Stoperi i kampionëve analizon 10 ditët stërvitore në vendin e piramidave dhe është i bindur për fitimin e titullit
Dabulla: Tani me një "piston" më shumë
Kampionët në fuqi janë rikthyer dje në Tiranë pas 10 ditësh minifazë përgatitore në Egjipt. Tashmë bardheblutë do t'i vijojnë këtu përgatitjet deri në rifillimin e kampionatit, që starton këtë të dielë. Një nga lojtarët titullarë të skuadrës, Rezart Dabulla, i quan të suksesshme ditët e përgatitjeve në Port-Said dhe Kajro, sepse, sipas tij, janë minimizuar disa probleme që ishin shfaqur në dy fazat e para. Në një deklarim për "Sportin shqiptar", mbrojtësi shprehet: "Minifaza 10-ditore që zhvilluam në Egjipt, në tërë kuptimin e fjalës, mund të konsiderohet e suksesshme. Jemi stërvitur si në planin fizik, ashtu edhe atë tekniko-taktik, gjë që na ka bërë tani të ndihemi më të fortë se kurrë. Kjo u vërtetua në dy ndeshjet e para miqësore, ndaj Ruandës dhe El Shemsit, ku fituam me gola, por edhe me lojë. Një gjë është e sigurt, se deri tani jemi në rrugë të mbarë dhe presim fillimin e kampionatit,"- bën të ditur mbrojtësi energjik. Një ditë përpara kthimit në Shqipëri, Tirana zhvilloi miqësoren e fundit ndaj skuadrës ku është njëkohësisht president El Sajedi, El Masri. Edhe pse kanë humbur 1-0, bardheblutë nuk ndihen të zhgënjyer, sepse, ashtu siç rrodhën ngjarjet, duhej të fitonin medoemos egjiptianët. Sipas Dabullës, kjo ndeshje nuk ishte testi i vërtetë i forcës për Tiranën, sepse për 90 minuta më shumë u dhanë shkelma sesa spektakël dhe futboll. "Takimi i fundit miqësor me El Masrin nuk ishte testi i vërtetë i forcës dhe i punës që realizuam disa ditë në Egjipt. Vendësit kërkonin medoemos ta fitonin këtë ndeshje derbi, nëse mund ta quajmë kështu për presidentin El Sajed, dhe luanin me ndërhyrje të rënda, sa që Fortuzi doli i dëmtuar nga fusha. Po ashtu, edhe gjyqtari ishte kundër nesh, kur nxori me të kuqe Deden dhe na mohoi një penallti të pastër të Licit. Nuk ishte nevoja që egjiptianët të silleshin ashtu, sepse, në fund të fundit, ishte vetëm një miqësore,"- komenton Dabi.
Në vazhdim të deklarimit të tij, Rezarti gjykon se Tirana e sezonit 2003-2004 është skuadra më e mirë që ai ka parë për 6 sezone që aktivizohet në radhët e bardhebluve. "Po të vija në balancë skuadrën në këto 6 vite që jap kontributin tim, mund të them se Tirana e sivjetme është më e mira nga të gjitha pikëpamjet. Në skuadër ekziston forca, dëshira dhe klasi për të qenë gjithmonë ne udhëheqësit e kampionatit. Prej disa vitesh është krijuar një grup bazë futbollistësh dhe, duke përfshirë edhe të ardhurit e fundit, përbëjmë një ansambël për t'u pasur zili. Tashmë s'na mbetet gjë tjetër, veçse të vazhdojmë rrugën e nisur, ku synimet pa dyshim janë titulli kampion dhe Kupa e Shqipërisë,"- shprehet më tej numri 3 i kampionëve. Në fund të idesë së tij, stoperi bardheblu jep opinionin e tij në lidhje me ballafaqimin e parë të fazës së tretë, atë të së shtunës, ndaj Lushnjës. Dabulla do të përballet ndaj ish-skuadrës së tij të lindjes, e cila ia nxori në pah aftësitë prej talenti të vërtetë, për të kaluar më pas në radhët e Tiranës. Ai është i ndërgjegjshëm për vështirësitë e kësaj trasferte, megjithatë ka bindjen se tri pikët do t'i buzëqeshin skuadrës së tij. "Rifillimi i kampionatit na vë përballë një trasfertë të vështirë, siç është ajo e Lushnjës. Duhet të bëjmë shumë kujdes ndaj tyre dhe në fund të marrim tri pikët."

Location/Vendndodhja: Tirane

A ju pelqen kjo faqe? Po