Mesfushori bardheblu ka lënë dje vendin e piramidave për t'u bashkangjitur në kombëtaren B
Ervin Bulku: Ja ditët tona egjiptiane
Ka qenë ora 15:00 e pasdites së djeshme, kur dy mesfushorët e Tiranës, Ervin Bulku dhe Ansi Agolli, kanë prekur Aeroportin "Nënë Tereza". Të nisur në orët e para të mëngjesit të djeshëm me linjën ajrore Kajro-Stamboll-Tiranë, të dy lojtarët kanë mbërritur shëndoshë e mirë pas 7 ditësh stërvitje në Egjipt. Thirrja e trajnerit të kombëtares kuqezi Brigel për turneun miqësor të Portugalisë ua ndërpreu në mes përgatitjet në vendin e piramidave dy futbollistëve të talentuar bardheblu. Ata tashmë do të stërviten nën kontrollin e gjermanit për dy ndeshjet që përfaqësuesja do të luajë më datat 20 dhe 22 janar. Ervin Bulku, ish-kapiteni i ekipit Shpresa në eliminatoret e fundit të evropianit, në një deklarim për "Sportin shqiptar" rrëfen ditët e stërvitjes egjiptiane. Ai bën të ditur se çdo gjë në Port-Said, por edhe në Kajro, shkoi sipas parashikimeve. "Për 7 ditë jemi stërvitur në Egjipt në kushte komode, madje zhvilluam dy ndeshje miqësore, të cilat i fituam 2-1 dhe 3-2. Trajneri Josa ka punuar me ne shumë, sidomos në planin fizik, për të qenë plotësisht të gatshëm në fazën e mbetur të sezonit. Edhe pse kanë mbetur disa ditë stërvitje, me bindje mund të them se deri tani është bërë një punë e mirë në skuadër dhe përgatitjet janë në rrugë të mbarë,"- thotë 22-vjeçari.
Tirana, deri tani, ka luajtur dy takime miqësore, ndaj Ruandës dhe El Shemsit, të cilat i ka fituar me lojë dhe rezultat bindës. Ndërkohë, të dielën do të luajë miqësoren e fundit përpara nisjes për në Shqipëri. Ervin Bulku ka qenë në formacionin bazë në të dy këto ballafaqime. Ja sesi i komenton ai: "Kur ishim në Port-Said luajtëm një miqësore ndaj kombëtares së Ruandës, të cilën e fituam 2-1. Gjatë gjithë lojës kemi qenë në epërsi 2-0, ndërkohë që ruandezët shënuan gol kur kishim mbetur me 10 veta, pas largimit me karton të kuq të Tafajt. Ndërsa për ndeshjen e ditës së enjte me El Shemsin në Kajro, e ndryshuam modulin e lojës sonë dhe pjesën e parë e mbyllëm 3-0, me dy gola të Fortuzit dhe Xhafës. Pjesa e parë qe shumë e mirë për ne, ndërkohë që në të dytën lëshuam terren, ndoshta të kënaqur nga ajo që dhamë në fushë në fillim të lojës. Gjithsesi, dua të them se Tirana nga dita në ditë po e konsolidon formacionin dhe trajneri është i kënaqur me ne. Tani na mbetet ta tregojmë veten në kampionat, por edhe në kupë,"- thotë "Uku". Në fund të deklarimit, Ervin Bulku komenton edhe grumbullimin e tij nga trajneri Hans Peter Brigel në kombëtaren B për dy miqësoret e radhës. "Për mua është kënaqësi që trajneri Brigel vazhdon të më ketë në konsideratë edhe pas kalimit të moshës me ekipin Shpresa, duke më thirrur në skuadër. Dua që t'ia shpërblej besimin e tij në këto dy miqësore dhe në fund ndoshta të marrim rezultate pozitive,"- i jep fund deklarimit të tij mesfushori me tipare shkatërruese.

Location/Vendndodhja: England

A ju pelqen kjo faqe? Po