Ndryshe mund të quhet edhe "violina" e parë e Tiranës. Është ai që në çdo ndeshje pason, shënon dhe driblon, duke u kthyer në lojtarin kyç të kampionëve në fuqi. Bëhet fjalë për Devi Mukën, organizatorin bardheblu, i cili ka shënuar golin e fitores ndaj ish-skuadrës së tij, Flamurtarit. Nuk është hera e parë që "Labi" e bën një gjë të tillë ndaj patriotëve të tij, pasi edhe në fazën e parë shënoi golin e parë në atë fitore 3-0. Me këtë tripikësh të radhës, Tirana është ngjitur në vendin e dytë në renditje, me 23 pikë, dy më pak se Teuta kryesuese. Tashmë rimarrja e kryesimit të kampionatit për bardheblutë është vetëm një hap larg. I këtij mendimi është edhe Muka, i cili, në një deklarim për "Sportin shqiptar", shprehet: "Me fitoren ndaj Flamurtarit dhe hapat false të Teutës e Partizanit, hëpërhë e shohim veten më pranë rimarrjes së kreut të renditjes. Dy fitoret e fundit kanë risjellë në kampin tonë optimizmin e duhur, i cili rreth një muaj më parë na kishte humbur. Ndërkohë, dy pikët që na ndajnë me durrsakët janë më se të rikuperueshme për ne,"- thotë vlonjati "fluturues". Në ndeshjen e zhvilluar të premten në "Selman Stërmasi" ndaj Flamurtarit, kampionët fituan me lehtësi, pasi kuqezinjtë kishin në përbërje djelmosha të rinj dhë e kishin të vështirë ta përballonin furinë vendëse. Nëse bardheblutë do të ishin treguar më të shpejtë dhe më të saktë përballë portës, rezultati mund të kishte qenë më i thellë. Sidoqoftë, për momentin, rëndësi kanë tri pikët e marra, pasi loja në të ardhmen mund të përmirësohet. Kështu shprehet edhe Devi Muka, kur komenton: "Nëse do t'ia bënim hyzmetin më mirë ndeshjes, mund të kishim shënuar më shumë. Por, duke parë që përballë kishim një kundërshtar jo të nivelit tonë, për vetë situatën e vështirë financiare që ai po kalon, u mjaftuam vetëm me dy gola që në pjesën e parë. Më pas, në vazhdim, ishte një formalitet për ne,"- deklaron numri 10 i kampionëve në fuqi. I pyetur në lidhje me mosgëzimin për golin e shënuar ndaj ish-skuadrës së tij të vendlindjes, Devi sqaron: "Nuk kam sesi të gëzoj kur shënoj ndaj ish-ekipit tim të vendlindjes, që më formoi si futbollist. Por profesionalizmi është i tillë që duhet të japësh maksimumin për atë skuadër që të paguan, ndaj më duhej të shënoja ndaj Flamurtarit. Plus që çdo gabim imi në fushë mund të keqinterpretohej prej tifozëve të Tiranës. Kjo është një arsye më tepër që të mobilizohem dyfish për të larguar çdo lloj iluzioni prej tifozëve,"- citon sinqerisht mesfushori i bardhebluve dhe i kombëtares kuqezi. Për sa i takon ecurisë së kundërshtarëve, Muka bën të ditur se si Partizani ashtu dhe Teuta kanë për të kaluar medoemos një krizë rezultatesh. "Do t'ia dëgjoni shpejt "këngën", nëse mund të shprehem kështu, Partizanit dhe Teutës për sa u takon rezultateve negative që do të arrijnë. Nuk do të jetë vetëm Tirana ajo që do të përjetojë momente të vështira, pasi kështu i bie që skuadrat e tjera të marrin arratinë në renditje, por kështu kampionati nuk do të kishte kuptim. Ndërkohë, me rezultatet e dy javëve të fundit, çdo gjë është bërë më e bukur për sa i takon luftës për titull, ku në valle tashmë është futur edhe Vllaznia,"- thotë Devi Muka. Në fund të deklarimit të tij, Muka komenton edhe takimin e parë të kupës ndaj Lushnjës, që do të luhet këtë të mërkurë. Sipas Devit, ndeshja do të jetë e vështirë, duke qenë se myzeqarët po kalojnë një moment të mirë në kampionat. "Them se përballë do të kemi një Lushnjë të karikuar pas fitores ndaj Partizanit dhe ballafaqimi do të jetë i vështirë. Gjithsesi, nëse riparojmë ato gabime që trajneri na ka vënë në pah gjatë këtyre dy ditëve stërvitje, mund ta sigurojmë kualifikimin që në takimin e parë,"- i jep fund idesë së tij fantazisti i Tiranës.

Location/Vendndodhja: England

A ju pelqen kjo faqe? Po