Mesfushori me tipare shkatërruese do të jetë i skualifikuar për ndeshjen e së mërkurës ndaj kavajasve
Patushi: Sa do të doja të luaja kundër Besës!
Kartoni i verdhë i marrë ndaj Lushnjës në Peqin për Kupën e Shqipërisë ka qenë i treti i koleksionuar në këtë sezon për mesfushorin bardheblu Saimir Patushi. Si rrjedhojë matjani është automatikisht i skualifikuar për takimin e javës së 12-të ndaj Besës, ndeshje e cila do të luhet ditën e mërkurë. Fakti që ky ballafaqim pritet me një interes të madh nga tifozeria kavajase, kjo si rezultat i inaugurimit të stadiumit të ri, i mohon të drejtën 26-vjeçarit që të jetë i pranishëm në fushën e lojës. Patushi ndien keqardhje që nuk do të jetë së bashku me shokët në këtë sfidë delikate, megjithatë ka besim se Tirana do të fitojë edhe pa të. Në një koment për "Sportin shqiptar", numri 21 i kampionëve deklaron: "Sa do doja që të luaja ndaj Besës për vetë faktin se do të jemi përballë një publiku të zjarrtë si ai kavajas! Por ja që kartoni i tretë i marrë ndaj Lushnjës disa ditë më parë, ma privon të drejtën për të qenë në fushë me shokët e skuadrës. Gjithsesi, këtë ndeshje do të shkoj dhe ta ndjek nga shkallët e stadiumit, pasi me sa jemi të informuar, kjo përballje derbi nëse mund ta quaj, do të jetë më shumë se një ndeshje futbolli për spektaklin që pritet të organizohet,"- thotë mesfushori me tipare shkatërruese. Ky është edicioni i dytë që Saimir Patushi jep kontributin e tij në radhët e bardhebluve. Ai është një ndër pikat më të forta në ekip për vetë detyrat specifike që i ngarkohen nga trajnerët, të cilat i realizon me një dëshirë ta madhe. Madje karakteri i tij me grintë dhe shpërndarja e topave në të gjithë sektorët e fushës e bëjnë matjanin një nga mesfushorët më të mirë të kampionatit shqiptar. Më parë Saimiri ka provuar të luajë në radhët e Burrelit, Partizanit dhe Vllaznisë, pa harruar edhe disa eksperienca të shkurtra jashtë vendit. Për sa i takon takimit të parë të kupës ndaj "lagunarëve", mesfushori bardheblu ka shprehur kënaqësinë për atë fitore të merituar dhe bën të ditur se kualifikimi është ende i hapur. "Kemi patur kënaqësinë të luanim në të atë fushë të shkëlqyer të Peqinit ndaj Lushnjës. U munduam të luanim në bllok dhe ta godisnim kundërshtarin me sulme të shpejta, por edhe për meritë të tyre golin e gjetëm vetëm një herë. Në përgjithësi u zhvillua një takim emocionues, pasi po të shikosh ecurinë e myzeqarëve, ajo ka ardhur në rritje. Megjithatë, në tri ndeshje që jemi përballur me ta deri tani, kemi fituar dhe kjo na mbush me shpresë se kualifikimi do të jetë në favorin tonë,"- vazhdon deklarimin e tij mesfushori bardheblu. Duke iu rikthyer sërish ballafaqimit të së mërkurës ndaj verdhezinjve, Patushi shprehet se Tirana i ka të gjitha mundësitë që të ruajë serinë e tri fitoreve të arritura deri tani kur në krye është trajneri Mirel Josa. "Mendoj se i kemi të gjitha mundësitë për ta fituar edhe këtë transfertë të vështirë ndaj kavajasve. Duhet të ruajmë medoemos gjithashtu serinë e fitoreve që kemi koleksionuar së fundi me trajnerin Josa, pasi është shumë e rëndësishme për ne që në fund të arrijmë objektivat. Besa vjen pas një fitoreje në Elbasan dhe morali i saj përpara tifozëve do të jetë i lartë, por kjo nuk përbën ndrojtje për ne, madje mund të them se na karikon më shumë për të fituar,"- përfundon idenë e tij mesfushori i qendrës së kampionëve, Saimir Patushi.
Aurel CELIBASHI

Kampionët ndryshojnë orarin e stërvitjes për kombëtaren
Skuadra e Tiranës dje ka ndryshuar orarin e stërvijtes për shkak të ndeshjes miqësore të kombëtares kuqezi me atë estoneze. Kështu, dje ajo në orën 11:00 të paradites, në fushën "Skënder Halili", ka punuar për 90 minuta nën drejtimin e trajnerëve Josa-Zengla-Tafaj. Stërvitja ka qenë e karakterit taktik dhe nuk ka pasur probleme. Madje dje në stërvitje janë rikthyer edhe nga disa prej lojtarëve që nuk ishin të pranishëm ditën e martë. Mungesa e vetme ishte ajo e Mukës, i cili është i grumbulluar me kombëtaren.

Location/Vendndodhja: England

A ju pelqen kjo faqe? Po