Kampionët u kanë dhënë dorën e fundit përgatitjeve për sfidën e sotme me kavajasit
Josa: Disiplina taktike, "çelësi" i fitores
Paraditja e djeshme për bardheblutë ka qenë e nxehtë, për sa u takon përgatitjeve për javën e 12-të të kampionatit. Në orën 11:30, në stadiumin "Selman Stërmasi", të gjithë lojtarët, duke përfshirë edhe stafin drejtues, zhvilluan seancën e fundit stërvitore në pragndeshjen e sotme ndaj Besës. Trajneri Mirel Josa, së bashku me dy asistentët e tij, Zengla-Tafaj, përpara fillimit të stërvitjes zhvilloi me të tijtë një analizë të shkurtër për sa i takon planit të stërvitjes, si dhe detyrave që futbollistët duhet të mbajnë mbi shpinë për këtë sfidë delikate të radhës. Sipas Josës, nëse ndaj kavajasve do të kërkohet fitorja, ajo do të arrihet vetëm falë një disipline të hekurt taktike. "Përballja me Besën, ashtu si të gjitha ndeshjet që kanë kaluar dhe që do të vijnë, ka rëndësi të madhe, pasi përmban në vetvete tri pikë të çmuara për ecurinë në vazhdim. Duhet medoemos të tregohemi të kujdesshëm ndaj kavajasve dhe të jemi shumë të disiplinuar taktikisht në fushën e lojës, sepse vetëm në këtë mënyrë mund t'i vëmë vendësit në vështirësi,"- u ka komunikuar trajneri bardheblu djemve të tij. Për teknikun e kampionëve, kjo do të jetë trasferta e parë në kampionat (ka luajtur një të tillë ndaj Lushnjës në Peqin për Kupën e Shqipërisë) dhe kërkon që ta realizojë më sukses. Madje ai e konsideron këtë ballafaqim me verdhezinjtë një nga ndeshjet më të vështira që kur është ulur në stolin e Tiranës. "Për mua, ky takim është nga më të vështirët që mund të parashikoj që kur jam në krye të Tiranës, për vetë traditën që ka Besa në futbollin shqiptar. Ajo do të luajë përballë shikuesve të saj të zjarrtë pas një periudhe të gjatë ndërprerjeje dhe do të jetë shumë e karikuar. Ky fakt duhet të na mobilizojë më shumë për të marrë tri pikët në këtë ndeshje të radhës, duke qenë se është e vetmja mënyrë për t'u shpallur kampionë,"- vazhdon idenë e tij ish-zëvendëstrajneri i kombëtares. Për sa u takon ndryshimeve në formacion, nga stërvitja e djeshme u pa qartë se dy do të jenë lëvizjet në krahasim me ndeshjen e kupës, të mërkurën ndaj Lushnjës. Kështu, në portë, do të rikthehet Isli Hidi, ndërkohë që vendin e Saimir Patu****, të skualifikuar për kartonë të verdhë, do ta zërë Sokol Bulku. Pjesa tjetër e skuadrës nuk do të ketë ndryshime.
Dje, bardheblutë, pas stërvitjes kanë pushuar disa orë në familjet e tyre dhe në orën 18:00 janë grumbullur të gjithë para stadiumit "Selman Stërmasi", ku më pas udhëtuan në drejtim të Shkëmbit të Kavajës. Mbrëmja e djeshme i ka zënë 20 herë kampionët buzë Adriatikut dhe pikërisht në hotelin "Tirana", në një grumbullim, i cili shërben për harmoninë dhe qetësinë e të gjithë lojtarëve përpara një takimi, që ndoshta mund të vlejë kryesimin.
Aurel CELIBASHI

Fortuzi, Xhafa dhe Patushi "falen" tek El Sajedi
Përpara stërvitjes së djeshme, tre prej futbollistëve të Tiranës kanë qenë të pranishëm në zyrën e presidentit Metuali El Sajed. Arsyeja ka qenë e thjeshtë, marrja e këstit të radhës, të cilën egjiptiani ua ka likuiduar menjëherë "kanakarëve" të tij. Vonesa e tre prej lojtarëve kryesorë në skuadër ka sjellë që stërvitja e djeshme e bardhebluve të shtyhej 30 minuta. Më pas, presidenti El Sajed i ka "bekuar" futbollistët për një fitore ndaj Besës dhe është nisur në drejtim të Egjiptit. Në vendin e piramidave, njëshi i kampionëve do të qendrojë 10 ditë, për shkak të disa impenjimeve të rëndësishme vetjake. Gjithsesi, ai u ka kërkuar njerëzve të tij më të afërt që ta informojnë minutë pas minute për takimin e sotëm të Tiranës ndaj Besës.

Location/Vendndodhja: England

A ju pelqen kjo faqe? Po