Sulmuesi ka besim se Tirana mund të ngjitet në krye të renditjes, nëse fiton ndaj Besës dhe Teuta humbet
Merkoçi: Kryesimin, pse jo që këtë javë

Ndeshja me Lushnjën për Kupën e Shqipërisë ka qenë e dyta për Eldorado Merkoçin, që e ka nisur si titullar në këtë sezon. Edhe pse nuk e ka gjetur golin, sulmuesi këmbëshpejtë i bardhebluve ka qenë promotori i aksioneve të skuadrës. 3 janë golat që Eldoja ka shënuar në 11 javë kampionat, dy prej të cilëve i kanë dhuruar Tiranës 6 pikë (ndaj Vllaznisë 3-2 dhe Lushnjës 2-1), ndërkohë që goli i tretë është regjistruar në humbjen 1-3 të kampionëve me Teutën. Në një deklarim për "Sportin shqiptar", 25-vjeçari jep opinionin e tij për ecurinë e ekipit në tri ndeshjet e fundit. "Pas asaj periudhe të vështirë katërjavore që kaluam në kampionat, më në fund u jemi rikthyer serive të fitoreve shumë të munguara. Edhe pse janë arritur fitore minimale, rëndësi për ne kanë pasur tripikëshat e marrë, të cilët na kanë afruar më shumë me kreun,"- thotë sulmuesi bardheblu. Për sa i takon përballjes së fundit për kupë ndaj "lagunarëve", ajo edhe pse është fituar 1-0, e ka parë Tiranën iniciatore të shumë sulmeve, por që vetëm në minutat e fundit të lojës është konkretizuar me golin e Dabullës. Për Eldorado Merkoçin, ky takim është fituar me meritë, edhe pse sulmuesi pretendon se kualifikimi mbetet ende i hapur. "Në lidhje me ndeshjen e kupës ndaj lushnjarëve, mund të them se qe një 90-minutësh i vështirë dhe që u fitua me meritë prej nesh. Synimi ynë kryesor në këtë përballje ishte ta zotëronim topin, duke qenë se fusha e Peqinit ishte e mirë, dhe të shënonim të paktën një gol. Fakti që në këtë takim të parë konsideroheshim udhëtues, e bënte të domosdoshme rrugën e rrjetës, sepse në njëfarë mënyre e ndiejmë veten më të qetë për ndeshjen e kthimit këtu në kryeqytet. Dua të shtoj, gjithashtu, se kualifikimi për në turin e katërt mbetet i hapur, pasi, në përgjithësi, takimet e kupës dhurojnë surpriza. Ne duhet të ruhemi prej tyre dhe të luajmë me të njëjtin përqendrim deri në finale,"- shton më tej ish-sulmuesi i Vllaznisë dhe i Partizanit. Prej tri ditësh, skuadra e Tiranës u është rikthyer stërvitjeve të saj të zakonshme në fushën "Skënder Halili", ku janë duke përvijuar përgatitjet anti-Besa. Synimi i të gjithë stafit drejtues dhe lojtarëve për këtë ballafaqim për javën e 12-të është i qartë, ku fitorja është alternativa e vetme. Edhe pse kampionët janë të vetëdijshëm për rezistencën që do të hasin në stadiumin e rikonstruktuar të Kavajës, po bëjnë të gjitha përpjekjet për të neutralizuar pikat më të forta të tyre. Në kampin bardheblu nuk pretendohet më që Tirana të fitojë me rezultat tenistik 7-1, si në fazën e parë, madje këtë ide e konfirmon vetë Merkoçi, kur thotë: "As diskutohet që ndaj Besës këtë të mërkurë do të jetë një takim emocionues, për vetë traditën dhe lojërat e bukura që janë zhvilluar në këtë stadium. Ne, prej disa ditësh, jemi duke u stërvitur fort, që në Kavajë të bëjmë një paraqitje mbresëlënëse dhe në fund të marrim rezultatin pozitiv. Nuk pretendojmë të fitojmë 7-1, siç bëmë fazën e parë, pasi kjo do të thoshte se nuk qëndrojmë me këmbë në tokë. Besa ka koleksionuar disa rezultate pozitive në këtë kampionat dhe vjen pas një fitoreje në trasfertë me Elbasanin, kështu që, detyrimisht, do të jetë shumë e motivuar,"- vazhdon komentin e tij Eldoja. Në fund, i pyetur nëse do të arrijë Tirana këtë të mërkurë që ta rimarrë kryesimin, Merkoçi është përgjigjur: "Pse jo? Nëse ne fitojmë me Besën dhe të njëjtën gjë bën Partizani me Teutën, atëherë kreu i klasifikimit do të jetë plotësisht yni."
Aurel CELIBASHI

Bardheblutë, sot fillojnë nga e para
Skuadra e Tiranës, dje, ndryshe nga java e kaluar, vendosi që të bënte pushim. Trajneri Mirel Josa, pas 3 fitoreve radhazi të arritura, u komunikoi të tijve që dje të pushonin dhe sot të fillojnë sërish nga e para, në pragpërgatitjet për javën e 12-të të kampionatit. Sot, në orën 14:00, kampionët do të zbresin në fushën "Skënder Halili", ku sipas planit stërvitor pritet të zhvillohet një seancë 90-minutëshe e karakterit taktik. Në stërvitjen e sotme pritet të rikthehet në skuadër edhe mesfushori Devi Muka, i cili luajti 30 minuta në miqësoren e kombëtares me Estoninë.

Location/Vendndodhja: England

A ju pelqen kjo faqe? Po