Trajneri i kampionëve shpalos synimet e skuadrës për 10 ditë stërvitje që do të zhvillojë në Egjipt
Ja "misteret" e bardhebluve në Kajro

Skuadra e Tiranës i ka dhënë dje fund stërvitjes së saj në kryeqytet dhe sot në mesditë do të udhëtojë drejt Egjiptit, ku për 10 ditë do të kryejë një minifazë përgatitore. Edhe pse problemet nuk kanë reshtur ditët e fundit në kampin bardheblu (është shtyrë dy herë nisja drejt Kajros), duket se delegacioni me futbollistë dhe stafin drejtues do të jetë i plotë. Trajneri i 20 herë kampionëve, Mirel Josa, e ka hartuar planin stërvitor që do të kryejë në vendin e piramidave dhe këtë e shpreh në deklarimin e tij përpara nisjes. Sipas Josës, Tirana udhëton në drejtim të Egjiptit për t'u stërvitur në kushte më optimale sesa këto që janë në kryeqytet. "Në Egjipt shkojmë për t'u stërvitur në kushte më të mira sesa këto që janë aktualisht në Tiranë. 10 ditë stërvitje që do të zhvillojmë aty, nuk mund t'i quaj fazë të mirëfilltë përgatitore, por ajo bën pjesë në kuadrin e konsolidimit të skuadrës,"- thotë tekniku bardheblu. Karakteri i stërvitjes që do të aplikohet në Kajro, qytet ku do të sistemohen kampionët, do të jetë i ndërthurur. Një gjë të tillë e pohon vetë Josa në vazhdim të komentit të tij. "Në Kajro, synimi im kryesor do të jetë që skuadra ta marrë si duhet ngarkesën, si në planin fizik, ashtu edhe në atë tekniko-taktik. Edhe pse në këto të dy parametra lojtarët kanë treguar nivel të mirë gjatë kësaj kohe që unë jam në krye, do të vazhdoj të insistoj që të përmirësohemi ende. Në ekip ka vend për më shumë dhe të gjithë djemtë i kryejnë me pasion përgatitjet."
Tirana e dy fazave të tjera të kampionatit duket se edhe pas kthimit nga Egjipti nuk do të ketë ndryshime thelbësore për sa i takon modulit të lojës. Njëshi i stolit bardheblu bën të ditur se në skuadër nuk do të bëhen ndryshime të mëdha, por do të konsolidohet ai formacion që pak a shumë është hedhur në fushë kohët e fundit. "Nuk do të bëjmë ndryshime për sa i takon modulit të lojës, por do të përpiqemi të konsolidojmë si duhet 11-shin bazë për ecurinë e edicionit në vazhdim. Koha që është në dispozicion nuk të lejon shumë për eksperimentime, kështu që unë besoj se më shumë përparësi do t'i jepet përgatitjes shumëplanëshe,"- vijon më tej deklarimin e tij ish-lojtari i Tiranës në vitet '80-'90.
Për sa i takon merkatos së dimrit, trajneri Mirel Josa sqaron se në skuadër afrimi i elementëve të rinj varet nga ata që mund të largohen. "Me gjendjen aktuale të lojtarëve që kemi në dispozicion, mendoj se ata janë të mjaftueshëm për ta përballuar si duhet sezonin, ndaj nuk kemi pse të futemi në merkato. Ditët e fundit na janë afruar shumë emra për të ardhur në skuadër, por çdo gjë do të varet nëse do të largohen disa prej lojtarëve të diskutuar për të shkuar jashtë shtetit. Mëdyshja e deritanishme është ajo e Sokol Bulkut, i cili ka shkuar në Turqi për t'u provuar, ndërkohë që Saimir Patushin do ta kemi në ekip edhe në vazhdim, sepse është rikthyer nga Austria. E vetmja mungesë në Kajro do të jetë ajo e Halilit, i cili ka për të dhënë disa provime për shkollën e lartë. Megjithatë, ai do të stërvitet individualisht sipas një plani stërvitor,"- i ka dhënë fund komentit të tij ish-zëvendëstrajneri i kombëtares kuqezi, Mirel Josa.
Tirana, sot nisja drejt vendit të piramidave
Më në fund, skuadra e Tiranës do të niset sot drejt Egjiptit. Pas disa problemeve në skuadër, për sa u takon lëvizjeve të disa prej lojtarëve, kampionët, në orën 12:00, do të udhëtojnë drejt Aeroportit "Nënë Tereza". Në orën 14:30, me avionin e linjës "Turkish Airlines", delegacioni bardheblu do të përshkojë itinerarin Tiranë-Stamboll-Kajro. Në qytetin e fundit bardhebluve u janë krijuar të gjitha kushtet, duke filluar nga hoteli me 5 yje dhe deri te fushat e stërvitjes. Nga ajo që mësohet brenda kampit, në Egjipt do të zhvillohen edhe dy ndeshje miqësore, ndërkohë që kthimi do të bëhet më 19 janar. Ja lista e plotë e lojtarëve dhe e stafit drejtues që do të nisen sot: Mirel Josa, Luan Zengla, Gud Tafaj (trajnerë), Eduard Gjini (administrator), Altin Haxhia (masazhator), Emanuel Egbo, Isli Hidi, Nevil Dede, Gentian Hajdari, Luan Pinari, Rezart Dabulla, Alban Muça, Suad Lici, Saimir Patushi, Ervin Bulku, Sokol Bulku (mund të bashkohet me skuadrën në Kajro), Ansi Agolli, Elvis Sina, Alban Tafaj, Sokol Prenga, Devi Muka, Fjodor Xhafa, Indrit Fortuzi dhe Eldorado Merkoçi.

Location/Vendndodhja: Tirane

A ju pelqen kjo faqe? Po