Goleadori bardheblu s'i kapërdin dot daljet e shpeshta nga loja që tekniku Josa ka aplikuar në ndeshjet e fundit
Fortuzi: Zëvendësimet? Të paragjykuara
Kur të gjithë në kampin bardheblu kanë arsye të gëzojnë pas fitores në derbi me Partizanin, një nga liderët e skuadrës, siç është golashënuesi i njohur Indrit Fortuzi, ndihet i shqetësuar. Arsyeja ka të bëjë me zëvendësimet e shpeshta, që trajneri Mirel Josa ka aplikuar ndaj "Zogut" në takimet e fundit, që kur ndodhet në krye të skuadrës. Shkëndija e parë ka ardhur kur Indriti, pasi është zëvendësuar dhe nuk është ulur në stol, por ka rendur i mërzitur në dhomat e zhveshjes, ka qenë në ndeshjen me Flamurtarin në stadiumin "Selman Stërmasi". I pyetur atëherë nga gazeta, Fortuzi, me diplomaci, pati deklaruar se zëvendësimi ishte normal, ndërkohë që nga përbrenda e ndiente se diçka nuk shkonte dhe shpresonte se kjo që po ndodhte do të ishte vetëm rastësi. Kur ka kaluar edhe një muaj dhe e njëjta situatë po përsëritet, 30-vjeçari ka vendosur të shprehë atë që bluan prej ditësh. Ka qenë minuta e 60-të në derbin me të kuqtë, kur Indriti ka lënë fushën, i zëvendësuar nga Halili. Menjëherë ai u pre në fytyrë kur pa që tabela elektronike tregonte numrin 11 që duhet të dilte nga fusha. Megjithatë, si profesionist, ai ka dalë heshturazi prej andej. Me kokën ulur, Indriti menjëherë u është drejtuar dhomave të zhveshjes, ndërkohë që Josa e priste që t'i jepte dorën. Këtu e ka zanafillën edhe deklarata e fundit për "Sportin shqiptar" e goleadorit bardheblu, i cili ka vendosur të flasë hapur për zëvendësimet e shpeshta që po i ndodhin. "Nuk e kuptoj, por zëvendësimet e shpeshta të kohëve të fundit më duken të paragjykuara. U bënë disa ndeshje radhazi që trajneri Josa po më zëvendëson të parin. Sigurisht, në momente të veçanta, ka raste që duhet të zëvendësohem, por jo gjithmonë. Aktualisht e ndiej që po kaloj një formë të mirë dhe dua që atë ta vendos në shërbim të skuadrës për të arritur objektivat,"- thotë një nga sulmuesit më të shquar të Tiranës ndër vite. I pyetur nëse ekziston ndonjë krisje në marrëdhënieve ndërmjet tij dhe Josës, sulmuesi është përgjigjur: "Jo, s'ka pse të ketë krisje marrëdhëniesh ndërmjet nesh. Të dy kemi role të ndryshme në ekip, por me një qëllim të vetëm, suksesin për fanellën e Tiranës. I gjithë diskutimi është se mua më është krijuar bindja e një lloj paragjykimi, madje përpara fillimit të ndeshjes, se do të zëvendësohem. Kjo ndoshta mund të më ngacmojë psikologjikisht për keq në lojën time. Shpresoj që në të ardhmen një fenomen i tillë, nëse mund ta quaj kështu, të mos më ndodhë më,"- vazhdon komentin e tij sulmuesi i kampionëve. Për sa i takon ecurisë së Tiranës në këto javët e fundit, Indriti nuk ka preferuar të flasë fare dje, duke u futur në dhomat e zhveshjes për t'u përgatitur për stërvitjen e radhës.

Gripi "pushton" bardheblutë
Pasditja e djeshme e ka gjetur sërish Tiranën në fushën e saj të stërvitjes. Në orën 14:00, në "Skënder Halili", të gjithë futbollistët dhe stafi drejtues nisën ditën e dytë të punës në lidhje me organizimin e ndeshjes së radhës me Teutën. Nga ajo që u pa në seancat e djeshme, një pjesë e futbollistëve po kalonin një gjendje gripale. Ishin pikërisht Mahir Halili, Sokol Bulku, Ervin Bulku, të cilët, edhe pse me temperaturë, qenë bashkë me skuadrën. I vetmi që dje nuk u stërvit, ishte portieri Isli Hidi, i cili punoi pak në palestër, duke qenë se ka një tërheqje të lehtë në kofshën e djathtë. Nga stërvitja e djeshme, tekniku Josa punoi në aspektin taktik me djemtë, duke qenë se nesër do të ketë ndeshjen e kontrollit. Shqetësimi i tij për përballjen me Teutën do të jenë mungesat e Dabullës dhe Sinës, të skualifikuar me kartonë.

Location/Vendndodhja: England

A ju pelqen kjo faqe? Po