Tekniku bardheblu e cilëson të suksesshme minifazën përgatitore, duke e analizuar në detaje
Josa: Egjiptit i morëm "piramidat"
Pas mbërritjes në kryeqytet dhe një dite pushim, trajneri Mirel Josa menjëherë i është rikthyer dje stërvitjes me skuadrën në fushën "Skënder Halili". Faza përgatitore e zhvilluar në tokën e piramidave e ka lënë të kënaqur njëshin e stolit bardheblu, i cili në një deklarim për "Sportin shqiptar" shprehet se Egjiptit i morën maksimumin. Trajneri që ende nuk e njeh humbjen që nga periudha që ka marrë timonin drejtues të skuadrës, bën të ditur se Tirana e dy fazave të mbetura do të jetë një skuadër më e ekuilibruar se ajo që është parë në 2003-shin. Ndërkohë, në fund të deklarimit, 40-vjeçari flet edhe për sfidën me Lushnjën të dielën, skuadra me të cilën ai ka bërë debutimin në stolin bardheblu.
- Josa, riktheheni në Tiranë pas 10 ditësh minifazë përgatitore në Port-Said dhe Kajro. Cili do të ishte vlerësimi juaj për atë çfarë dhatë e morët njëkohësisht atje?
- Në përgjithësi, ditët e stërvitjes në Egjipt mund t'i konsideroj të suksesshme për punën në tërësi të skuadrës. U munduam të merrnim maksimumin nga djemtë, sidomos në planin fizik, por pa lënë mënjanë edhe atë tekniko-taktik. Normalisht jam i kënaqur, edhe pse e mira nuk ka fund.
- Sa të rëndësishme ishin për ju 3 ndeshjet miqësore ndaj Ruandës, El Shemsit dhe El Masrit?
- Këto takime na shërbyen shumë për të parë sesa ishin korrigjuar ato të meta që kishim shfaqur në fazën e dytë të kampionatit. Në dy ndeshjet e para, kur i kisha gjithë futbollistët në dispozicion, fituam me lojë dhe rezultat, ndonëse në momente të veçanta toleruam. Për sa i takon 90-minutë**** të fundit ndaj El Masrit, kisha probleme në ndërtimin e formacionit, kjo për shkak të largimit të justifikuar të disa prej lojtarëve tanë titullarë. Detyrimisht, disa i vendosa në role të panjohura, që do të thotë se ky nuk ishte testi real i forcës sonë.
- Mendoni se ia keni arritur qëllimit që i ki**** vënë vetes përpara nisjes për në vendin e piramidave për një Tiranë më të konsoliduar në kampionat dhe kupë?
- Ashtu shpresoj, ndonëse në dispozicion do të kemi edhe dy javë të tjera ndërprerje të kampionatit, pas ndeshjes me Lushnjën të dielën, të cilat do të na japin mundësi të ingranojmë në ekip lojtarët që nuk e kryen deri në fund minifazën përgatitore, si Bulku, Agolli apo Halili.
- Tirana e dy fazave të mbetura, a do të ketë ndryshime në modul loje?
- Ndryshimet e lojës varen nga kundërshtari që do të kemi përballë. Gjithsesi, mënyra e lojës sonë do të mbetet ajo e zakonshmja, që është parë që nga periudha kur unë jam trajner. Asnjëherë nuk është në të mirë të skuadrës të bësh ndryshime rrënjësore në mes të kampionatit, sepse lojtarët duan kohë të ambientohen.
- Si e parashikoni pjesën e mbetur të sezonit?
- Më të vështirë se atë që lamë pas. Ndonëse ky kampionat ka një strukturë të re, jam i bindur se dy fazat e mbetura do të karakterizohen nga një luftë e fortë sportive, si nga skuadrat që luftojnë për titull, ashtu edhe nga ato që duan t'i shpëtojnë rënies nga kategoria.
- Cilët shihni rivalë të drejtpërdrejtë në luftën për fitimin e titullit kampion dhe të Kupës së Shqipërisë?
- Pa dyshim Partizanin, Dinamon, Teutën dhe Vllazninë. Kjo është katërshja që gjithmonë e ka rivalizuar denjësisht Tiranën ndër vite, kështu që mendoj se lufta për trofe do të jetë e hapur deri në fund. Diferenca në pikë them se do të bëhet në takimet direkte.
- Pas tri miqësoreve, të dielën do të zbrisni në fushë për një ndeshje zyrtare, si ajo ndaj Lushnjës, për fazën e tretë të kampionatit. Çfarë Tirane do të shohim?
- Një skuadër të ekuilibruar, e cila në çdo moment do të kërkojë golin dhe fitoren. Ky është objektivi më normal që Tirana ka përpara se të hyjë në fushë. Ndeshja as diskutohet që do të jetë e vështirë, edhe pse do të luhet në fushë asnjanëse. Megjithatë, nëse kërkojmë të ruajmë vazhdimësinë, duhet që ndaj lushnjarëve të japim shpirtin në fushë.

Location/Vendndodhja: Tirane

A ju pelqen kjo faqe? Po