Stoperi i kampionëve i ka dhënë fitoren bardhebluve ndaj Lushnjës për turin e tretë të Kupës
Dabulla: Goli, dhuratë për Brigelin
Në futboll, përveç gëzimit të golit, ka edhe dedikime. Që të shënojë një sulmues, është normale, por kur rrugën e rrjetës e gjen një mbrojtës, kënaqësia është edhe më e madhe. Ka qenë minuta e 80-të në takimin e parë të turit të tretë të Kupës së Shqipërisë, ndërmjet Lushnjës dhe Tiranës, kur stoperi bardheblu Rezart Dabulla do të shënonte golin e vetëm të ndeshjes. Dhe menjëherë këtë gol, ai ka menduar t'ia dedikojë një personi të veçantë. Nuk bëhet fjalë për të afërm të familjes apo tifozeri, por për trajnerin e kombëtares shqiptare, Hans Peter Brigel. Gjermani, si për çudinë e të gjithëve, nuk e ka grumbulluar Dabullën në skuadër për miqësoren me Estoninë, duke u justifikuar se ai nuk gëzon formë të mirë fizike. Në një deklarim për "Sportin shqiptar", mbrojtësi bardheblu ka shprehur habinë e tij sesi trajneri Brigel justifikohet në këtë mënyrë, pa e parë sesi ka luajtur në ndeshjet e fundit. "Më vjen çudi sesi trajneri Brigel nuk më ka grumbulluar në kombëtare, duke pretenduar se nuk gëzoj formë të mirë. Nuk e di se në ç'ndeshje të fundit më ka vëzhguar dhe ka arritur në këtë konkluzion, duke qenë se për një periudhë kohe të gjatë ai ka qenë në vendlindje. Për të qenë i sinqertë, mund të them se aktualisht gëzoj një formë relativisht të mirë, e cila më lejon të jem të paktën pjesë e ekipit kombëtar. Sidoqoftë, nëse Brigeli ka menduar kështu, mua si futbollist profesionist më duhet t'i pranoj vendimet e tij, duke qenë se bëhet fjalë për përfaqësuesen e vendit tim, ku askush nuk e ka vendin të sigurt,"- thotë Rezarti. I pyetur nëse golin e shënuar ndaj Lushnjës për kupë ia dedikon gjermanit, Dabulla u shpreh: "Pse jo? Unë, duke qenë se shënoj rrallë dhe nuk kam bërë ndonjëherë dedikime, këtë gol po ia bëj dhuratë Brigelit dhe i uroj me këtë rast skuadrës fitore me Estoninë."
Për sa i takon ndeshjes së luajtur në fushën asnjanëse të Peqinit ndaj ish-skuadrës së tij, Lushnjës, Dabulla deklaron se ishte një takim i vështirë në përgjithësi për t'u fituar. "Ndeshjen e parë për turin e tretë të kupës ndaj Lushnjës e kishim parashikuar të vështirë për ta fituar dhe realisht ashtu ndodhi. Zhvilluam një volum të madh loje, por e konkretizuam vetëm me një gol. Lushnja luajti e ngjeshur në mbrojtje, duke mos u dhënë mundësi sulmuesve tanë ta gjenin rrugën e rrjetës. Ajo pothuajse aplikoi të njëjtën mënyrë loje, si dy javë më parë, kur u ndeshëm për kampionat. Gjithsesi, ne morëm një fitore të merituar dhe, duke parë që në këtë ballafaqim konsideroheshim skuadër udhëtuese, ky rezultat na jep shpresa se do ta kalojmë edhe këtë tur,"- komenton Dabi.
Ndryshe nga sezoni i kaluar, këtë edicion futbollistik, numri 3 i kampioneve e ka gjetur dy herë golin. I pari regjistrohet në fitoren 7-1 të Tiranës ndaj Besës, ndërkohë që i dyti këtë mërkurë ndaj ish-ekipit që ka luajtur para 6 sezonesh. Lushnja, për Rezart Dabullën, është skuadra që e ka "licensuar" në kategorinë e parë, ku ai debutoi që në moshën 17-vjeçare. Një vit te "lagunarët" dhe më pas do të vinte kalimi te bardheblutë, me të cilët po luan kampionatin e tij të gjashtë si një titullar i padiskutueshëm. Ja sesi i shpreh 23-vjeçari emocionet e golit të shënuar ndaj patriotëve të tij. "Nuk qe e lehtë të shënoja ndaj ish-skuadrës time të parë. Megjithatë, unë tashmë paguhem nga një tjetër klub dhe më duhet të bëj detyrën, duke dhënë maksimumin për fanellën bardheblu. Pa harruar që kam 6 vjet që jam larguar që andej dhe tanimë mund të quhem tiranas i vjetër,"- përfundon deklarimin e tij stoperi luftarak.
Aurel CELIBASHI

Bardheblutë, "harrojnë" pushimet
Edhe pse fituan minimalisht 1-0 ndaj Lushnjës të mërkurën, bardheblutë nuk bënë pushim dje, duke iu kthyer sërish stërvitjes. Ajo është zhvilluar dje paradite në stadiumin "Selman Stërmasi", ku trajneri Josa e ka ndarë skuadrën në dy grupe. Futbollistët që luajtën 90 minuta u stërvitën më lehtë se ata që nuk luajtën fare, apo u aktivizuan disa minuta. Stërvitja ishte e karakterit shkrydhës dhe fizik. Në stërvitjen e djeshme, mungesa e vetme ishte ajo e mesfushorit Devi Muka, i cili është i grumbulluar në Durrës me kombëtaren. Sot, skuadra ka stërvitje në orën 14:15, në fushën "Skënder Halili".

Location/Vendndodhja: England

A ju pelqen kjo faqe? Po