Fantazisti ka festuar dje 27-vjetorin e lindjes dhe shprehet i lumtur për golin e 10-të sezonal të shënuar
Muka: Derbi, dhurata ideale për ditëlindje

Nuk ka më mirë sesa ta festosh ditëlindjen me një gol dhe një fitore të rëndësishme në derbi, si ajo që realizoi Tirana të shtunën 5-1 ndaj Dinamos. Kjo i ka takuar njërit prej lojtarëve më të mirë të kampionatit shqiptar, siç është mesfushori Devi Muka, i cili dje ka mbushur 27 vjeç. I lindur në qytetin e Vlorës, më datë 21 dhjetor 1976, Muka është kthyer në idhullin e tifozerisë bardheblu për golat dhe lojën virtuoze që zhvillon. Falë këmbëve të tij, Tirana ka fituar dy tituj kampionë në vitet 1998-1999 dhe 2002-2003 dhe tashmë në këtë sezon kërkon të bëjë tris. Në fitoren e fundit në derbi 5-1 me blutë, Muka, me penallti, shënoi golin e 10-të sezonal dhe sërish për javën e 17-të e sheh veten në krye të golashënuesve më të mirë. Një fakt domethënës është se vlonjati bardheblu u ka shënuar gola të gjitha skuadrave, me përjashtim të Teutës dhe Elbasanit, skuadra me të cilat Tirana ka koleksionuar humbje dhe barazim. Pra, shprehja se "sa herë Muka shënon, Tirana fiton", nuk është realizuar vetëm në këto dy ndeshje. Gjithsesi, fantazisti ka besim se në ndeshjet e ardhshme ka për t'u shënuar portokallinjve dhe "djemve të detit". Në lidhje me derbin ndaj Dinamos, numri 10 i kampionëve shprehet i kënaqur, sepse 27-vjetorin e lindjes e ka festuar me një gol dhe një fitore. "Ndeshja derbi me Dinamon ishte dhurata ideale për 27-vjetorin e lindjes që festova dje. Jam i kënaqur jo vetëm se fituam thellë, por edhe se shënova vetë një gol. Madje për këtë dua të falënderoj të gjithë shokët për kontributin që dhanë në atë 90-minutësh të vështirë,"- thotë mesfushori organizator. Për Tiranën, tri pikët ndaj Dinamos ishin shumë të nevojshme për t'u rrëmbyer, për vetë renditjen që ka në krye të klasifikimit. Kjo u pa që në fillim të lojës, ku trajneri Josa kishte vendosur të ndryshonte skemë, duke luajtur me tre sulmues. Kjo solli që Muka të luante në rolin e tij ideal, pas dy sulmuesve, duke marrë përsipër gjithë organizimin e manovrës sulmuese. "Me dinamovitët, bashkë me trajnerin, ramë dakord që të luaja në pozicionin tim të zakonshëm, atë të fantazistit, duke qenë se në tri ndeshjet më parë kisha luajtur si sulmues. Për mua, ky është pozicioni ku jap maksiumin, ndonëse më parë kisha preferuar të sakrifikoja për skuadrën. Ky kthim në identitet na dha të drejtë, sepse fituam bindshëm 5-1 ndaj një rivali direkt në luftën për titullin kampion. Ndryshe nga një javë më parë, tanimë e ndiejmë nga afër praninë e Partizanit,"- shprehet Devi. Për sa i takon lojës në tërësi, Muka bën të ditur se pas shënimit të dy penalltive dhe daljes me karton të kuq të Pishës, çdo gjë më pas kishte përfunduar. "Me sa pashë në fushë, por edhe në televizor, të dyja penalltitë ishin të rregullta. Pisha e preku topin në të dy rastet me dorë dhe e meritonte kartonin e kuq, ndërkohë për ne gjërat më pas u bënë më të lehta. Ne arritëm të shënonim edhe tre gola të tjerë shumë të bukur, të cilët e zbukuruan këtë derbi të radhës, të fituar me meritë,"- i jep fund deklarimit të tij 27-vjeçari. Për kampionët në fuqi, shpallja "kampionë të dimrit" tashmë është vetëm një hap larg, sepse një barazim i mundshëm të mërkurën ndaj Elbasanit do të thoshte mbyllje e vitit 2003 në krye të klasifikimit.
Aurel CELIBASHI


Ja 9 ndeshjet ku Muka ka shënuar 10 gola
Lushnja - Tirana 0-6 23.08.'03
Flamurtari - Tirana 0-3 30.08.'03
Shkumbini - Tirana 1-3 20.09.'03
Tirana - Vllaznia 3-2 27.09.'03
Tirana - Flamurtari 2-1 07.11.'03
Besa - Tirana 1-2 19.11.'03 (dygolësh)
Tirana - Shkumbini 5-2 22.11.'03 (penallti)
Tirana - Partizani 1-0 06.12.'03
Tirana - Dinamo 5-1 20.12.'03 (penallti)

"Labi", urimet s'kanë të sosur
Kanë qenë të shumta urimet që ka marrë Devi Muka dje në 27-vjetorin e lindjes. Familjarët kanë qenë të parët që e uruan, ndërkohë që më pas shoqëria dhe telefonatat nga të afërmit jashtë kryeqytetit nuk munguan. Si fillim, Muka me disa prej shokëve të tij të ngushtë dhe të skuadrës ka festuar në një prej lokaleve të Tiranës, ndërkohë që pasdite ka qenë me familjen. Gjithçka për të kaloi gëzueshëm, sidomos pas fitores në derbi ndaj Dinamos. Një urim merr Devi Muka edhe nga redaksia e "Sportit shqiptar": U bëfsh 100 vjeç!

Location/Vendndodhja: England

A ju pelqen kjo faqe? Po