Sulmuesi ishte i vetmi lojtar që s'iu bashkua skuadrës në Egjipt për shkak të provimeve në shkollën e lartë
Halili: S'kam mbetur prapa shokëve

Mahir Halili, sulmuesi kryesor i Tiranës, është futbollisti i vetëm që nuk i është bashkuar skuadrës për minifazën përgatitore që po zhvillon në Egjipt. Arsyeja tashmë dihet: shlyerja e provimeve në Fakultetin e Mjekësisë, dega farmaci, më datat 9 dhe 14 janar. Megjithatë, për asnjë moment, kryegolashënuesi i kampionatit të kaluar (20 gola) nuk e ka ndërprerë stërvitjen individuale. Sipas një plani të detajuar nga trajneri Mirel Josa, përpara nisjes për në tokën e piramidave, Mahiri, prej 7 ditësh, po stërvitet në fushë, por edhe në sallë force. Ai është i bindur se do të jetë në të njëjtin nivel përgatitjeje me shokët, të cilët pritet të kthehen të hënën nga Kajro. Në një deklarim për "Sportin shqiptar", 29-vjeçari shprehet: "Që kur Tirana është larguar për në Egjipt, prej afro një jave jam duke u stërvitur individualisht si në stadiumin "Selman Stërmasi", por edhe në sallë force. Përpara nisjes, trajneri Josa më dha një plan stërvitjeje, të cilin jam duke e zbatuar me rigorozitet. Besoj se kur të kthehen shokët nga Egjipti, nuk do të kem mbetur prapa si në përgatitjen fizike, ashtu edhe në atë tekniko-taktike,"- bën të ditur "Këpuca e artë" e sezonit të kaluar.
Duke lënë mënjanë stërvitjen, Halili, në deklarimin e tij flet edhe në lidhje me pretendimet e ish-klubit të Hit Goricës, më të cilin ka luajtur përpara 5 vjetësh. Pas faksit të dërguar përpara 10 ditësh nga drejtuesit sllovenë, në të cilin pretendohej se klubi "Tirana" dënohej me gjobën prej 60 mijë eurosh për mbajtje të lojtarit nën kontratë, ka qenë i menjëhershëm reagimi i dibranit. Mahir Halili vazhdon të pretendojë se me Goricën nuk e lidh asnjë lloj kontrate, sepse ai klub e ka ****ur te Delemonti. "Siç është bërë e ditur prej dy javësh, klubi i Hit Goricës kërkonte të më gjobiste me 60 mijë euro, duke pretenduar se kam thyer kontratën me të. Kjo faktikisht nuk është e drejtë, sepse nga ai klub jam larguar përpara katër vjetësh për te Delemonti, në Zvicër, i cili i shleu të gjitha detyrimet. Më pas, prej andej erdha te Tirana, ku presidenti El Sajed bleu kartonin tim për 20 mijë dollarë nga zviceranët. Detyrimisht, unë s'kam asnjë lidhje me sllovenët, të cilët, pas kaq shumë kohësh, ngrihen dhe kërkojnë të rrëmbejnë ndonjë të hollë. Pas faksit të tyre, klubi "Tirana" menjëherë u ka kërkuar drejtuesve të Goricës të na sjellin kopjen origjinale të kontratës për të vërtetuar gjithçka. Por me sa shoh, deri tani, asgjë nuk ka mbërritur, sepse kjo ishte vetëm një "tullumbace" e tyre, ndoshta për të na frikësuar dhe për të paguar 60 mijë eurot,"- thotë numri 14 i bardhebluve. Kjo do të thotë se tashmë Federata Shqiptare e Futbollit nuk mund ta pezullojë kurrsesi lojtarin nga aktiviteti, siç u aludua fillimisht.
Në fund të komentit, Halili flet edhe për objektivat personalë dhe ato të skuadrës në përgjithësi. Ai është i bindur se në fund të edicionit, Tirana do të bëjë bis trofesh, ndërkohë që veten e quan jashtë "luftës" për fitimin e "Këpucës së artë". "Synimet e Tiranës çdo sezon janë të qarta, pra shpallja kampione e vendit dhe fitimi i Kupës së Shqipërisë. Besoj se kemi për të arritur që në fund t'i pronësojmë këto dy trofe, sepse ndeshjet direkte kanë treguar se jemi një shkallë më lart se kundërshtarët. Ndërsa për vete shpresoj të shënoj gola sa më të rëndësishëm, që t'i japin skuadrës tri pikët dhe jo mua kurorën e kryegolashënuesit,"- përfundon idenë e tij sulmuesi kryesor i kampionëve në fuqi, Mahir Halili.

Location/Vendndodhja: England

A ju pelqen kjo faqe? Po