Futbollisti i Tiranës ka paraqitur një kërkesë në sektorin e garave, ku kërkon të largohet nga klubi bardheblu
E. Bulku kërkon prishjen e kontratës në FSHF
Ervin Bulku ka paraqitur në FSHF kërkesën për të prishur kontratën me klubin e Tiranës. Eshtë ky lajmi më i fundit i dalë nga zyrat e sektorit të garave në FSHF, madje i konfirmuar nga drejtues të sektorit të garave. Sipas shefit të sektorit të garave, Hito Hitaj, futbollisti i Tiranës, Ervin Bulku, ka sjellë një kërkesë në Federatë për të prerë marrëdhëniet me klubin bardheblu. "Eshtë e vërtetë që futbollisti i Tiranës, Ervin Bulku, ka paraqitur një kërkesë në Federatë. Futbollisti në fjalë kërkon të prishë kontratën aktuale që ka me ekipin e Tiranës," - është shprehur për këtë çështje Hitaj. Sipas këtij të fundit, futbollisti i Tiranës kërkon që të prishë kontratën me Tiranën, pasi, sipas tij, ekzistojnë disa probleme mes tij dhe klubit "Tirana". "Nga shkresa që kam në dorë, futbollisti Ervin Bulku kërkon të prishë kontratën me Tiranën, sepse sipas tij, klubi kryeqytetas dhe presidenti El Sajed nuk e kanë paguar për kohën që ka luajtur me ekipin e Tiranës," - ka vazhduar më tej Hitaj. Shefi i garave ka pohuar se kërkesa tashmë ekziston në FSHF dhe do të shqyrtohet nga organet juridike të Federatës (komisioni i disiplinës). Madje shefi i garave është shprehur se ndërmjet klubit "Tirana" dhe Ervin Bulkut mund të bëhet edhe një ballafaqim, ku të dypa palët të parashtrojnë kërkesat e tyre. Në këtë ballafaqim do të kërkohet nga palët të japin argumentet e tyre për prishjen e kontratës nga Ervin Bulku dhe mos lejimin e këtij futbollisti nga klubi "Tirana". Historia e largimit të Ervin Bulkut nga Tirana (nëse do të ndodhë) ka filluar që para fillimit të fazës së tretë të kampionatit shqiptar. Ervin Bulku nuk ka udhëtuar me ekipin e tij në Kuçovë, për ndeshjen me Lushnjën, pasi, sipas tij, presidenti El Sajed duhet ta paguajë për djersën që ka derdhur për ekipin e Tiranës. Madje ish-kapiteni ekipit Shpresa pretendon (këtë e ka deklaruar edhe në shtyp) se për këtë veprim të tij i ka informuar drejtuesit e Tiranës. Ndërkohë, menjëherë klubi "Partizani" i ka afruar Ervin Bulkut një vend në skuadrën e kuqe, nëse ky i fundit i zgjidh problemet me ekipin e tij të vjetër. Madje edhe presidenti Xhani e ka pohuar një fakt të tillë në shtyp. Nga ana tjetër, Tirana i ka pezulluar dy futbollistët Ervin Bulku dhe Ansi Agolli, pasi këta të dy nuk kanë udhëtuar me ekipin për ndeshjen me Lushnjën.
Ndërkohë, shefi i sektorit të garave, Hito Hitaj, është shprehur se dy futbollistët e Tiranës, Ervin Bulku dhe Ansi Agolli, figurojnë në listën e lojtarëve që Partizani ka regjistruar për t'i federuar në këtë merkato dimri. Gjithsesi, ndonëse E. Bulku ka paraqitur në Federatë një kërkesë për prishjen e kontratës që ka me Tiranën, duket se çështjen do ta zgjidhë përfundimisht ballafaqimi që pritet të ndodhë mes Ervin Bulkut dhe drejtuesve të Tiranës para komisionit të disiplinës në Federatë.

Location/Vendndodhja: England

A ju pelqen kjo faqe? Po