Ish-dinamoviti, nga mbrojtës krahu po luan me sukses edhe në qendër të prapavijës, duke i dhënë siguri ekipit
Hajdari: Në qendër kam gjetur veten
Ardhja në krye të Tiranës e trajnerit Mirel Josa ka korresponduar me disa ndryshime në formacion, në krahasim me paraardhësin e tij, Sulejman Mema. Tri janë zëvendësimet e teknikut aktual: në vend të Agollit, Xhafës dhe Pinarit, po luajnë Bulku, Halili dhe Hajdari. Ky i fundit, nga stoper (roli i tij i zakonshëm), është kthyer në qendërmbrojtës, duke i dhënë siguri Tiranës në prapavijë pas largimit të Alimehmetit dhe Vatës. Një nga pikat nevralgjike të bardhebluve në 2 vitet e fundit ka qenë pikërisht ajo e lojtarit të fundit në mbrojtje. Të shumtë kanë qenë futbollistët që e kanë provuar këtë rol, por duket se Gentian Hajdari është "i fundmi i Mohikanëve". Ish-dinamoviti, në fazën e dytë, ka treguar vendosmëri dhe sedër në këtë repart falë edhe bashkëpunimit të tij me dy mbrojtësit e tjerë, Dede dhe Dabulla. Një gjë të tillë Hajdari e pohon edhe vetë, kur në një koment për "Sportin shqiptar" shprehet: "Në karrierën time si futbollist kam provuar të luaj në shumë role në mbrojtje, por edhe në mesfushë. Ai i stoperit ka qenë roli im natyral, por kohët e fundit, pasi është afruar skuadër, trajneri Josa më ka dhënë besimin të luaj në qendër si lojtari i fundit përpara portierit. Një gjë të tillë e bëra edhe për disa ndeshje sezonin e kaluar, kur trajner ishte Fatmir Frashëri, dhe me bindje mund të them se tashmë në këtë rol kam gjetur veten,"- bën të ditur 27-vjeçari. Për Gentian Hajdarin, të dy rolet në mbrojtjen me tre lojtarë të Tiranës ndryshojnë nga njëra-tjetra për sa i takon rrezikshmërisë. Ja sesi e shpjegon ai ndryshimin që ndien nga një rol te tjetri: "Qendërmbrojtësi, ndryshe nga stoperi, ka një specifikë tjetër, se je lojtari i fundit para portierit dhe duhet të spastrosh të gjitha topat në zonë. Gabimi më i vogël rezulton fatal për fatet e ndeshjes, sepse ndryshe me lojtarët e tjerë, duhet të jesh më i vëmendshëm gjatë gjithë 90 minutave. Eksperienca në këto vite që luaj më ka krijuar besim në vetvete dhe tanimë ndihem mirë në këtë rol, por dua të falënderoj edhe trajnerin Josa për besimin që ka ndaj meje,"- thekson numri 16 i kampionëve. Prej dy ditësh, bardheblutë kanë rifilluar stërvitjen përpara nisjes për në Egjipt për të kryer fazën përgatitore. Shpallja kampionë të dimrit dhe katër ditët pushime duket se i kanë dhënë frymëmarrjen e duhur të gjithë lojtarëve për ta nisur vitin 2004 sa më vrullshëm. Një gjë të tillë e pohon edhe vetë mbrojtësi luftarak, kur shprehet: "Shpallja kampionë të dimrit dhe disa ditë pushim ka sjellë te ne një gjendje harmonie dhe relaksi. Tashmë ndihemi të freskët fizikisht për të nisur mbarë fazën përgatitore, si dhe ndeshjet e ardhshme të kampionatit dhe të kupës. Brenda ekipit ekziston klima e duhur se edhe ky edicion do të flasë për ngjyrat bardheblu. Jemi të ndërgjegjshëm se na presin sfida edhe më të forta se këto që kemi kaluar, por ne nuk ndalemi në objektivat tona. Duhet që këtë sezon medoemos, përveç titullit kampion, të bëjmë tonën edhe Kupën e Shqipërisë, trofe të cilin s'e fituam dot vjet. Nga afër ndiejmë praninë e disa rivalëve direktë, si Partizani dhe Dinamo, por nga "lufta" nuk do të përjashtoja as Teutën me Vllazninë, të cilat mund të të krijojnë kurdoherë probleme,"- përfundon deklarimin e tij qendërmbrojtësi bardheblu, Gentian Hajdari.
Rënia e avionit, panik në radhët e bardhebluve
Rënia e avionit Boing 737 në Detin e Kuq, në Egjipt, dy ditë më parë, ka ngjallur njëfarë paniku në radhët e skuadrës së Tiranës, e cila po përgatitet për të kryer fazën përgatitore në këtë shtet. Siç dihet, kampionët do të nisen në drejtim të vendit të piramidave më datë 7 janar për t'u stërvitur për dy javë, por nga muhabetet që ata bëjnë të ulur nëpër kafenetë e kryeqytetit, tema e diskutimit është pikërisht rënia e avionit. Tashmë tek ata, ashtu si te çdo person tjetër, ekziston frika, megjithatë drejtuesit e skuadrës pohojnë se do të nisen ditën e mërkurë drejt Kajros. Për sa i takon stërvitjes së djeshme, ajo është zhvilluar pasdite në fushën "Skënder Halili", ku me përjashtim të Patu**** (ndodhet në Austri) kanë qenë të gjithë të pranishëm. Trajneri Mirel Josa po punon me të tijtë në aspektin fizik, duke kërkuar që forma e tyre të ngrihet sa më shumë për të qenë të gatshëm në fazën përgatitore. Sot, drejtuesit më të lartë të ekipit do të marrin në Ambasadën Egjiptiane vizat përkatëse për nisjen që do të bëhet ditën e mërkurë.

Location/Vendndodhja: Tirane

A ju pelqen kjo faqe? Po