Fantazisti bardheblu, nga vendi i piramidave, premton se do të shënojë edhe një herë sa deri tani
Muka: Unë, "mister" 20-golëshi

Tirana-Muka ka qenë binomi i pandarë i dy fazave të para të kampionatit, që i pa bardheblutë të marshonin të qetë drejt titullit simbolik, kampionë të dimrit. Vlonjati, me 10 golat e sigluar, theu çdo parashikim (golat më të shumtë priteshin nga Fortuzi, Halili, Xhafa dhe Merkoçi) dhe tashmë e sheh veten golashënuesi më i mirë i kampionatit, së bashku me Abilion. Edhe pse Devi Muka, në pjesën më të madhe të ndeshjeve, ka luajtur në rolin e fantazistit të tërhequr pas dy sulmuesve, intuita dhe klasi i tij kanë qenë vendimtarë në ecurinë e Tiranës për 18 ndeshje. Në merkaton e dimrit, që ka pak ditë që është hapur, mesfushori i kombëtares kuqezi ishte një ndër emrat më të lakuar për t'u larguar nga kampionët. Faktikisht ndodhi e kundërta, sepse ai hodhi poshtë çdo supozim dhe aktualisht ndodhet me ekipin në fazë përgatitore në Egjipt. Bardheblutë, prej 4 ditësh, po stërviten në Port-Said në kuadrin e përgatitjeve për pjesën e mbetur të sezonit. Ndonëse vjen nga një dëmtim në kofshë në derbin me Dinamon, vetë Muka bën të ditur se çdo gjë e ka hedhur pas krahëve dhe po stërvitet maksimalisht. Në një deklarim për "Sportin shqiptar", 27-vjeçari ndihet i kënaqur me kushtet e krijuara në kompleksin sportiv të qytetit të Port-Saidit dhe nëpërmjet linjës telefonike premton se në fund të kampionatit do të mundohet të arrijë kuotën e 20 golave gjithsej. "Prej katër ditësh jemi sistemuar në një prej hoteleve luksozë të Port-Saidit dhe po stërvitemi maksimalisht në terrenet shumë të mira që na janë vënë në dispozicion. Në dispozicion të trajnerit Josa jemi i gjithë grupi i lojtarëve që mbyllëm vitin 2003, me përjashtim të Halilit. Me aq sa po shoh, të tërë çunat kemi shfaqur një formë të mirë fizike, çka e lejon stafin drejtues të punojnë normalisht me ne,"- thotë "dirigjenti" i mesfushës bardheblu.
Sipas Mukës, takimet miqësore që do të luhen në Egjipt do të shërbejnë për kolaudimin sa më të mirë të formacionit bazë. Sot pasdite, kampionët do të ndeshen me kombëtaren e Ruandës, e cila po kryen fazën përgatitore në Port-Said në kuadrin e përgatitjeve për Kupën e Afrikës. "Sot kemi planifikuar që të luajmë një ndeshje miqësore me kombëtaren ruandeze, e cila, ashtu si ne, po kryen një minifazë përgatitore në Egjipt. Shpresojmë të zhvillojmë një lojë të mirë dhe më pas të kërkojmë të fitojmë, ndonëse e dimë që nuk do të jetë e lehtë. Ndërkohë, derisa të kthehemi, kemi planifikuar edhe dy miqësore të tjera, të cilat mendoj se kanë për të na dhënë një ide më të saktë se në çfarë pike ndodhemi,"- gjykon numri 10 i Tiranës. Në lidhje me merkaton e dimrit, Devi Muka bën të ditur se skuadra nuk ka nevojë për përforcime. "Për mua, ky grup futbollistësh që jemi është i mjaftueshëm deri në fund të sezonit për të arritur synimet. Jemi 19 lojtarë, me afro të njëjtën përgatitje, ndaj konkurrenca brenda nesh është e madhe për një vend në 11-she. Gjithsesi, janë drejtuesit më të lartë, të cilët e shohin me syrin e specialistit nëse ka reparte ku duhet ndërhyrë në merkato,"- komenton ai.
Në fund të deklarimit, vlonjati shprehet se ka disa synime për vitin 2004 që kërkon t'i arrijë më çdo kusht. Ja sesi i zbulon ai: "Synimi im kryesor është që të shpallem kampion, por edhe të fitoj Kupën e Shqipërisë. Por "qershia mbi tortë" është që të shënoj 20 gola dhe të fitoj "Këpucën e artë", ashtu siç bëri Mahir Halili në kampionatin e fundit. Deri tani, gjysmën e punës e kam bërë. Tanimë s'më mbetet gjë tjetër veçse ta provoj deri në fund, se, ku i dihet, ndoshta shpallem edhe unë një herë golashënues, "- i jep fund idesë së tij "labi fluturues", Devi Muka.

Location/Vendndodhja: England

A ju pelqen kjo faqe? Po