në formën tonë më të mirë."
Ndërkohë, në fund, mesfushori i krahut jep opinionin e tij dhe për kundërshtarët direktë në luftën për trofetë. "Besoj se titullin do ta diskutojmë me 4 skuadrat që vijnë pas nesh. Pra, ndeshjet direkte do të jenë ato që do të përcaktojnë 90 % të skuadrës fituese të kampionatit."

Tirana, sot stërvitje në kalçeto
Pas fitores 2-0 ndaj Flamurtarit dhe dy ditëve pushim, sot paradite skuadra e Tiranës do t'i rikthehet stërvitjes. Në orën 10:00, në kalceto "Dajti", bardheblutë e teknikut Mirel Josa do të nisin përgatitjet e tyre për ndeshjen e javës së tretë, atë ndaj Besës, më datë 21 shkurt. Koha në dispozicion është e madhe deri ditën e ndeshjes, kështu që stafit drejtues të skuadrës i ka dalë për detyrë të sigurojë dy ndeshje miqësore në vazhdim. Ende nuk bëhen të ditur emrat e kundërshtarëve, por gjithsesi mësohet se deri të shtunën do të gjendet një skuadër, e cila të matë forcat me kampionët. Në stërvitjen e sotme, trajneri Josa pritet të përballet me 5 mungesa të lojtarëve kryesorë në ekip, siç janë Muka, Dede, Bulku, Agolli dhe Dabulla. Dy të parët janë të dëmtuar, ndërkohë që këta tre të fundit janë grumbulluar dje me kombëtaren, për t'u nisur më pas në drejtim të Italisë.

Location/Vendndodhja: England

A ju pelqen kjo faqe? Po