Mesfushori me tipare shkatërruese gjykon se Tirana, pas kthimit nga Egjipti, do të jetë më kompetitive
Ervin Bulku: Ka vend për përmirësime
Është vetëm 22 vjeç dhe prej 5 sezonesh kontribuon me sukses në ekipin e parë të Tiranës. I dalë nga ekipet zinxhirë bardheblu, mesfushori Ervin Bulku konsiderohet një nga talentet e futbollit tiranas, por edhe atij shqiptar për vetë vlerat që mbart. Tashmë që i ka skaduar mosha për të qenë pjesë e ekipit Shpresa si kapiten i saj, Bulku (i vogël në moshë, por i madh në trup në krahasim me Sokolin) kërkon ta përqendrojë vëmendjen tërësisht te Tirana. Edhe pse vjen pas një dëmtimi të gjatë në gju, duket se Ervini e ka kapur formën fizike, çka e ka detyruar trajnerin Josa t'i besojë fanellën e titullarit. Në rolin e mesfushorit të qendrës, së bashku me Patushin, Bulku përbën dyshen më të fortë të mesfushës në kampionatin shqiptar. Numri 8 i kampionëve ndihet i lumtur që viti 2004 e sheh të riaftësuar dhe njëkohësisht Tiranën kampione të dimrit.
Në një deklarim për "Sportin shqiptar", mesfushori flet për stërvitjen që po zhvillohet në Turqi dhe objektivat për Vitin e Ri. "Pas mbërritjes në Port-Said, kemi nisur intensivisht përgatitjet për dy fazat e mbetura të kampionatit. Deri tani, në dispozicion të trajnerit jemi i gjithë grupi i lojtarëve që mbyllën vitin 2003, me përjashtim të Sokol Bulkut dhe Mahir Halilit,"- thotë 22-vjeçari. Ervini gjykon se 10 ditët stërvitje në vendin e piramidave do t'i shërbejnë skuadrës për t'u përmirësuar në planin fizik dhe atë tekniko-taktik. "Ditët e stërvitjes në Egjipt do të na shërbejnë për t'u përmirësuar akoma më shumë, kjo sepse në skuadër ka vend edhe për më mirë. Të gjithë po stërvitemi me dëshirë që, kur të kthehemi, të paraqesim në fushë vlerat e ekipit kampion dhe absolut të Shqipërisë,"- bën të ditur mesfushori. Më pas, në deklarimin e tij, Bulku jep opinionin e tij në lidhje me vitin që lamë pas dhe atë që sapo ka nisur. Sipas tij, 2003-shi ishte vit që në përgjithësi është karakterizuar nga dëmtimet, por që u kurorëzua me titullin e 20-të kampion. "Viti 2003, për mua, në aspektin personal, nuk ishte me shumë fat, sepse jam dëmtuar dy herë dhe kam mbetur jashtë fushave disa muaj. Ndërkohë, për skuadrën, çdo gjë shkoi mirë, sepse ne u shpallëm kampionë të vendit dhe kaluam një tur në kupat evropiane. Nga viti 2004 do të kërkoja sa më shumë shëndet dhe fat, duke fituar edhe dy trofetë kombëtare me Tiranën, siç janë kampionati dhe Kupa e Shqipërisë. Natyrisht, si për këdo, ëndrra e madhe mbetet kombëtarja kuqezi, me të cilën jam aktivizuar vetëm në disa ndeshje miqësore. Shpresoj që për eliminatoret e botërorit të ardhshëm të jem pjesë e saj dhe ta fitoj një vend falë djersës që derdh çdo ditë në stërvitje me Tiranën,"- i jep fund idesë së tij mesfushori, Ervin Bulku.

Location/Vendndodhja: Tirane

A ju pelqen kjo faqe? Po