Mesfushori shkodran i kampionëve kërkon fitore ndaj lushnjarëve të mërkurën për turin e tretë të kupës
Lici: Kualifikimin, që në ndeshjen e parë
Për mesfushorin e krahut të majtë të Tiranës, Suad Licin, takimi i parë i Kupës së Shqipërisë ndaj Lushnjës duhet fituar me një rezultat të favorshëm. Sipas tij, duhet të bëhen të gjitha përpjekjet që çdo gjë të përfundojë që në fushën asnjanëse të Peqinit, që më pas skuadra të ketë mundësi të përqendrohet për ballafaqimet e kampionatit. Në një deklarim për "Sportin shqiptar", shkodrani i kampionëve në fuqi shprehet: "Ndeshja e kupës ndaj lushnjarëve, për ne është shumë e rëndësishme, pasi kjo veprimtari bën pjesë në objektivat tona sezonalë. Duhet medoemos që ta fitojmë këtë ballafaqim të parë ndaj tyre, madje me një rezultat të favorshëm, sepse më pas duhet të përqendrohemi në sfidat e vështira që na presin në kampionat,"- thotë ish-mesfushori i Vllaznisë, Teutës dhe Luftëtarit.
Fitorja e dytë radhazi në kampionat ka risjellë te bardheblutë optimizmin e duhur, se ai moment i vështirë katërjavor tashmë është hedhur mbrapa krahëve. Ardhja në krye të skuadrës e trajnerit Mirel Josa e ka ndryshuar gjendjen psikologjike të Tiranës, e cila e sheh veten në vendin e dytë në kampionat dhe hëpërhë ka filluar të mendojë për turin e tretë të kupës. Në krahasim me rivalët e tjerë për titull, për 20 herë kampionët, shorti i kupës nuk ka qenë favorizues, pasi për ta Lushnja është një skuadër relativisht e fortë. Madje një gjë të tillë e deklaron edhe vetë Suad Lici, kur thotë: "Shorti i kupës nuk ka qenë shumë favorizues për ne, në aspektin e vështirësisë së kundërshtarit që do të kemi përballë. Për Tiranën, përballja me myzeqarët konsiderohet e fortë, duke parë edhe ngritjen që ka Lushnja kohët e fundit në kampionat. Ata kanë një moral të lartë pas fitores me Partizanin, gjithashtu na kanë bërë një rezistencë të madhe para dy javësh në "Qemal Stafa". Gjithsesi, unë shpresoj që për ta kupa të mos ketë rëndësinë e kampionatit dhe në fushën asnjanëse të Peqinit të marrim një fitore të rëndësishme për mbarëvajtjen e sezonit,"- komenton 28-vjeçari. Për sa i takon fitores së fundit ndaj Flamurtarit dhe ngjitjes në tabelën e renditjes, Lici shprehet i kënaqur: "Jemi të kënaqur që në dy ndeshjet e fundit kemi marrë pikët e plota dhe tanimë e shohim veten në vendin e dytë të renditjes. Fitorja ndaj vlonjatëve, megjithëse në pamje të parë duket sikur e kemi arritur me vështirësi, mund të them se qe një formalitet për ne. Në asnjë moment nuk e vumë në dyshim fitoren. Tani, duke parë hapat false të Partizanit dhe Teutës, kreu i klasifikimit është vetëm një hap larg. Shpresojmë t'i mbajmë këto ritme edhe në të ardhmen, pasi gjërat sa vijnë e vështirësohen. Nëse duam të arrijmë suksesin e edicionit të kaluar, duhet të tregohemi më të ndërgjegjshëm për forcën që kemi,"- vazhdon deklarimin e tij numri 19 i bardhebluve. Në lidhje me rolin e tij nesër ndaj Lushnjës, Suadi do të ketë për detyrë të mbulojë linjën e majtë të fushës.
Aurel CELIBASHI

- Bardheblutë, dje, në orën 14:30, kanë zhvilluar seancën e radhës, pikërisht në fushën "Skënder Halili". Trajneri Josa, së bashku me asistentët e tij, Zengla-Tafaj, për 90 minuta ka zhvilluar me të tijtë një përgatitje të karakterit fizik. Vetëm sot mendohet që ai të zhvillojë variante taktike me skuadrën dhe të profilizojë formacionin anti-Lushnja. Stërvitja e sotme do të zhvillohet në stadiumin "Selman Stërmasi", në orën 11:00.
- Në prag të turit të tretë të Kupës së Shqipërisë, skuadra e Tiranës ka vendosur që të grumbullohet sërish një ditë para ndeshjes. Duke qenë se përballja me lushnjarët do të luhet në fushën asnjanëse të Peqinit, kampionët do ta kalojnë nesër natën buzë Adriatikut, pikërisht te hotel "Tirana" në qytetin e Durrësit.
- Nevil Dede, kapiteni i bardhebluve, pas një dite mungese të justifikuar, i është kthyer stërvitjes me skuadrën. Në fushën "Skënder Halili", ai është stërvitur normalisht me shokët e ekipit dhe pritet që ndaj myzeqarëve të marrë rolin e tij në qendër të mbrojtjes.
- Formacioni anti-Lushnje nuk është përcaktuar akoma, por, gjithsesi, nga ajo që shihet në kampin bardheblu, janë gjasat që të ketë ndryshime. Pritet që takimin, nga minuta e parë, ta nisë dyshja e sulmit, Halili-Xhafa, ndërsa në mbrojtje do të rikthehet Pinari. Të tre këta lojtarë nuk luajtën titullarë ndaj Flamurtarit të premten.

Location/Vendndodhja: England

A ju pelqen kjo faqe? Po