Mesfushori nuk dëshiron që për për pjesën e mbetur të sezonit të ngrohë stolin dhe pret takimin me El Sajedin
Të vazhdoj të luaj me Tiranën edhe për pjesën e mbetur të sezonit, apo të kërkoj huazim në një skuadër tjetër ku do të kem më shumë shanse për të luajtur si titullar? Kjo është dilema e mesfushorit të talentuar bardheblu, Ansi Agolli, i cili nuk ka vendosur përfundimisht për të ardhmen e tij. "Sallaksi" i kampionëve ishte një nga të preferuarit e Sulejman Memës në fazën e parë të kampionatit, ndërkohë që në të dytën me uljen në stol të Mirel Josës, Agolli ka luajtur me "pikatore". Ky fakt e detyron 21-vjecarin t'i shkojë nëpër mend një largim në formë huazimi nga skuadra e tij "mëmë" e Tiranës. Klubet më të interesuara për ta bërë të tyre "xhevahirin" bardheblu janë Teuta dhe Dinamo. Kjo e fundit pas largimit të Ahmatajt në drejtim të Partizanit kërkon një zëvendësues dhe më ideali në krahun e majtë do të ishte Ansi Agolli. Ndërkohë edhe "djemtë e detit" nuk kanë mbetur prapa në ofertën e tyre. Është pikërisht trajneri Hasan Lika i cili ia njeh mirë vlerat që nga periudha kur e ka pasur në ekipin Shpresa për eliminatoret e Evropianit të fundit. Tanimë Agolli ndihet në mes të një "udhëkryqi", të cilin bën të ditur se do ta zgjidhë shumë shpejt brenda kësaj merkato dimri. Në një koment për "Sportin shqiptar" mesfushori energjik shprehet: "Hëpërhë nuk kam vendosur nëse do të qendroj te Tirana, apo t'iu kërkoj drejtuesve të klubit një huazim në një skuadër tjetër. Ndryshe nga faza e parë e kampionatit, në të dytën kam luajtur fare pak minuta, të cilat janë të pamjaftueshme për mua në formimin si lojtar. Nuk dua të rrezikoj me veten, sepse jam në një moshë të re dhe qenia në stol për një sezon mund të ketë pasoja negative,"- thotë Ansi. Për të ardhmen Agolli shprehet se pas rikthimit nga Portugalia, ku është grumbulluar me kombëtaren B për një turne miqësor, do të flasë me presidentin El Sajed. "Besoj se për të ardhmen time do të vendos pas kthimit nga Portugalia. Me presidentin El Sajed kam biseduar dhe deri tani ai ka shprehur dëshirën që të qëndroj, gjithsesi, takimi i fundit do të vendos gjithçka nëse do të më lejojë të huazohem,"- vazhdon idenë e tij mesfushori i krahut të majtë. Për sa u takon ofertave që i kanë mbërritur, ai tregohet i gatshëm për t'i zbuluar. "Kam pasur disa oferta nga skuadra të ndryshme të kampionatit, por më konkretet kanë qenë ato të Teutës dhe Dinamos. Të dyja këto ekipe kanë shprehur dëshirën për të qenë pjesë e synimeve të tyre për pjesën e mbetur të sezonit dhe për këtë ndihem i vlerësuar. Ditët e ardhshme besoj se do të zbardhet edhe destinacioni im i mundshëm,"- bën të ditur numri 15 i kampionëve. Nëse Agolli do të largohet nga Tirana, ky do të jetë huazimi i tij i dytë brenda dy vjetësh, duke qenë se sezonin e kaluar për 6 muaj luajti në radhët e Apolonisë.
Në fund të deklarimit të tij mesfushori i krahut flet për stërvitjen e Tiranës në Egjipt dhe kënaqësinë për ftesën e trajnerit të kombëtares Brigel për turneun miqësor të Portugalisë. "Në Egjipt kemi zhvilluar një minifazë të fortë përgatitore nga të gjitha pikëpamjet dhe jam i bindur se Tirana e pjesës së mbetur të sezonit, do të jetë edhe më e fortë se ajo e dy fazave të para. Këtë gjë e treguan edhe dy ndeshjet miqësore që zhvilluam, të cilat i fituam me meritë. Ndërkohë për sa i takon grumbullimit me përfaqësuesen kuqezi, jam shumë i kënaqur dhe për këtë dua të falënderoj trajnerin Brigel për besimin që ka ndaj meje. Do të jap maksimumin për të dhënë më të mirën time në fushë nëse do të luaj në këto dy ndeshje që janë programuar. Shpresoj që në fund të marrim ndonjë fitore,"- i jep fund idesë së tij 21-vjeçari.

Location/Vendndodhja: England

A ju pelqen kjo faqe? Po