Stoperi bardheblu ishte nismëtari i fitores 3-1 ndaj Vllaznisë, me golin e parë të shënuar në portën e Grimës
Dabulla: Në "Loro Boriçi" fituam me zemër
Të shënosh gol është kënaqësi, por ta bësh një gjë të tillë në "Loro Boriçi" përballë 12 mijë shikuesve është ëndërr për çdo futbollist. Rezart Dabulla duket se e ka prekur këtë realitet, falë golit me kokë të shënuar në fitoren 3-1 të Tiranës ndaj Vllaznisë. Mbrojtësi bardheblu e ka hapur serinë e golave për skuadrën e tij që në minutën e 11-të të takimit, kur pas një ekzekutimi perfekt të Mukës nga goditja e këndit, 24-vjeçari ka mundur ta shtyjë topin drejt rrjetës. Për Dabullën, ky është goli i tretë në këtë sezon, pasi më përpara kishte shënuar ndaj Besës në atë fitore 7-1 dhe ndaj Lushnjës pak javë më parë në takimin e parë të kupës. Përveçse është kthyer në një nga mbrojtësit e pakalueshëm të kampionatit, këtë vit Dabi (siç e thërrasin shokët), po kthehet edhe në një sulmues "të fshehur". Ai ndihet mirë që i shërben skuadrës si në prapavijë ashtu dhe në sulm dhe ka shumë besim në arritjen e objektivave. "Në "Loro Boriçi", ndaj shkodranëve, kemi fituar një ndeshje zemre. Që nga minuta e parë dhe deri tek e fundit u munduam të jepnim shpirtin në fushë, vetëm e vetëm që t'i rrëmbenim këto tri pikë të radhës me shkodranët,"- thotë Rezarti. Sipas tij, Tirana zhvilloi një nga lojërat e saj më të mira në këtë sezon, duke luftuar për çdo top të parë dhe duke i marrë hapësirën kundërshtarit. "Mendoj se ndaj kuqebluve kemi zhvilluar një nga lojërat më të bukura dhe rezultative në këtë kampionat. Luftuam për çdo top të parë dhe nuk i dhamë mundësi kundërshtarit të rrezikonte. Goli i shënuar prej meje që në minutat e para sikur na çliroi disi psikologjikisht, por më pas shkodranët, falë një goli të rrallë, na barazuan. Kjo nuk solli aspak rënie morale te ne, sepse në pushimin e pjesës së parë trajneri Josa ndryshoi diçka në vendosjen e lojtarëve në fushë. Jo vetëm që më pas kaluam në avantazh, por shënuam edhe një gol të tretë fantastik, siç ishte ai i Ervin Bulkut. Praktikisht, këtu i mbyllëm të gjitha hesapet me Vllazninë dhe arritëm të dilnim me kokë lart nga ai stadium i tejmbushur me tifozë, të cilët duhen përshëndetur për sfidën që i bënë shiut ta madh që ra,"- shprehet mbrojtësi luftarak. Në lidhje me ndryshimet në formacion, që trajneri Josa bëri në momentet e fundit para takimit, Dabulla shprehet se ato rezultuan të goditura. "Me shkodranët, trajneri kishte aplikuar një mënyrë loje, ku Muka do të luante sulmues i dytë pas Fortuzit dhe në mesfushë do të shtohej edhe një lojtar tjetër, siç ishte Tafaj. Pra, praktikisht, kemi luajtur me 5 mesfushorë e gjysmë, çka na jepte një favor edhe ne, mbrojtësve, pasi ndiheshim më të sigurt në markimin një për një të kundërshtarit. Këtu nuk duhet lënë pa përmendur edhe përgatitja e lartë fizike që kishim me futbollistët e Vllaznisë, që na dha më shumë përparësi,"- vazhdon idenë e tij Rezart Dabulla. Edhe për këtë javë të 14-të, Tirana e sheh veten sërish në krye të renditjes, me ndryshimin që kundërshtari më i afërt nuk është më Teuta, por Partizani. Të kuqtë do të jenë të shtunën përballë bardhebluve, në një sfidë që do të thotë shumë për ecurinë në vazhdim. I këtij mendimi është edhe stoperi i kampionëve, kur thotë: "Fitorja me Vllazninë na ka kënaqur të gjithëve, por duhet të qendrojmë me këmbë në tokë, pasi këtë të shtunë na pret një tjetër ndeshje e vështirë, siç është ajo me Partizanin. Duhet të ulim kokën dhe të punojmë me këto ritme, se deri tani jemi në rrugë të mbarë,"- përfundon deklarimin e tij mbrojtësi i palodhur.

Location/Vendndodhja: Tirane

A ju pelqen kjo faqe? Po